ސާފް ޗެމްޕިއަންޝިޕްގައި އިންޑިއާ ކޯޗްގެ ޝަކުވާއަކީ ކޮއްތުގެ މައްސަލަ

ސާފް ޗެމްޕިއަންޝިޕްގައި ޖެހިޖެހިގެން ދެ މެޗުން މޮޅުވެ އިންޑިއާ ސެމީ ފައިނަލުން ޖާގަ ކަށަވަރުކުރި ނަމަވެސް، މުބާރާތުގެ ބައެއް އިންތިޒާމުތަކާ މެދު ހިތްހަމަ ނުޖެހޭކަމަށް ބުނެ ޓީމުގެ ކޯޗު ނައުޝާދު މޫސާ ޝަކުވާކޮށްފިއެވެ.

ބުދަ ދުވަހު ރާއްޖެއާ ދެކޮޅަށް ކުޅުނު މެޗުން 1-0 އިން މޮޅުވުމަށްފަހު ވާހަކަދައްކަމުން މޫސާ ބުނީ، މެހެމާންދާރީގެ އެހެން ކަންކަން ރަނގަޅު ނަމަވެސް ކާބޯތަކެތީގެ މައްސަލަ ވަރަށް ބޮޑު ކަމަށެވެ. ހާއްސަކޮށް މެޗުތަކަށްފަހު ކުޅުންތެރިންނަށް ބޭނުންވާ ފެންވަރުގެ ކާނާ ނުލިބޭ ކަމަށާއި، ކޮންމެ ދުވަހަކު ލިބެނީ އެއް ބާވަތްތަކެއްގެ ކެއުން ކަމަށް އޭނާ ފާހަގަކުރިއެވެ.

މި މައްސަލައިގައި ރާއްޖޭގެ ކޯޗު އިސްޓްވާން އުރުބާނީ ވެސް ވަނީ ކަންބޮޑުވުން ފާޅުކޮށްފައެވެ. އުރުބާނީ ބުނި ގޮތުގައި ކުރިން ރާއްޖޭގައި ބޭއްވުނު ސާފްގެ މުބާރާތްތަކުގައި ޓީމުތަކަށް ދީފައިވާ ފަސް ތަރީގެ ހިދުމަތްތަކާ އަޅާބަލާއިރު، މިފަހަރުގެ އިންތިޒާމުތައް ފެންނަނީ ވަރަށް ފަހަތުގައެވެ.

މުބާރާތް ހިންގުމުގެ ޒިންމާ ނަގާފައިވާ ސާފް އާއި ލޮޖިސްޓިކް ކަންކަމާ ހަވާލުވެފައިވާ ބަންގްލަދޭޝް ފުޓްބޯޅަ ފެޑެރޭޝަނާ ދެމެދު މަސްއޫލިއްޔަތުތައް ބެހިފައިވާ ގޮތާ މެދުވެސް މިހާރު ވަނީ ސުވާލު އުފެދިފައެވެ. އިންޑިއާ ޓީމުން ބުނާ ގޮތުގައި ހެނދުނުގެ ނާސްތާގެ މައްސަލަ މިހާރު ހައްލުވެފައިވީ ނަމަވެސް، މެންދުރުގެ އަދި ރޭގަނޑުގެ ކެއުމުގެ ކަންކަން ރަނގަޅު ކުރުމަށް އަދިވެސް ދަނީ މަޝްވަރާ ކުރަމުންނެވެ.

ޓީމަށް ދިމާވެފައިވާ ކުޅުންތެރިންގެ މަދުކަމާއި އިންތިޒާމުތަކުގެ ދަތިކަމާ އެކުވެސް، ކޯޗު މޫސާ ބުނީ އޭނާގެ ހުރިހާ ސަމާލުކަމެއް މިހާރު ހުރީ ކުރިއަށް އޮތް ސެމީ ފައިނަލް މެޗަށް ކަމަށެވެ. އިންޑިއާ ސެމީގައި ބައްދަލުކުރާނެ ޓީމެއް އެނގޭނީ ބަންގްލަދޭޝް އާއި ސްރީލަންކާ ބައްދަލުކުރާ މެޗުގެ ނަތީޖާއަށް ފަހުގައެވެ.