ތެލެސީމިއާ ކެރިއަރ ޑިޖިޓަލް ކާޑު ތައާރަފުކޮށްފި

ޕްރިންޓް ކާޑުގެ ބަދަލުގައި ރާއްޖޭގައި ތެލެސީމިއާ ކެރިއަރ ޑިޖިޓަލް ކާޑެއް ތައާރަފުކޮށްފިއެވެ.

މިކަމާ ގުޅޭގޮތުން މޯލްޑިވްސް ބްލަޑް ސާވިސަސްއިން ބުނީ ތައާރަފުކުރި ޑިޖިޓަލް މި ކާޑާއެކު، މީގެކުރިން ބޭނުންކުރަމުން އައި ޕްރިންޓް ކާޑުތައް ހުއްޓުމަކަށް އައިސް، މުޅިން އާ ޑިޖިޓަލް ނިޒާމަކަށް ބަދަލުވެގެންދާނޭ ކަމަށެވެ.

އާ ޑިޖިޓަލް ކާޑުގައި ތެލަސީމިއާ ކެރިއަރެއްކަން ނުވަތަ ނޫންކަން އަންގައިދޭ ކާޑުގެ 7 ބާވަތެއް ސިފަ ހިމެނޭނެއެވެ. އަދި ޒަމާނީ ޓެކްނޮލޮޖީގެ އެހީގައި މި ކާޑުގައި ހާއްސަ ކިޔުއާރް ކޯޑެއް ހިމެނިފައިވުމުން، ކާޑުގެ ސައްހަކަން ވަގުތުން ވެރިފައިކޮށް ކަށަވަރުކުރެވޭނެ އިންތިޒާމު ވަނީ ހަމަޖެހިފައެވެ.

މީގެ އިތުރުން، މި ކިޔުއާރް ކޯޑު މެދުވެރިކޮށް ތެލަސީމިއާ ކެރިއަރުންނަށް އާއިލާ ރޭވުމުގައި ބޭނުންވާނެ މުހިންމު އިރުޝާދުތަކާއި މައުލޫމާތުތައް ފަސޭހަކަމާއެކު ލިބިގެންދާނެއެވެ. މިވަގުތު މި ޑިޖިޓަލް ކާޑު ފޯރުކޮށްދެމުންދާނީ ވަޓްސްއެޕް އަދި އީމެއިލްގެ ޒަރީއްޔާއިންނެވެ.

ހަމައެއާއެކު، ތެލަސީމިއާ ކޮންޓްރޯލް ކުރުމުގެ ޤާނޫނުގެ ދަށުން ސްކްރީނިންގ ނިޒާމު ހަރުދަނާކުރުމުގެ ގޮތުން، ސަރުކާރުގެ ސިއްހީ މަރުކަޒެއްގައި ޑީއެންއޭ ލެބޯރެޓަރީއެއް ޤާއިމުކޮށް، މިދިޔަ ފެބްރުއަރީ މަހުގެ 8 ވަނަ ދުވަހުން ފެށިގެން ވަނީ ހިދުމަތް ދޭން ފަށާފައެވެ. ބައިނަލްއަޤުވާމީ ސިއްހީ މިންގަނޑުތަކާ އެއްގޮތަށް ޑީއެންއޭ ތަހުލީލުކުރުމުގެ މި ހިދުމަތް ރާއްޖޭގައި ފުރަތަމަ ފަހަރަށް ފޯރުކޮށްދެމުންދަނީ މޯލްޑިވިއަން ބްލަޑް ސަރވިސަސް މެދުވެރިކޮށެވެ.