ޕެރިސް 2024 އޮލިމްޕިކްސް ފެށުމުގެ ރަސްމިއްޔާތުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާގެ ނައިބު، އަލްއުސްތާޛު ޙުސައިން މުޙައްމަދު ލަޠީފް، ފްރާންސް ގެ ވެރިރަށް، ޕެރިހަށް ފުރާވަޑައިގެންފިއެވެ.

މިކަމާއި ގުޅޭގޮތުން ރައީސް އޮފީހުން ބުނީ، މިއީ ފްރާސް ސަރުކާރާއި އިންޓަރނޭޝަނަލް އޮލިމްޕިކް ކޮމިޓީގެ ދަޢުވަތަކަށް ނައިބު ރައީސް ކުރައްވާ ދަތުރުފުޅެއް ކަމަށެވެ. އެމަނިކުފާނުގެ މި ދަތުރުފުޅުގައި  ޕެރިސް 2024 އޮލިމްޕިކްސް ކުޅިވަރު މުބާރާތުގައި ބައިވެރިވާ ދިވެހި ވަފުދާއި ބައްދަލުކުރައްވައި، ދިވެހި އެތުލީޓުން ބައިވެރިވާ މުބާރާތްތައް ބައްލަވާލެއްވުމަށް ހަމަޖެހިފައިވާ ކަމަށް ވެސް ރައީސް އޮފީހުން މައުލޫމާތު ދެއެވެ.

ޕެރިސް 2024 އޮލިމްޕިކްސް ކުޅިވަރު މުބާރާތް ފެށުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ 26 ޖުލައި 2024 ވާ ހުކުރު ދުވަހުއެވެ.

Advertisement

މިއަހަރުގެ އޮލިމްޕިކްސް އަކީ ރާއްޖެ އިން މިހާތަނަށް އެންމެ ގިނަ އެތުލީޓުން ބައިވެރިވާ ފަހަރެވެ. މިގޮތުން މިއަހަރު ރާއްޖެއިން މިހާތަނަށް ފަސް އެތުލީޓުން ބައިވެރިވާއިރު، ރައީސުލްޖުމްހޫރިއްޔާ ޑރ.މުޙައްމަދު ވަނީ މި އެތުލީޓުންނާއި ބައްދަލުކުރައްވާ އެ އެތުލީޓުންނަށް ހިތްވަރުދެއްވައި، ސަރުކާރުން ދިވެހި ކުޅިވަރު ތަރައްޤީ ކުރުމަށް ދެއްވާ އިސްކަން ދެއްވާކަން ހާމަކުރައްވާފައެވެ.

 މި ފަހަރުގެ އޮލިމްޕިކްސްގައި ރާއްޖޭން ހަތަރު ކުޅިވަރެއްގައި ވާދަކުރުމަށް ވަނީ ހަމަޖެހިފައެވެ. އެއީ ބެޑްމިންޓަން، އެތުލެޓިކްސް، ސްވިމިން އަދި ޓޭބަލް ޓެނިސް އެވެ.

މީގެ ތެރެއިން ބެޑްމިންޓަންގައި ވާދަކުރަނީ ޖެހިޖެހިގެން ދެ އޮލިމްޕިކްސްގައި ވާދަކުރާ އަދި އެއް އޮލިމްޕިކްސް އަށް ވުރެ ގިނަ އޮލިމްޕިކްސްގައި ވާދަކުރި ފުރަތަމަ ދިވެހި އެތުލީޓް، ނަބާހާ އެވެ. އަދި ޓޭބަލް ޓެނިސްގައި ވާދަކުރާނީ ޓީޓީ ތަރި ފާތިމަތު ދީމާ އަލީއެވެ.

އެތުލެޓިކްސް އިން މިފަހަރު އޮލިމްޕިކްސްގައި އިބާދުﷲ ވާދަކުރާއިރު، މި ފަަހަރުގެ އޮލިމްޕިކްސް އަށް އެންމެ ފަހުން، އެތުލީޓުން ކަނޑައެޅި ސްވިމިން އިން ވާދަކުރާނީ މުހައްމަދު އާން ހުސައިން އަދި ޢާއިޝަތު އުލްޔާ ޝާއިގް އެވެ.

އޮލިމްޕިކްސްގައި ދިވެހި ދިދަ އުފުލުުމުގެ ޝަރަފް ލިބިފައިވަނީ ދީމާ އަށާއި، އިބާދުﷲ އަށެވެ. 

އޮލިމްޕިކްސް ގޭމްސްގައި ރާއްޖޭގެ ޗެފް ޑި މިޝަނަރަކަށް ހަމަޖައްސާފައިވަނީ ޓޭބަލް ޓެނިސް އެސޯސިއޭޝަން އޮފް މޯލްޑިވްސް (ޓީޓީއޭއެމް)ގެ ރައީސް އަލީ ރަޝީދު (އައްޔަ)އެވެ.