ނޭޝަނަލް ތެލެސީމިއާ ސެންޓަރުގައި ލޭ ހަދިޔާކުރުމުގެ ހަރަކާތެއް ބާއްވަނީ

ނޭޝަނަލް ތެލެސީމިއާ ސެންޓަރުގައި ލޭ ހަދިޔާކުރުމުގެ ޚާއްޞަ ހަރަކާތެއް ބާއްވަން ނިންމައި އެ ހަރަކާތުގައި ވީހާވެސް ގިނަ ފަރާތްތަކަކުން ބައިވެރިވެ، ލޭ ހަދިޔާކުރުމަށް މޯލްޑިވްސް ބިޒްނަސް ސްކޫލް (އެމްބީއެސް) އިން އާންމުކޮށް ހުޅުވާލައިފިއެވެ.

އެމްބީއެސް އިން ބުނީ، މިއީ އެ ސްކޫލުން އަހަރަކު އެއްފަހަރު ބާއްވަމުން އަންނަ ލޭ ހަދިޔާކުރުމުގެ ކެމްޕޭނުގެ ދަށުން، އަންނަ އާދީއްތަ ދުވަހު ބޭއްވުމަށް ހަމަޖެހިފައިވާ ހަރަކާތެއް ކަމަށެވެ. މޯލްޑިވިއަން ބްލަޑް ސާވިސަސް، ބްލަޑް ޑޯނާސް އެމްވީ އަދި ލޭ އެޕް ގުޅިގެން ކުރިއަށްގެންދާ މި ހަރަކާތް އޮންނާނީ އެ ދުވަހުގެ ހެނދުނު 9:00 އިން ހަވީރު 5:00 އަށް ނޭޝަނަލް ތެލެސީމިއާ ސެންޓަރުގައެވެ.

މި ހަރަކާތުގައި ލޭ ހަދިޔާކުރެވޭނީ ޝަރުތު ހަމަވާ ކޮންމެ މީހަކަށެވެ. އެގޮތުން ލޭ ހަދިޔާކުރާ ފަރާތްތަކަކީ އުމުރުން 18 އަހަރު ފުރިފައިވާ، ބަރުދަނުގައި މަދުވެގެން 45 ކިލޯ ހުރި، އަދި ސިއްހަތު ރަނގަޅު މީހުން ކަމުގައި ވާންޖެހެއެވެ.

މީގެއިތުރުން އަރިދަފުސް ރޯގާ ނުވަތަ ހުމުގެ އަލާމާތެއް ނެތުމާއި، އެންމެ ފަހުން ލޭ ހަދިޔާކުރިތާ މަދުވެގެން 3 މަސްދުވަސް ވެފައިވުން ހިމެނެއެވެ.

ބައެއް ކަހަލަ ފަރުވާތައް ހޯދާފައިވާ ނުވަތަ ވެކްސިން ޖަހާފައިވާ ފަރާތްތަކުން ލޭ ހަދިޔާކުރުމުގެ ކުރިން މަޑުކުރަން ޖެހިދާނެ ކަމަށާއި، މިފަދަ ކަންކަމުގައި ޝައްކު އުފެދޭ ފަރާތްތަކަށް އެހީތެރިވުމަށް އެތަނުގައި ސްކްރީނިންގ ޓީމެއް ހަރަކާތްތެރިވާނެ ކަމަށްވެސް އެމްބީއެސް އިން މައުލޫމާތު ދެއެވެ.

ލޭ ހަދިޔާކުރަން ދާއިރު އައިޑީކާޑު ގެންދިއުމަށް އިލްތިމާސްކުރަމުން އެމްބީއެސް އިން ބުނީ، ލޭ ބޭނުންވާ ފަރާތްތަކަށް މެދުކެނޑުމެއްނެތި ލޭ ފޯރުކޮށްދިނުމަށް ކޮންމެ ލޭތިއްކަކީ ވެސް މުހިންމު އެއްޗަކަށް ވާތީ، ވީހާވެސް ގިނަ ރަޙުމަތްތެރިން ގޮވައިގެން އައިސް ލޭ ހަދިޔާކުރުމަށް އެދޭ ކަމަށެވެ.

މި ހަރަކާތުގައި ބައިވެރިވުމަށް ޝައުޤުވެރިވާ ފަރާތްތަކަށް ޚާއްޞަ ލިންކު (https://forms.gle/DWpEeskHYNpuNcCJ8) މެދުވެރިކޮށް ރަޖިސްޓްރީވުމުގެ ފުރުސަތު މިހާރު ވަނީ ހުޅުވާލާފައެވެ.