މޭޔަރު ސައުދުގެ މައްޗަށް އުފުލި ދައުވާތައް އަނބުރާ ގެންދިޔުމަށް އެމްޑީޕީން ގޮވާލައިފި
ތިނަދޫ ސިޓީގެ މޭޔަރު ސައުދު ޢަލީއާ ދެކޮޅަށް ދައުލަތުން އުފުލާފައިވާ ޖިނާއީ ދައުވާތަކަކީ ސިޔާސީ ނިޔަތެއްގައި ކުރާ ދައުވާތަކެއް ކަމަށް ބުނެ، އެ ދައުވާތައް އަނބުރާ ގެންދިޔުމަށް އެމްޑީޕީން މިއަދު ގޮވާލައިފިއެވެ.
ޤާނޫނުލްޢުޤޫބާތުގެ ދަށުން ސައުދު ޢަލީގެ މައްޗަށް ދައުލަތުން ކޮށްފައިވަނީ ދެ ދައުވާއެކެވެ. އެއީ އެނގިހުރެ ޞައްޙަ ނޫން ލިޔެކިޔުމެއް ދިނުމުގެ ދައުވާއާއި ރަސްމީ އިދާރާއަކަށް ދޮގު މަޢުލޫމާތު ފޯރުކޮށްދިނުމުގެ ދައުވާއެވެ. މި ދެ ދައުވާ ވެސް ބިނާވެފައި އޮތީ ތިނަދޫ ކައުންސިލުން ނިންމި ނިންމުމަކާ ގުޅިގެންނެވެ. އެމްޑީޕީން ނެރުނު ބަޔާނެއްގައި ބުނީ ކައުންސިލް ނިންމުމެއްގެ ޒިންމާ ފަރުދީ ގޮތެއްގައި ސައުދު ޢަލީ އުފުލައި އޭނާގެ މައްޗަށް ޖިނާއީ ދައުވާ ކުރުމަކީ ޤާނޫނުއަސާސީއާއި ޤާނޫނީ ޢާންމު އުސޫލުތަކާ ފުށުއަރާ ކަމެއް ކަމަށެވެ.
އެމްޑީޕީން ބުނީ ފުލުހުންނާއި ޕީޖީ އޮފީހުން މި މައްސަލައިގައި ޢަމަލުކޮށްފައިވަނީ އެހެން މައްސަލަތަކާ ޚިލާފަށް އާދަޔާ ޚިލާފު ހަލުވިމިނެއްގައި ކަމަށެވެ. ހަމައެއާއެކު ކްރިމިނަލް ކޯޓުން ވެސް، އެހެން ޤަޟިއްޔާތަކާ ތަފާތުކޮށް، ވީ އެންމެ އަވަހަކަށް މި މައްސަލައިގައި ޙުކުމް ކުރުމަށް އަމާޒުހިފާފައިވާ ކަން ފާހަގަކުރެވޭ ކަމަށް ވެސް އެ ޕާޓީން ބުނެފައިވެއެވެ. އެމްޑީޕީން ބުނި ގޮތުގައި ދައުލަތުން މި ދައުވާތައް ސާބިތުކުރުމަށް އެކަށީގެންވާ ހެކި ހުށަހަޅާފައެއް ނުވެއެވެ.
މީގެ އިތުރުން އެ ޕާޓީން ފާހަގަކޮށްފައިވާ ގޮތުގައި، ސައުދު ޢަލީ އަލުން މޭޔަރުކަމަށް ހޮވުނަސް މަޤާމު ގެއްލުވާލައި ޖަލަށް ލާނެ ކަމުގެ އިންޒާރު، ޕީއެންސީގެ މެންބަރު އަދި ތިނަދޫ އުތުރު ދާއިރާގެ މެންބަރު ސަޢުދުﷲ ޙިލްމީ ޢާންމު ތަނެއްގައި ދީފައިވެއެވެ. އެ އިންޒާރު ދިންތާ ކުޑަ ދުވަސްކޮޅެއްގެ ތެރޭގައި ދައުވާ ހުށަހަޅާފައިވާ ކަން ވެސް އެ ޕާޓީން ފާހަގަކޮށްފައިވެއެވެ.
އެމްޑީޕީން ބުނީ އެ ޕާޓީން ދެކޭ ގޮތުގައި މި ފިޔަވަޅުތަކުގެ ހަޤީޤީ ބޭނުމަކީ ޤާނޫނުއަސާސީގެ 26 ވަނަ މާއްދާގެ (ނ) ގެ ދަށުން ތިނަދޫ ރައްޔިތުން އިންތިޚާބުކޮށްފައިވާ މޭޔަރުގެ މަޤާމު ގެއްލުވާލުމެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
