އިއާދަކުރަނިވި ހަކަތަ އުފެއްދުމާއި ރައްކާކުރާ ނިޒާމުތަކަށް ރާއްޖެއަށް އިންވެސްޓްމަންޓްތައް ބޭނުންވޭ: ރައީސް

އިއާދަކުރަނިވި ހަކަތަ އުފެއްދުމާއި ހަކަތަ ރައްކާކުރާ ނިޒާމުތަކަށް ދިވެހިރާއްޖެއަށް އިންވެސްޓްމަންޓްތަކާއި އެހީތެރިކަން ބޭނުންވާކަމަށް ރައީސުލްޖުމްހޫރިއްޔާ ޑރ.މުއިއްޒު ވިދާޅުވެއްޖެއެވެ.
ތުރުކީގެ އަންތާލިއާގައި ކުރިއަށް ގެންދާ "ކޮޕް 31" ސަމިޓްގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، ރާއްޖެއަށް ބަލާއިރު ހަކަތައިގެ ރައްކާތެރިކަން ކަށަވަރުކުރުމާއި، އިގްތިސާދު ހިމާޔަތްކުރުމުގެ އިތުރުން ރައްޔިތުންނަށް އިތުބާރުހުރި ގޮތެއްގައި ހަކަތަ ފޯރުކޮށްދިނުމަކީ ކޮންމެހެން ބޭނުންތެރި ކަމެއް ކަމަށެވެ. އަދި ރާއްޖެއަކީ ބޭރުން އެތެރެކުރާ ތެލަށް ބޮޑުތަނުން ބަރޯސާވާ ގައުމަކަށް ވާތީ، ދުނިޔޭގެ ބާޒާރުގައި ތެލުގެ އަގަށް އަންނަ ލޮޅުންތަކުގެ ސަބަބުން ގައުމަށް ކުރިމަތިވާ ނުރައްކާތައް ކުޑަކުރުމަކީ ގައުމީ ފެންވަރުގައި އެންމެ އިސްކަންދޭ އެއް އަމާޒު ކަމުގައި އެމަނިކުފާނު ފާހަގަކުރެއްވިއެވެ.

ރައީސްގެ ވާހަކަފުޅުގައި، 2023 ވަނަ އަހަރު ރާއްޖޭގެ ކަރަންޓުގެ 33 އިންސައްތައަކީ އިއާދަކުރަނިވި ހަކަތައިން އުފައްދާ ކަރަންޓު ކަމުގައި ހެދުމަށް ރާއްޖެއިން ކަނޑައެޅި ލަނޑުދަނޑި ހަނދާންކޮށްދެއްވިއެވެ. މި ލަނޑުދަނޑި ހާސިލުކުރުމަށްޓަކައި، ރަށްރަށުގައި ފުޅާ ދާއިރާއެއްގައި އިއާދަކުރަނިވި ހަކަތަ ބޭނުންކުރުމަށް އެކަށޭނަ ހަކަތަ ރައްކާކުރާ ނިޒާމުތަކަށް ބޮޑެތި އިންވެސްޓްމަންޓްތައް ބޭނުންވާކަން އެމަނިކުފާނު ބަޔާންކުރެއްވިއެވެ.

ނަމަވެސް، މި ބަދަލު ގެނައުމުގައި ދިމާވާ ބޮޑެތި ގޮންޖެހުންތައް ވެސް ރައީސް ހިއްސާކުރެއްވިއެވެ. އެގޮތުން ރާއްޖޭގެ ރަށްތައް ޖިއޮގްރަފީ ގޮތުން ވަކިވަކިން އުފެދިފައިވުމުގެ ސަބަބުން، ހަކަތައިގެ އުމްރާނީ ވަސީލަތްތައް ގާއިމުކޮށް ބެލެހެއްޓުމަށް ހިނގާ ޚަރަދު އެހެން ބޮޑެތި ގައުމުތަކާ އަޅާބަލާއިރު އެތައް ގުނައެއް ބޮޑުކަން އެމަނިކުފާނު ފާހަގަކުރެއްވިއެވެ.

މި ގޮންޖެހުންތަކުން އަރައިގަތުމަށްޓަކައި، 2024 އިން 2033 އަށް ދިވެހިރާއްޖޭގެ ހަކަތައިގެ ދާއިރާއަށް ޚާއްސަ ރޯޑްމެޕެއް އެކުލަވާލާފައިވާކަން ރައީސް އިއުލާނުކުރެއްވިއެވެ. މި ރޯޑްމެޕަކީ ތެލަށް ބަރޯސާވާ މިންވަރު ކުޑަކޮށް، ދެމެހެއްޓެނިވި، ޚަރަދު ކުޑަ އަދި ވަރުގަދަ އިއާދަކުރަނިވި ނިޒާމަކަށް ރާއްޖެ ބަދަލުކުރުމަށް އެކުލަވާލެވިފައިވާ ފުރިހަމަ އޮނިގަނޑެއް ކަމަށް ވިދާޅުވިއެވެ. އެހެންކަމުން، ލުއި ގޮތްގޮތަށް ފައިނޭންސް ލިބޭނެ މަގުތަކާއި، ޒަމާނީ ޓެކްނޮލޮޖީ އަދި ހަކަތައިގެ އިންފްރާސްޓްރަކްޗާއަށް އިންވެސްޓްކުރުމަށް ބައިނަލްއަގުވާމީ މުޖުތަމައުއަށް ރައީސް ގޮވާލެއްވިއެވެ.

ވާހަކަފުޅު ނިންމަވާލައްވަމުން ރައީސް ޑރ. މުއިއްޒު ވިދާޅުވީ، ދުނިޔޭގެ ހަކަތައިގެ ދާއިރާއަށް ގެންނަ ބަދަލުތަކުގެ ކާމިޔާބީ މިނެކިރޭނީ ހަމައެކަނި ކަނޑައަޅާ އުންމީދުތަކުން ނޫން ކަމަށާއި، އެކަންކަން އަމަލީ ގޮތުން ތަންފީޒުކުރުމުގެ ގާބިލުކަމުގެ މައްޗަށް ކަމަށެވެ. އަދި ސާފު، ރައްކާތެރި ހަކަތައިގެ މުސްތަގުބަލެއް ބިނާކުރުމުގައި ރާއްޖެ ސާބިތުކަމާއެކު ދެމިއޮންނާނެ ކަމުގެ ޔަގީންކަން އަރުވަމުން، މި ލަނޑުދަނޑިތައް ހާސިލުކުރުމަށް ބައިނަލްއަގުވާމީ ބައިވެރިންނާއެކު ގާތުން މަސައްކަތްކުރުމަށް ރާއްޖެ ތައްޔާރަށް އޮތްކަން އެމަނިކުފާނު ހާމަކުރެއްވިއެވެ.