ދީނީ ޢިލްމު ނެތި ފަތުވާދީ، ޅަ ސިކުނޑިތައް ތަޣައްޔަރުކުރާ މައްސަލައަށް ޙައްލު ހޯދަންޖެހޭ: ދިފާއީ ވަޒީރު
ދީނީ ޢިލްމު އުނގެނިފައިނުވާ ޙާލަތްތަކުގައިވެސް ބައެއް ފަރާތްތަކުން ދީނީގޮތުން ފަތުވާ ނެރެ، ޒުވާނުންނާއި ޅަ ސިކުނޑިތައް ތަޣައްޔަރު ކުރަމުންދާ ކަމަށާއި، މިފަދަ ކަންކަން ހުއްޓުވުމަށް ނޭޝަނަލް ކައުންޓަރ ޓެރަރިޒަމް ސެންޓަރާއި ދިވެހިރާއްޖޭގެ އައިޔޫއެމް ގުޅިގެން މުހިންމު މަސައްކަތްތަކެއް ކުރެވިދާނެ ކަމަށް ދިފާޢީ އަދި ވަޠަނީ ޚިދުމަތާބެހޭ ވަޒީރު ހަސަން ރަޝީދު ވިދާޅުވެއްޖެއެވެ.
ވަޒީރު މިހެން ވިދާޅުވީ ދިވެހިރާއްޖޭގެ އިސްލާމީ ޔުނިވަރސިޓީގެ މިއަހަރުގެ ދަސްވެނިވުމުގެ ރަސްމިއްޔާތުގެ ދެވަނަ ސެޝަން ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، މިއަދު ރާއްޖެއަށް ކުރިމަތިވެފައިވާ އެންމެ ބޮޑު އެއް ގޮންޖެހުމަކީ، އިސްލާމީ އެއްވެސް މަދުރަސާއަކުން ނުވަތަ ޔުނިވަރސިޓީއަކުން ދީނީ ޢިލްމު ޙާޞިލުނުކޮށް ތިބޭ ފަރާތްތަކުން އަމިއްލައަށް ފަތުވާ ނެރެ، މުޖުތަމަޢުގެ ޅަދަރިންގެ ވިސްނުން ކިލަނބުކުރަމުން ދިޔުން ކަމަށެވެ.
"މިއަދު ރާއްޖެއަށް ދިމާވެފައިވާ އެންމެ ބޮޑު އެއް މައްސަލައަކީ، އިސްލާމީ އެއްވެސް މަދުރަސާއަކުން ނުވަތަ ޔުނިވަރސިޓީއަކުން ދީނީ ޢިލްމު އުނގެނިފައިނުވާ ހާލަތްތަކުގައިވެސް ބައެއް ފަރާތްތަކުން ދީނީގޮތުން ފަތުވާ ނެރެ، ޅަ ސިކުނޑިތައް ތަޣައްޔަރު ކުރަމުން ދިޔުން. އެހެންކަމުން މިކަންކަން ދެނެގަތުމަށްޓަކައި ދިފާޢީ ވުޒާރާގެ ދަށުން ހިންގަމުންދާ ކައުންޓަރ ޓެރަރިޒަމް ސެންޓަރާއި، އިސްލާމީ ޔުނިވަރސިޓީ ގުޅިގެން މިކަމުގައި މުހިންމު މަސައްކަތްތަކެއް ކުރެވިދާނެ ކަމުގައި ދެކެން."
ބަވަނަވަމުން އަންނަ ދުނިޔޭގައި ދިވެހީންގެ ޢަޤީދާއަށް އަމާޒުކޮށް ތަފާތު ފިކުރީ ހަމަލާތައް އަންނަމުންދާކަން ފާހަގަކުރައްވައި، ވަޒީރު ވިދާޅުވީ އެފަދަ ހަމަލާތަކާއި ނޭދެވޭ ފިކުރުތަކުން މުޖުތަމަޢު ސަލާމަތްކުރުމަށްޓަކައި ތަޢުލީމީ މުއައްސަސާތަކުގެ ދައުރު ވަރަށް ބޮޑު ކަމަށެވެ. އަދި އައިޔޫއެމްއަކީ ދިވެހިންގެ އިސްލާމީ ވަޙްދަތު ރައްކާތެރިކޮށް ދަމަހައްޓައި، ޤައުމީ އެއްބައިވަންތަކަން ޤާއިމުކުރުމުގައި މުހިންމު ދައުރެއް އަދާކުރާ މުއައްސަސާއެއްކަން ވަޒީރު ފާހަގަކުރެއްވިއެވެ.
މީގެއިތުރުން، އުނގެނުމަކީ ކޮންމެ މީހެއްގެ މައްޗަށް އޮތް ދީނީ ވާޖިބެއްކަން ބަޔާންކުރައްވަމުން ވަޒީރު ވިދާޅުވީ، ލިބިފައިވާ ތަޢުލީމާއި ހުނަރު އަދި ވިސްނުންތެރިކަމުގެ ބޭނުން ހިފަންވާނީ ޤައުމާއި މުޖުތަމަޢަށް ފައިދާހުރި ގޮތުގައި ޤައުމު ބިނާކުރުމަށް ކަމަށެވެ. އަދި ޤައުމު ބިނާކުރުމުގެ އެންމެ ވަރުގަދަ ބާރަކީ ތަޢުލީމީ ޒުވާނުން ކަމުގައިވާތީ، ދަސްވެނިވި ދަރިވަރުން ނަމޫނާ ދައްކައި، ޤައުމުގެ ތަރައްޤީގައި އިޚްލާޞްތެރިކަމާއެކު ޙިއްޞާވުމަށް ވަޒީރު ވަނީ ނަޞޭޙަތްތެރިވެވަޑައިގެންފައެވެ.
މި ރަސްމިއްޔާތުގައި ރާއްޖޭގައި އިސްލާމީ މަތީ ތަޢުލީމު ފުޅާކުރުމަށް އިސްލާމީ ޔުނިވަރސިޓީން ކުރަމުންދާ މިންނެތް މަސައްކަތްތައް ފާހަގަކުރައްވައި، ވަޒީރު ވަނީ އެ ޔުނިވަރސިޓީގެ މެނޭޖްމަންޓަށާއި މުވައްޒަފުންނަށް ޝުކުރު އަދާކުރައްވާފައެވެ..
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
