ގދ ތިނަދޫ އިސްލާމީ މަރުކަޒު އިސްލާމީ ޔުނިވަރސިޓީއާއި ހަވާލުކޮށްފި

ކުރީގެ ރައީސް އަބްދުالله ޔާމީން ޢަބްދުލް ޤައްޔޫމްގެ ވެރިކަމުގައި ގދ ތިނަދޫގައި ޤާއިމްކުރި އިސްލާމީ މަރުކަޒު، ދިވެހިރާއްޖޭގެ އިސްލާމީ ޔުނިވަރސިޓީގެ ގޮތްޕެއްގެ ގޮތުގައި ހަމަ ޖައްސައި ރަސްމީކޮށް އެ ޔުނިވަރސިޓީއާއި ހަވާލުކޮށްފިއެވެ.

ތިނަދޫ އިސްލާމީ މަރުކަޒު އިސްލާމީ ޔުނިވަރސިޓީއާއި ހަވާލުކޮށްފައިވަނީ އެކަމަށްޓަކައި އިސްލާމީ ޔުނިވަރސިޓީގައި ބޭއްވި ޚާއްސަ ރަސްމިއްޔާތެއްގައެވެ. ރަސްމީކޮށް ތިނަދޫ އިސްލާމީ މަރުކަޒު އިސްލާމީ ޔުނިވަރސިޓީގެ ގޮތްޕެއްގެ ގޮތުގައި ކަނޑައަޅަށް އެ ޔުނިވަރސިޓީއާއި ހަވާލުކޮށްދެއްވީ، އިސްލާމިކް މިނިސްޓަރ ޑރ މުޙައްމަދު ޝަހީމް އާލީ ސަޢީދެވެ.

މިއަދު ސޮއި ކުރެވުނު އެއްބަސްވުމާއެކު 10 އަހަރު ދުވަހުގެ މުައްދަތަކަށް ގދ ތިނަދޫ އިސްލާމީ މަރުކަޒު، ދިވެހިރާއްޖޭގެ އިސަލާމީ ޔުނިވަރސިޓީއާއި ޙަވާލުކުރެވިގެންދާނެއެވެ.

މި ރަސްމިއްޔާތުގައި ވާހަކަދައްކަވަމުން އިސްލާމީ ޔުނިވަރސިޓީގެ ވައިސް ޗާންސެލަރުގެ މަޤާމަށް އަލަށް ޢައްޔަނުކުރެެއްވި ޑރ އަލީ ޒާހިރު ވިދާޅުވީ ތިނަދޫ އިސްލާމީ މަރުކަޒަކީ އިސްލާމީ ޔުނިވަރސިޓީގެ ގޮތްޕެއްގެ ގޮތުގައި ކަނޑައެޅުމާއެކު ޔުނިވަރސިޓީގެ  ކޯސްތައް އެ ސަރަހައްދުގައި ހިންގައި ފުޅާކުރުމަށް ދިމާވަމުންއައި ދަތިތަކަށް ޙައްލެއް ލިބިގެންދާނެ ކަމުގައެވެ.

ތިނަދޫގައި ކިޔަވައިދިނުމުގެ މަސައްކަތް އަޅުގަނޑުމެން އެބަ ކުރަން، އެހެން ނަމަވެސް އަޅުގަނޑުމެންނަށް އެކަމުގައި ހުރި ބައެއް ކަހަަލަ ދަތި ކަންކަން، އަޅުގަނޑުމެންގެ ތަނެއް ނެތުމުގެ ސަބަބުން ދިމާވާ ދަތިތައް، މާތް الله ގެ އިރާދަފުޅާއެކުގައި މިއަދުގެ މި އެއްބަސްވުމުގެ ދަށުން ފިލައިގެންދާނެ

ޑރ އަލީ ޒާހިރު

މީގެ އިތުރުން މި ރަސްމިއްޔާތުގައި ވާހަކަ ދައްކަވަމުން އިސްލާމިކް މިނިސްޓަރ ޑރ މުޙައްމަދު ޝަހީމް އާލީ ސަޢީދު ވިދާޅުވީ އިސްލާމީ ޔުނިވަރސިޓީއަކީ ރަސްމީކޮށް އެ މިނިސްޓްރީގެ ބެލެނިވެރިކަމުގައިވާ ތަނެއްކަމުގައި ނުވީ ނަމަވެސް، އަބަދުވެސް އެ މިނިސްޓްރީގެ އެއްބަނޑު އެއްބަފާ މުއައްސަސާއެއްގެ ގޮތުގައި އެ ޔުނިވަރސިޓީއާއެކު ދެކިވަޑައިގަންނަވާނެކަމަށެވެ.

އަދި މީގެ އިތުރުން މިހާރުގެ ސަރުކާރުގެ ގިނަ އިސްވެރިންތަކެއްވެސް އެ ފުރާޅެއްގެ ދަށުން ތަޢުލީމު ޙާސިލްކުރެއްވި ތަނެއްގެ ގޮތުގައި އިސްލާމީ ޔުނިވަރސިޓީ ފާހަގަކުރައްވަމުން މިނިސްޓަރ ވަނީ، އިސްލާމީ ޔުނިވަރސިޓީއަށް ހެޔޮ ގޮތްތަކާއި ކުރިއެރުންތައް ހޯދައިދިނުމަށް އަބަދުވެސް މަސައްކަތް ކުރައްވާނެ ކަމުގެ ފުރިހަމަ ޔަގީންކަން އަރުވައިފައެވެ.