ޒުވާނުން ލޭ ހަދިޔާކުރުމަށް ބާރުއެޅުމަށް "ބްލަޑް ހީރޯސް އީ.އޭ.އެފް.ސީ" މުބާރާތް ބާއްވަނީ

ރަމަޟާން ބްލަޑް ކޭމްޕް 1447 ގެ ހަރަކާތްތަކުގެ ތެރެއިން، ޒުވާނުން ލޭ ހަދިޔާކުރުމަށް ހޭލުންތެރިކުރުވުމުގެ މަގުސަދުގައި "ބްލަޑް ހީރޯސް އީ.އޭ.އެފް.ސީ" ވީޑިއޯ ގޭމް މުބާރާތް ބޭއްވުމަށް ނިންމައިފިއެވެ.

މި މުބާރާތް ބޭއްވުމަށް ހަމަޖެހިފައިވަނީ 12 މާރިޗު ވާ ބުރާސްފަތި ދުވަހުގެ ރޭގަނޑު 20:30 ގައި، މޯލްޑިވިއަން ބްލަޑް ސަރވިސަސްގެ އޮރެންޖު ހިޔާގައެވެ.

މި މުބާރާތަކީ "ލޭ އެޕް" އާއި އެމް.އެން.ޔޫ މެޑިކޯސް، ރިޕަބްލިކް އޮފް ޑޯނާސް، ބްލަޑް ޑޯނާސް އެމް.ވީ، އެހީ، މޯލްޑިވިއަން ތެލެސީމިއާ ސޮސައިޓީ އަދި މޯލްޑިވިއަން ބްލަޑް ސަރވިސަސް ގުޅިގެން ކުރިއަށްގެންދާ ހަރަކާތެކެވެ.

މިއީ މުޖުތަމައަށް ފައިދާހުރި މަސައްކަތަކާއެކު ގޭމް ކުޅުމުގެ މަޖާ މާހައުލެއް ޒުވާނުންނަށް ހޯދައިދިނުމަށް ބާއްވާ މުބާރާތެކެވެ.

މި މުބާރާތުގައި ބައިވެރިވެވޭނީ އުމުރުން 18 އަހަރުން މަތީގެ ފަރާތްތަކަށެވެ. ނޮކްއައުޓް އުސޫލުން ކުރިއަށްދާ މި މުބާރާތުގެ މޮޅުވާ ފަރާތަކަށް 1,000 ރުފިޔާގެ ފައިސާގެ އިނާމެއް ވަނީ ހުށަހަޅާފައެވެ.

މި ހަރަކާތް އިންތިޒާމުކުރާ ފަރާތްތަކުން ބުނިގޮތުގައި، މި މުބާރާތުގެ މައިގަނޑު މަގުސަދަކީ ލޭ ހަދިޔާކުރުމަކީ އެންމެންގެ އެއްބާރުލުމާއެކު ކުރެވޭނެ މުހިންމު ކަމެއްކަން ޒުވާނުންނަށް ބުނެދިނުމެވެ. އަދި ޒުވާނުންގެ މެދުގައި ލޭ ހަދިޔާކުރާ މީހުންގެ މުޖުތަމައަކަށް އޮންނަ ލޯބި އިތުރުވެގެންދާނެ ކަމަށް އުންމީދުކުރާ ކަމަށްވެސް އިންތިޒާމުކުރާ ފަރާތްތަކުން ބުންޏެވެ.

މި އަހަރަކީ "ރަމަޟާން ބްލަޑް ކޭމްޕް" ބާއްވާ ދެވަނަ އަހަރެވެ. މި ކޭމްޕަކީ ގިނަ އަދަދެއްގެ ވޮލަންޓިއަރުންގެ އެހީތެރިކަމާއެކު ކުރިއަށްގެންދާ މުހިންމު ހަރަކާތެކެވެ.

މި މުބާރާތުގެ ގޭމިންގ ބައި ކުރިއަށްގެންދިއުމަށް "އޫރީދޫ ނޭޝަން" އިން ދެމުންގެންދާ އެހީތެރިކަން އިންތިޒާމުކުރާ ފަރާތްތަކުން ވަނީ ޝުކުރުވެރިކަމާއެކު ފާހަގަކޮށްފައެވެ.