ރާއްޖޭގައި ބޭއްވި ފުރަތަމަ މޮކް ޓްރައިލް މުބާރާތުގެ ޗެމްޕިއަންކަން "ވެރިޓަސް ވިންސިޓް"އަށް

ދިވެހިރާއްޖޭގެ އިސްލާމީ ޔުނިވާސިޓީ (އައިޔޫއެމް)ގެ ލޯ ސޮސައިޓީއިން އިންތިޒާމުކޮށްގެން ދިވެހިރާއްޖޭގެ ޔުނިވާސިޓީ އަދި ކޮލެޖްތަކަށް ހުޅުވާލާގެން ބޭއްވި ފުރަތަމަ މޮކް ޓްރައިލްގެ ޗެންޕިއަންކަން އައިޔޫއެމްގެ ވެރިޓަސް ވިންސިޓް އިން ހޯދައިފިއެވެ.

އޮގަސްޓު މަހުގެ 23 އަދި 30 ވަނަ ދުވަހު ކުރިއަށް ދިޔަ މި މުބާރާތުގައި ޖުމްލަ ހަތަރު ޓީމުންވާދަކުރިއެވެ. މީގެތެރޭގައި ދިވެހިރާއްޖޭގެ އިސްލާމީ ޔުނިވަރސިޓީ، (އައިޔޫއެމް)ގެ ދެ ޓީމަކާއި، ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ.) ގެ ދެ ޓީމު ހިމެނެއެވެ.

މުބާރަތުގެ މަޤުސަދަކީ ދިވެހިރާއްޖޭގެ ޔުނިވާސިޓީ އަދި ކޮލެޖްތަކުން ޝަރީޢާ އަދި ޤާނޫނު ކިޔަވާ ދަރިވަރުން ކޯޓު ތަކުގެ މައުހާލަށް އަހުލުވެރި ކުރުވުމާއި، މިދާއިރާގައި މަސައްކަތް ކުރަމުން އަންނަ ފަރާތްތަކާއެކު މަސައްކަތް ކޮށް ތަޖުރިބާ ހާސިލް ކުރުމުގެ މަގު ފަހި ކޮށްދިނުން ކަމަށް އައިޔޫއެމްގެ ލޯ ސޮސައިޓީން މައުލޫމާތު ދެއެވެ. މީގެ އިތުރުން ދަރިވަރުންގެ މެދުގައި ޝަރުޢީ ދާއިރާއަށް ޝައުގުވެރިކަން އުފެއްދުންވެސް ހިމެނެއެވެ.

ވާދަވެރި މާޙައުލެއްގައި ކުރިއަށްދިޔަ މި މުބާރާތުގެ ފަހުބުރުގައި އެމްއެންޔޫގެ ”ޓީމް ބްރައުންލީ“ އާ ވާދަކޮށް ޗެމްޕިއަންކަން ހޯދާފައިވަނީ އައި.ޔޫ.އެމް.ގެ ”ވެރިޓަސް ވިންސިޓް“ ޓީމުން ނެވެ.

މުބާރާތުގެ ވަނަވަނައަށް އައި ފަރާތްތައް

1. ބެސްޓް ވިޓްނަސް؛ ޢައިޝަތު ޢަލީ (ޓީމް ބްރައުންލީ)

2. ބެސްޓް އޮބްޖެކްޝަން އެންޑް ރެސްޕޮންސް އެޑްވޮކޭޓް؛ ނަޒްމީން ނިޒާަމް، (ޓީމް އެކުއިޓަސް)، ޒީބާ އަބްދުالله ސަލީމް (ވެރިޓަސް ވިންސިޓް)، ޢަލީ ރިފާޢު (ވެރިޓަސް ވިންސިޓް)

3. ބެސްޓް ކްރޮސް އެގްޒެމިނާ؛ ޢަލީ ރިފާޢު (ވެރިޓަސް ވިންސިޓް)

4. ބެސްޓް ޑައިރެކްޓް އެގްޒެމިނާ؛ ޢަލީ ރިފާޢު (ވެރިޓަސް ވިންސިޓް)

5. ބެސްޓް ޑިފެންސް ލޯޔާ؛ ޒީބާ އަބްދުالله ސަލީމް (ވެރިޓަސް ވިންސިޓް)

6. ބެސްޓް ޕްރޮސެކިޔުޓާ؛ ނަޒްމީން ނިޒާަމް (ޓީމް އެކުއިޓަސް)، މަރްޔަމް މީޝާ މުޙައްމަދު (ޓީމް އެކުއިޓަސް)

މުބާރާތް ނިންމުމުގެ ރަސްމިއްޔާތު ޝަރަފުވެރިކޮށްދެއްވީ ބާ ކައުންސިލްގެ ރައީސް ޙުސައިން ސިރާޖެވެ. ސިރާޖުގެ އިތުރުން ދިވެހިރާއްޖޭގެ އިސްލާމީ ޔުނިވަރސިޓީގެ ޑެޕިއުޓީ ވައިސް ޗާންސެލަރުން ކަމަށްވާ އަޙްމަދު އަމީން މުޙައްމަދާއި، ޑރ. އައިޝަތު ވަޙީދާއާއި، ޑރ. ވިސާލް މޫސާއާއި، ސުޕްރީމް ކޯޓުގެ ފަނޑިޔާރު ޙުސައިން ޝަހީދާއި، ހައިކޯޓުގެ ފަނޑިޔާރު މުޙައްމަދު ފައިސަލް އަދި ކޯޓުތަކުގެ ގިނަ ޢަދަދެއްގެ ފަނޑިޔާރުން ބައިވެރިވެވަޑައިގެންނެވިއެވެ.

ރަސްމިއްޔާތުގައި ވާހަކަ ދައްކަވަމުން، ޙުސައިން ސިރާޖު ވަނީ މިފަދަ މުބާރާތްތަކަކީ އޭގެ ސަބަބުން ޢަދުލު އިންސާފު ޤާއިމުކުރުމުގެ ދާއިރާގެ ފެންވަރު ރަނގަޅުވެގެންދާނެ ކަމެއްކަން ފާހަގަކުރައްވާފައެވެ.

އަދި އިތުރުން، ހުރިހާ ޒަމާނެއްގައިވެސް ޢަދުލު އިންސާފުގެ ނިޒާމާއި ޤާނޫނީ ނިޒާމު ނާޖާއިޒު ގޮތުގައި ބޭނުންކުރާ މީހުން އުޅޭނެކަމަށާއި، މުޖުތަމަޢުގައި ފަސާދަ އުފައްދަން އުޅޭ މީހުންވެސް އުޅޭނެކަން ފާހަގަކޮށް އޭނާ ވަނީ ޤާނޫނީ ވަކީލުންނާއި، ޤާނޫނީ ދާއިރާގައި މަސައްކަތްކުރާ މީހުން ވާންޖެހޭނީ އަބަދުވެސް ޢަދުލު އިންސާފަށް ލޯބިކުރާ ބަޔަކަށް ކަމަށް ވިދާޅުވެފައެވެ. މީގެ އިތުރުން އާެނާ ވަނީ ހުރިހާ ޤާނޫނީ ވަކީލުންވެސް އެފަދަ ބަޔަކަށްވުމަށް ނަސޭހަތްތެރިވެފައެވެ.

މި ރަސްމިއްޔާތު ނިންމާލީ ގައުމީ ސަލާމުންނެވެ.