ވާދޫ އިން ފަަލަސްޠީނު ރައްޔިތުންނަށް ބިން ދޫކުރަނީ

ގދ ވަދޫ އިން ފަލަސްޠީން ރައްޔިތުންނަށް ބިން ދޫކުރުމަށް އެރަށު ކައުންސިލަށް ހުށައަޅައިފިއެވެ.

ވާދޫ ކައުންސިލްގެ ރައީސް ހަސަން ޢަބްދުالله “ވޮއިސް” އަށް މައުލޫމާތު ދެއްވަމުން ވިދާޅުވީ މިކަމަކީ ވާދޫގެ ރައްޔިތުންގެ އެދުމުގެ މަތިން ކައުންސިލަށް ހުށައެޅިފައިވާ ހުށައެޅުމެއް ކަމަށާއި މި ކަން ކައުންސިލުން ފާސްކުރާނެ ކަމަށެވެ.

މީގެ އިތުރުން ހަސަން ވިދާޅުވީ އެބޭފުޅުންގެ ވިސްނުންފުޅަކީ ޔަތީމުވެފައިވާ ކުޑަކުދިންނާއި ގެދޮރުގެއްލިފައިވާ އާއިލާތައް ހިމެނިގެން ދާގޮތައް 1000 މީހުންނަށް ދިރިއުޅެވޭނެ ވަރުގެ ބިން ފަަލަސްޠީނުގެ ރައްޔިތުންނަށް ދޫކުރުން ކަމަށެވެ.

“އަޅުގަނޑުމެންގެ ވިސްނުމަކީ 23 މިލިއަން ރުފިޔާ ދިވެހި ރައްޔިތުން ފަލަސްޠީނަށް ހަދިޔާ ކުރިޔަސް، ފަލަސްޠީނުގައި ޙާލުގައި ޖެހިފައިތިބި ރައްޔިތުންނަށް ދިރިއުޅެވޭނެ ގޮތެއް ހަދައިދިނުން، އެގޮތައް އަޅުގަނޑުމެންނަށް ކަންތައް ކުރެވޭނީ އެބޭފުޅުންނަށް އުޅޭނެ ތަނެއް، ބިމެއް އެބޭފުޅުނަށް ދެވިގެން”ޙަސަން ވިދާޅުވިއެވެ.

ހަސަން ވިދާޅުވީ ވާދޫ އަކީ 197 ހެކްޓަރުގެ ބިން އޮތް ރަށެއް ކަމަށާއި، އެރަށުގެ އާބާދީއަކީ 1500 ކަމަށާއި އޭގެ ތެރެއިން ރަށުގައި އާންމުގޮތެއްގައި އުޅެނީ 600 އެއްހާ މީހުން ކަމަށެވެ.

ރަށުގެ ބޮޑި މިނަށް ބަލައި ރަށުގައި އާބާދީ އިތުރުކުރަން ބޭނުން ވާކަމަށާއި، ލޭންޑް ޔޫސް ޕްލޭންގައި އެހެން ރަށްރަށުން މީހުން ގެނެސް އާބާދު ކުރުމަށް އެކުލަވައިލެވުނު ކަމަށް ހަސަން ވިދާޅުވިއެވެ. ޙަސަން ވިދާޅުވީ ދިވެހިންނަށް ނުވިޔަސް މުސްލިމުންނަށް ވީތީ ވާޑޫގެ ބިމުން ފަަލަސްޠީނުގެ ރައްޔިތުނަށް ދޭން އެރަށުގެ ރައްޔިތުން ބޭނުންވާ ކަމަށެވެ.

“ވާދޫ ރައްޔިތުން ބޭނުންވޭ، ޚާއްސަ ކޮށް މުސްލިމުން އޭގެ ޒާތުގައި އެހީވާން، ވާދޫ ރައްޔިތުން ދެކޭ ގޮތުގައި މުސްލިމުންނަށް އެހީވުމަކީ އެމީހުންނަށް ގެދޮރުވެރިކަން ދިނުން އެމީހުނަށް ބިން ދިނުން، އެމީހުންގެ ބިމުން އެމީހުން ބާލަނީ، ވާދޫގެ ބިމަކީވެސް މުސްލިމް ރައްޔިތުން އުޅޭ ބިމެއް، މިބިމުން ފަލަސްޠީނުގެ ރައްޔިތުންނަސް ފުރުސަތު އެބައޮތް” ޙަސަން ވިދާޅުވިއެވެ.

ޙަސަން ވިދާޅުވީ ވާދޫ އަށް އަންނަން ބޭނުންވާ ފަރާތްތަކަށް އެރަށުން ދޫކުރާ ބިމުގައި ބޯހިޔާވަހިކަން ޤާއިމް ކޮށްދިނުމަށް ކަންކަން ކުރާނެ ގޮތަކާއި މެދު އައިއޭސީ ފަދަ ޖަމިއްޔާ ތަކާއި އެކު މަޝްވަރާ ކުރެވެމުން ދާކަމަށެވެ.

އަދި ވަގުތީ ގޮތުން ފަަލަސްޠީން ދޫކޮށް ވާދޫ އަށް އަންނަ މީހުނަށް ބޭނުންވުމުން އަނބުރާ ފަލަސްޠީނަށް ދިޔުމުގެ ފުރުސަތު އޮންނާނެ ކަމަށެވެ.