މުހައްމަދު ނަބީލް (ޔާޔާ ނަބީލް) އަނެއްކާވެސް މީސްމީޑިއާގައި ބަރަހަނާވެ، އަންހެން ހެދުން ލައިގެން ވީޑިއޯތައް އާއްމު ކުރަންފަށައިފިއެވެ.

މީގެ ކުރިންވެސް މީސްމީޑިއާގައި ބަރަހަނާ ވީޑިއޯ އާއްމުކޮށް ބޭ އަދަބީ ފޮޓޯއާއި ވީޑިއޯ ލަމުންދާތީ ހައްޔަރު ކުރި ޔާޔާ ނަބީލް ބަންދުން ދޫކޮށްލިފަހުންވެސް އެފަދަ ފޮޓޯތަކާއި ވީޑިއޯތައް އަންނަނީ އާއްމުކުރަމުންނެވެ.

އެގޮތުން އާއްމު ކުރަމުންދާތާ އެއްމަސް ދުވަހަށްވުރެ ގިނަ ދުވަސް މިހާރު ވެފައިވާއިރު އޭނާއާއި ދެކޮޅަށް އެއްވެސް ފިޔަވަޅެއް މިހާތަނަށް ވެސް ފުލުހުން އެޅިކަމެއް ހާމަކޮށްފައެއް ނުވެއެވެ.

މިކަމާއި ގުޅިގެން އާއްމުން ކަނބޮޑުވުން ފާޅުކުރަމުން އަންނައިރު, އޭނާގެ މި މައްސަލަ މިމަހު 10 ވަނަ ދުވަހު "ވޮއިސް" އިން ވެސް ވާނީ ފުލުހުންގެ ސަމާލުކަމަށް ގެނެސްފައެވެ. އެހެން ނަމަވެސް، އެމައްސަލާގައި ފުލުހުންގެ ބަހެއް މިހާތަނަށް ވެސް ލިބޭގޮތް ވަނީ ނުވެފައެވެ.

ސައްތައިން ސައްތަ އިސްލާމީ މުޖުތަމަޢު އެއްގައި ދީނާއި ޚިލާފް މިފަދަ ޢަމަލުތައް ފާޅުކަންބޮޑު ގޮތެއްގައި އޭނާ ކުރަމުންދާއިރު އޭނާ އާއި މެދު އެއްވެސް ފިޔަވަޅެއް ފުލުހުން އަޅާފައި ނުވާއިރު، އޭނާ މީސްމީޑިއާގައި ވީޑިއޯތަކާއި ފޮޓޯތައް އާއްމު ކުރަމުންދާ އެކައުންޓް ތައްވެސް މިހާތަނަށް ބޮލޮކް ކޮށްފައެއްނުވެއެވެ.

މިކަމާއި ގުޅިގެން ގިނަ އަދަދެއްގެ ދިވެހިންގެ ނުރުހުން އޭނާ އާއި ކަމާބެހޭ މުއައްސަސާތަކަށް އަމާޒުވެފައިވާއިރު، އެފަރާތްތަކުން އަންނަނީ އޭނާ އަލުން ހައްޔަރު ކުރުމަށް ގޮވާލަމުންނެވެ.

މީގެ ކުރިން ޓިކްޓޮކްގައި ބަރަހާނާ ވީޑިއޯ އާންމު ކުރި މައްސަލައެއްގައި ނަބީލް މިދިޔަ އަހަރު ސެޕްޓެމްބަރު 11 ވަނަ ދުވަހު ހައްޔަރު ކުރިއެވެ. އަދި އޭނާ ބަންދުން ދޫކޮށްލީ ބަންދުގައި މަހަކަށްވުރެ ގިނަ ދުވަސް ބެހެއްޓުމަށްފަހު އޮކްޓޯބަރު 12 ވަނަ ދުވަހުއެވެ. ޝަރުތުތަކަކާއެކު ނަބީލް ބަންދުން ދޫކޮށްލުމަށް ކްރިމިނަލް ކޯޓުން އެފަހަރު ނިންމީ، އިތުރަށް އޭނާ ބަންދުގައި ބަހައްޓަން ޖެހޭ ސަބަބެއް ނެތުމުން ކަމަށް ކޯޓުން ވަނީ ބުނެފައެވެ.