އައިޔޫއެމްގެ"ލީގަލް ކްލިނިކް" އިފްތިތާޙްކޮށްފި؛ ހިލޭ ގާނޫނީ އެހީތެރިކަން ލިބޭނެ
ދިވެހިރާއްޖޭގެ އިސްލާމީ ޔުނިވަރސިޓީ (އައިޔޫއެމް)ގެ އަހަރީ ދުވަހުގެ މުނާޞަބަތުގައި "އައިޔޫއެމް ލީގަލް ކްލިނިކް" ރަސްމީކޮށް އިފްތިތާޙްކޮށްފިއެވެ.
މިއީ އެ ޔުނިވަރސިޓީގެ ކުއްލިއްޔާ އޮފް ޝަރީޢާ އެންޑް ލޯގެ ފަރާތުން އިންތިޒާމުކޮށްގެން ހުޅުވި ކްލިނިކެކެވެ. މި ކްލިނިކް ޤާއިމްކުރުމުގެ މައިގަނޑު މަޤްޞަދަކީ ޤާނޫނީ ވަކީލަކަށްވުމަށް ބޭނުންވާ ދަރިވަރުން ތަމްރީންކުރުމާއި، ރާއްޖޭގައި ވަކާލާތުކުރުމުގެ ލައިސަންސް ލިބިފައިވާ ޤާނޫނީ ވަކީލުންގެ އިރުޝާދުގެ ދަށުން ޢާންމުންނަށް ބޭނުންވާ ޤާނޫނީ އެހީތެރިކަން ފޯރުކޮށްދިނުމެވެ. ޒަމާނީ ވަޞީލަތްތަކާއެކު ޤާއިމްކޮށްފައިވާ މި ކްލިނިކަކީ ޢާންމު ރައްޔިތުންނަށް ލިބިގެންދާނެ ވަރަށް ބޮޑު ލުޔެކެވެ.
އައިޔޫއެމް ލީގަލް ކްލިނިކުން ފޯރުކޮށްދޭ ޚިދުމަތްތަކުގެ ތެރޭގައި، އެކިއެކި މައްސަލަތަކުގައި ޤާނޫނީ ލަފާ ދިނުމާއި، މައްސަލަތަކާ ގުޅޭ ލިޔުންތަކާއި ފޯމުތައް ތައްޔާރުކުރުން ހިމެނެއެވެ. މީގެ އިތުރުން، އެކި ބާވަތުގެ އެއްބަސްވުންތައް އެކުލަވާލުމާއި، ޕަވަރ އޮފް އެޓަރނީ ފަދަ ލިޔުންތައް ތައްޔާރުކޮށްދިނުމުގެ ޚިދުމަތްވެސް މި ކްލިނިކުން ލިބިގެންދާނެއެވެ.
ފާހަގަކޮށްލެވޭ އެންމެ މުހިންމު އެއް ކަމަކީ، މި ހުރިހާ ޚިދުމަތްތަކަކީވެސް އެއްވެސް ފީއެއް ދައްކަން ނުޖެހޭ، މުޅިން ހިލޭ ޢާންމުންނަށް ހުޅުވާލެވިފައިވާ ޚިދުމަތްތަކެއް ކަމެވެ.
މި ކްލިނިކްގެ މަސައްކަތްތައް ކުރިއަށްދާނެ ގޮތާ ގުޅޭގޮތުން ޔުނިވަރސިޓީން މަޢުލޫމާތު ދޭ ގޮތުގައި، ޢާންމު ފަރާތަކުން ޤާނޫނީ އެހީތެރިކަން ބޭނުންވާ މައްސަލައެއް ހުށަހެޅުމުން، އެ މައްސަލަ ދިރާސާކުރުމަށްޓަކައި ތަޖުރިބާކާރު ޤާނޫނީ ވަކީލެއްގެ ބެލުމުގެ ދަށުން ދަރިވަރުންގެ ޓީމެއް ޢައްޔަންކުރެވޭނެއެވެ. އަދި އޭގެ ފަހުން ޤާނޫނީ ވަކީލާއެކު ބައްދަލުވުން އިންތިޒާމްކޮށްމައްސަލަ ހުށަހެޅި ފަރާތާއެކު އައިޔޫއެމް ލީގަލް ކްލިނިކްގައި ބައްދަލުކޮށް ޤާނޫނީ ލަފާދެވޭނެއެވެ.
މިއީ ޤާނޫނީ ވަކީލެއްގެ އެހީތެރިކަން ބޭނުންވާ ޢާންމުންނަށް އެ ޔުނިވަރސިޓީގެފަރާތުން ހުޅުވާލެވިގެންދާ ފަހި ފުރުޞަތެކެވެ.
އައިޔޫއެމް ލީގަލް ކްލިނިކަށް މައްސަލައެއް ހުށަހަޅަން ބޭނުންނަމަ، އެކަމަށްޓަކައިޙާއްސަކޮށްފައިވާ ގޫގްލް ފޯމް މެދުވެރިކޮށް މައްސަލަ ހުށަހެޅޭނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
