އައިޖީއެމްއެޗްއިން މައްޔިތުންގެ މޫނު ދެއްކުން ވަގުތީގޮތުން ހުއްޓާލައިފި
ކޮރޯނާ ވައިރަސްގެ ނުރައްކާ ބޮޑުވެ، މާލެ ތެރޭގައި ހަލުވި ކަމާއެކު ފެތުރެމުންދާތީ ރައްކާތެރިކަމުގެ ފިޔަވަޅެއްގެ ގޮތުން، އައިޖީއެމްއެޗުގައި މައްޔިތުންގެ މޫނު ދެއްކުން ވަގުތީ ގޮތުން މެދުކަނޑާލައިފި އެވެ.
އެކަންހާމަކުރައްވައި އެ ހޮސްޕިޓަލުން ނެރެފައިވާ ބަޔާނެއްގައި ބުނެފައިވަނީ ކޯވިޑް19ގެ އަލާމާތެއް ނުފެނި ގިނަ އަދަދެއްގެ ބަޔަކު ތިބޭނެކަމަށް ކަމާބެހޭ ތަޖުރިބާކާރުން ދަނީ ތަކުރާރުކޮށް ވިދާޅުވަމުން ކަމަށާއި މިފަދަ ހާލަތެއްގައި ހޮސްޕިޓަލުގެ ތެރެއަށް މި ބަލި ވަދެ ޑޮކްޓަރެއް، ނަރުހެއް ނުވަތަ އެނޫންވެސް މުވައްޒަފަކަށް މި ބަލި ޖެހިއްޖެނަމަ އެއީ މުޅި މުޖްތަމައަށް ނުރައްކާތެރިކަން އެތައް ގުނައަކަށް އިތުރުވެންދާނެ ކަމަށެވެ.
އެ ހޮސްޕިޓަލުގައި ނިޔާވުމުން، މީގެ ކުރީގައިނަމަ ގިނަ އަދަދެއްގެ ބަޔަކު މައްޔިތާގެ މޫނު ދެކިލުމަށް ހޮސްޕިޓަލަސް އަންނަ ކަމަށާއި މިއީ ހޮސްޕިޓަލުގެ މުވައްޒަފުންގެ އިތުރުން ހޮސްޕިޓަލަށް ޖަމާވާ އާންމުންނަށްވެސް ބަލި ފެތުރިދާނެފަދަ ކަމަށްވާތީ، އަދި ޖުމްލަ ގޮތެއްގައި މިވަގުތު މާލޭގައި ކޮމިއުނިޓީ ސްޕްރެޑް އޮތް ހާލަތަށް ބަލާއިރު ހަމަ އެއްގޮތަކަށްވެސް ކޮށްގެން ވާނޭ ކަމެއް ނޫންކަން އެންމެހައި ރައްޔިތުންވެސް ގަބޫލުފުޅުކުރައްވާނެ ކަމަށް އައިޖީއެމް ހޮސްޕިޓަލުން ބުނެފައިވެއެވެ.
“ކޮންމެހެން ވަންނަން ޖެހިގެން ފިޔަވައި ހޮސްޕިޓަލްތެރެއަށް އާންމުން ވަނުން އެދެވިގެންނުވާ އެއް ސަބަބަކީ މިއީއެވެ” އައިޖީއެމްއެޗުން ބުނެފައިވެއެވެ.
އެހެންކަމުން އެ ހޮސްޕިޓަލުގައި މީހަކު ނިޔާވުމުން މައްޔިތާގެ މޫނު ދެކިލުމަށް ނުވަތަ އެނޫންވެސް ގޮތަކަށް މައްޔިތާ ދެކިލުމަށް އެދޭ ފަރާތްތަކުން، މާލޭ ސިޓީ ކައުންސިލުންނާއި މިނިސްޓްރީ އޮފް އިސްލާމިކް އެފެއާޒުން ސަހަރާގައި އެ އިންތިޒާމްތައް ހަމަޖައްސަވާ ގޮތަކަށް އަމަލުކުރުމަށް ދަންނަވާކަމަށާއި އަދި މިވަގުތު އޮތް ނުރައްކާ، ނާޒުކު ހާލަތުގެ ސަބަބުން މޫނު ބެލުމަށް ހޮސްޕިޓްގެ ތެރެއަށް އާންމުން ވަނުމަށް ހުއްދަ ދެވެން ނެތްކަމަށްވެސް އައިޖީއެމް ހޮސްޕިޓަލުން ބުނެފައިވެއެވެ.
މިދިޔަ ބުދަ ދުވަހުން ފެށިގެން މާލޭގައި މިހާތަނަށް ވަނީ ގިނަ ބަޔަކު ކޮރޯނާ ވައިރަސްއަށް ޕޮޒިޓިވްވެފަ އެވެ. އޭގެެ ތެރެއިން މިއަދު އެކަނި ވެސް 16 މީހަކު ބައްޔަށް ޕޮޒިޓިވް ވެފައި ވެ އެވެ.
Advertisement
This content is created and paid for by advertisers and does not involve Voice Journalists