ރިސޯޓްތަކުން ބޭންކިން ނިޒާމަށް ވަންނަންޖެހޭ ޑޮލަރު ހޯދަން އޮޑިޓެއް ހަދަންޖެހޭ: ގަވަރުނަރު

ރާއްޖޭގެ ރިސޯޓުތަކުން ބޭންކިން ނިޒާމަށް ވަންނަންޖެހޭ ބޭރު ފައިސާ ހޯދުމަށްޓަކައި ދައުލަތުގެ ޓެކްސް އިދާރާ (މީރާ) އިން އޮޑިޓެއް ހަދަންޖެހޭ ކަމަށް މަރުކަޒީ ބޭންކް (އެމްއެމްއޭ) ގެ ގަވަރުނަރު އަޙްމަދު މުނައްވަރު މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ބަޖެޓް ކޮމިޓީގައި ވާހަކަދައްކަވަމުން ގަވަރުނަރު ވިދާޅުވީ، ރާއްޖެއަށް ވަންނަ ކޮންމެ ޑޮލަރެއް ރާއްޖޭގެ ބޭންކިން ނިޒާމުގެ ތެރެއަށް ވަންނަ ނަމަ މިހާރު ތަޙައްމަލު ކުރަންޖެހިފައިވާ ބޭރު ފައިސާގެ ދަތިކަން މިހާ ބޮޑުވެގެން ނުދާނެ ކަމަށެވެ. އަދި މިހާރު އޮތް ހިސާބުތަކަށް ބަލާއިރު، ރާއްޖެއަށް އާމްދަނީގެ ގޮތުގައި ގާތްގަނޑަކަށް 5.9 ބިލިއަން ޑޮލަރު ލިބޭއިރު، ރާއްޖޭގެ ބޭންކިން ނިޒާމަށް ވަންނަނީ އެންމެ 3.8 ބިލިއަން ޑޮލަރު ނުވަތަ 65 އިންސައްތަ ކަން އޭނާ ފާހަގަކުރެއްވި އެވެ.

މީރާއިން ހިއްސާކޮށްފައިވާ ހިސާބުތަކާ ހަވާލާދެއްވައި ގަވަރުނަރު ވިދާޅުވީ، ރާއްޖޭގައި ހިންގާ 185 ރިސޯޓުގެ ތެރެއިން އިންކަމް ޓެކްސް (ބިޒްނަސް ޕްރޮފިޓް ޓެކްސް) ދައްކަނީ ގާތްގަނޑަކަށް 50 ވަރަކަށް ރިސޯޓުން ކަމަށެވެ.

ގަވަރުނަރު އިތުރަށް ވިދާޅުވީ، ރާއްޖެއަށް ލިބޭ ކޮންމެ ޑޮލަރެއް ބޭންކިން ނިޒާމަށް ވެއްދުމަށްޓަކައި މޮނިޓަރިން ހަރުދަނާކުރަން ޖެހޭ ކަމަށާއި، މިހާރު ރިސޯޓުތަކާއި ޑޮލަރުން އާމްދަނީ ލިބޭ ފަރާތްތަކުން ވަކި ޚާއްޞަ (ޑެސިގްނޭޓެޑް) އެކައުންޓުތަކެއް ހުޅުވުމަށް އަންގާފައިވާ ކަމަށެވެ. އަދި އަންނަ އަހަރުގެ ތެރޭގައި އެކަންކަން އިތުރަށް ހަރުކަށިކޮށް ބަލަހައްޓަވާނެ ކަމަށް ވެސް ވިދާޅުވި އެވެ.

ޑޮލަރުގެ އަގު ކޮންޓްރޯލް ކުރުމަށް ފްލޯޓް ކުރުމާ ގުޅޭ ގޮތުން މެންބަރަކު ކުރެއްވި ސުވާލަކަށް ޖަވާބު ދެއްވަމުން ގަވަރުނަރު ވިދާޅުވީ، ރާއްޖޭގެ ޔޫޒަބަލް ރިޒާވް އެއް ބިލިއަން ޑޮލަރަށް ނާރަނީސް ޑޮލަރުގެ ރޭޓް ފްލޯޓް ކުރުމަކީ ރައްޔިތުންނަށް އޭގެ ނޭދެވޭ އަސަރު ވަރަށް ބޮޑަށް، ތަކެތީގެ އަގު އިންތިހާއަށް އުފުލިގެންދާނެ ކަމެއް ކަމަށެވެ. އެހެންކަމުން އެފަދަ ނިންމުމެއް މިވަގުތު ނިންމުމަށް ލަފާނުދެއްވާނެ ކަމަށް ވިދާޅުވި އެވެ.

މީގެއިތުރުން، ކުރިއަށް އޮތް ދެތިން އަހަރު ދުވަހުގެ ތެރޭގައި ޓޫރިޒަމް ދާއިރާއިން މިހާރު ޑޮލަރުން ދައްކަންޖެހޭ ބައެއް ޓެކްސްތައް ދިވެހި ރުފިޔާއިން ދެއްކޭނެ ގޮތް ހެދުމަށް ސަރުކާރާއެކު މަޝްވަރާކޮށް، އެމްއެމްއޭގެ ރޯޑްމެޕްގެ ތެރެއިން މަސައްކަތް ކުރައްވަމުން ގެންދަވާ ކަމަށް ވެސް ގަވަރުނަރު މުނައްވަރު މަޖިލީހުގެ ކޮމިޓީގައި ފާހަގަކުރެއްވި އެވެ.