ދިވެހިރާއްޖޭގައި ދިރިއުޅެމުންދާ 18 އަހަރުން ދަށުގެ ކުޑަކުދިންގެ ތެރެއިން %2 ކުދިން ދިރިއުޅެމުންދަނީ މަންމަ ނުވަތަ ބައްޕައާއި ވެސް ނުލައި ކަމަށް ތަފާސް ހިސާބުތަކުން ދައްކައިފިއެވެ. 

ކުޑަކުދިންގެ ދުވަހާއި ގުޅިގެން މޯލްޑިވްސް ބިޔުރޯ އޮފް ސްޓެޓިސްޓިކުން އާއްމު ކުރި ތަފާސް ހިސާބުތަކުން ދައްކާ ގޮތުން 2025 ވަނަ އަހަރުގެ، ދިވެހި ކުޑަކުދިންގެ އާބާދީއަކީ 131،154 އެވެ. އެއީ މުޅި އާބާދީގެ 21.8 އިންސައްތަ އެވެ. ކުޑަކުދިންގެ އާބާދީގެ %52 އަކީ ފިރިހެން ކުދިން ކަމުގައި ވާއިރު، އަނެއް %48އަކީ އަންހެން ކުދިންނެވެ. 

2022 ވަނަ އަހަރުގެ ބޯހިމެނުމުގެ ތަފާސްހިސާަބުތައް ދައްކާގޮތުން، ރާއްޖޭގައި ދިރިއުޅޭ ކުޑަކުދިންގެ އާބާދީގެ %74 ދިރިއުޅެނީ މަންމައާއި ބައްޕައާ އެކުގައެވެ. އަނެއް %22 އިންސައްތަ މަންމަ ނުވަތަ ބައްޕައާއެކު ދިރިއުޅޭއިރު %2 ކުދިން ދިރިއުޅެނީ ބެލެނިވެރިއަކާ ނުލައެވެ. 

ފޮޓޯ/ މޯލްޑިވްސް ބިއުރޯ އޮފް ސްޓެޓިސްޓިކްސް

މީގެ އިތުރުން 2023/2024 ގައި ސްކޫލްތަކުގައި 99،300 ކިޔަވަމުންދާއިރު، އޭގެ ތެރެއިން 50،845 ކުދިންނަކީ ފިރިހެން ކުދިންނެވެ. އަދި 48،455 އަކީ އަންހެން ކުދިންނެވެ. 

2022 ވަނަ އަހަރުގެ ބޯހިމެނުމުގެ ތަފާސް ހިސާބުތައް ދައްކާގޮތުން ރާއްޖޭގައި 3،401 ކުދިންނަކީ ކޮންމެވެސް ކަހަލަ ނުކުޅެދުންތެރިކަމެއް ހުންނަ ކުއްޖެކެވެ. 

ފޮޓޯ/ މޯލްޑިވްސް ބިއުރޯ އޮފް ސްޓެޓިސްޓިކްސް

ތަފާސް ހިސާބުތައް ދައްކާގޮތުން، 2023 ވަނަ އަހަރު ކުޑަކުދިންނަށް ޖިންސީ އަނިޔާ ކޮށްގެން 218 މައްސަލަ ރިޕޯޓް ކޮށްފައިވެއެވެ. އަދި ޖިސްމާނީ އަނިޔާ ކޮށްގެން 169 މައްސަލަ ހުށަހެޅުނުއިރު، އަޅާނުލައިގެން 57 މައްސަލައެއް ރިޕޯޓް ކޮށްފައިވެއެވެ.