ތިނަދޫ އިސްލާމީ މަރުކަޒު އިސްލާމީ ޙަޟާރަތާއި ޘަޤާފަތުގެ މަރުކަޒަކަށް ބަދަލު ކުރަނީ

ގދ ތިނަދޫ ގައި ރައީސް ޢަބްދުﷲ ޔާމިން ޢަބްދުލް ޤައްޔޫމްގެ ޒައާމަތުގައި ބިނާ ކުރެއްވި އިސްލާމިކް މަރުކަޒު އިސްލާމީ ޙަޟާރަތާއި ޘަޤާފަތުގެ މަރުކަޒަކަށް ބަދަލު ކުުރުމަށް ނިންމަވާފައިވާކަމަށް އިސްލާމިކް މިނިސްޓަރ ޑރ މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

އިސްލާމިކް މިނިސްޓާރުގެ މަޤާމާއި ހަވާލުވެ ވަޑައިގެންނެވުމަށް ފަހު ޑރ ޝަހީމް ސޯޝަލް މީޑިއާގައި ކުރައްވައިފައިވަ ޕޯސްޓެއްގައި ވިދާޅުވެފައިވަނީ ތިނަދޫ އިސްލާމީ މަރުކަޒު، އިސްލާމިކް ޔުނިވަސިޓީ (އައިޔޫއެމް)ގެ ދަށަށް ބަދަލުކުރައްވަަން ނިންމަވާ ކަމަށެވެ.

އަދި އެކަމުގެ ސަބަބުން އިސްލާމީ ޢިލްމު އުނގެން ބޭނުންވާ ދަރިވަރުން އެ ސަރަހައްދުން މާލެ ނައިސް ކިޔެވޭނެ ގޮތް ފަހިވާނެ ކަމަށް ޝަހީމް ވިދާޅުވި އެވެ. އަދި އެމަރުކަޒު އިސްލާމީ ޙަޟާރަތާއި ޘަޤާފަތަކަށް ވެގެންދާނެ ކަމަށް ޑރ ޝަހީމް ވިދާޅުވެފައިވެއެވެ.

މީގެ އިތުރުން ރާއްޖޭގެ މިސްކިތްތަކުގެ އިމާމުންގެ ތެރެއިން، އިސްލާމީ ޢިލްމުގެ ދާއިރާއަކުން މާސްޓަރ ޙާޞިލްކޮށްފައިވާ ފަރާތްތަކަށް ބޭރުގެ ޔުނިވަރސިޓީ އަކުން ޕީއެޗްޑީ ހެދުމުގެ ފުރުޞަތު ފަހިކޮށްދިނުމުގެ މަޝްރޫޢެއް ވަރަށް އަވަހަށް އިޢުލާންކުރާނެ ކަމަށް ޑރ ޝަހީމް މިއަދު ވިދާޅުވެފައިވެއެވެ.

އަދިހަމަ މިއާއި އެކު މިޞްރާއި ސަޢުދީ އަރަބިއްޔާއާއި މެލޭޝިޔާއާއި ބުރޫނާއި އަދި އިންޑޮނޭޝިޔާއިން ތަމްރީނުގެ ފުރުޞަތު އިމާމުންނަށް ހޯދައިދެއްވާނެ ކަމަށް ވެސް ޑރ ޝަހީމް ވަނީ ވިދާޅުވެފައެވެ.