އުމުރުފުޅުން 84 އަހަރުގައި ބަޚްރެއިންގެ ބޮޑުވަޒީރު އަވަހާރަވެއްޖެ
ބަޚްރެއިންގެ ބޮޑުވަޒީރުކަމުގެ މަގާމުގައި މިވަގުތު ހުންނެވި އަދި އެންމެ ދިގު މުއްދަތެއް ވަންދެން އަދާކުރެއްވި ޝައިޚް ޚަލީފާ ބިން ސަލްމާން އަލް ޚަލީފާ އަވަހާރަވެއްޖެއެވެ.
އުމުރުފުޅުން 84 އަހަރުގައި އެބޭފުޅާ ނިޔާވިކަން ބަޚްރެއިންގެ ދައުލަތުގެ ޚަބަރުފަތުރާ ވަސީލަތްތަކުން ވަނީ އިއުލާންކޮށްފައެވެ.
ޝައިޚް ޚަލީފާ ބިން ސަލްމާން އަލް ޚަލީފާ އަވަހާރަވެފައިވަނީ އެމެރިކާގެ މަޔޯ ކްލިނިކް ހޮސްޕިޓަލްގައި ފަރުވާ ހޯއްދަވަމުން ގެންދަވަނިކޮށެވެ. އެބޭފުޅާ އަވަހާރަވުމުގެ ހިތާމައިގައި ހަފްތާއެއް ވަންދެން އެގައުމުގައި ދިދަތައް ބައިދަނޑިއަށް ތިރިކުރުމަށް ބަހްރެއިންގެ ރަސްގެފާނު ވަނީ ނިންމަވާފައެވެ.
ބަހްރެއިންގެ ބޮޑުވަޒީރު އަވަހާރަވެފައިވަނީ ކޮން އާލާސްކަންފުޅެއްގައިތޯ މިހާތަނަށް ހާމަކޮށްފައެއް ނުވެއެވެ.
ޝައިޚް ޚަލީފާ ބިން ސަލްމާންގެ ބޮޑުވަޒީރުކަން ފާހަގަކުރެވިފައިވަނީ ބަހްރެއިން އިގްތިސާދީ ގޮތުން ވަރަށް ބޮޑަށް ކުރިއަރައި، މެދުއިރުމަތީގައި ބާރުގަދަ ގައުމަކަށް ބަހްރެއިން ވީ ދުވަސްވަރެއްގެ ގޮތުގައެވެ. ނަމަވެސް އެބޭފުޅާގެ މައްޗަށް ވަނީ ކޮރަޕްޝަންގެ ބޮޑެތި ތުހުމަތުތަކެއް ކުރެވިފައެވެ.
Advertisement
This content is created and paid for by advertisers and does not involve Voice Journalists