ފާރުފުއްޓާއި ކޮތައިފަރު އެއްވަރުވެ ދަ ސްޓޭންޑާޑަށް ކުއާޓާ ޔަގީންވެއްޖެ

މީދޫ ޖަމްޢިއްޔަތުއް ޞަލާޙުގެ ފަރާތުން އިންތިޒާމްކޮށްގެން ރ. އަތޮޅުގެ ރިސޯޓްތަކަށް ހުޅުވާލައިގެން ބާއްވާ ރާއްޖޭގެ އެންމެ ބޮޑު އިންޓާ ރިސޯޓް ފުޓްސަލް ޗެލެންޖު "ރާބަދި ޗެލެންޖް 2024" ގެ ގުރޫޕް ޑީގައި ހޯމަ ދުވަހުގެ ރޭ ކުޅެވުނު ތިންވަނަ މެޗުގައި ކޮތައިފަރާއި ފާރުފުށި ވާދަކުރި މެޗު 2-2 ގެ ނަތީޖާއަކުން އެއްވަރުވެ މިގުރޫޕްގައި ހިމެނޭ ދަ ސްޓޭންޑާޑަށްް ކުއާޓާ ފައިނަލުގެ ޖާގައެއް ކަށަވަރުވެއްޖެ އެވެ.

މުބާރާތުގައި ފާރުފުށިން ކުޅުނު ފުރަތަމަ މެޗުގައި ދަ ސްޓޭންޑާޑް އަތުން 3-0 ގެ ނަތީޖާއަކުން އެޓީމު ބަލިވެފައިވާއިރު، މިއީ ކޮތައިފަރުން މުބާރަތުގައި ކުޅުނު ފުރަތަމަ މެޗެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަމަ ލަނޑުޖަހައި ކުރިހޯދީ ކޮތައިފަރުން ނެވެ. މިލަނޑު ފުރަތަމަ ހާފުގެ 6 ވަނަ މިނެޓުގައި ކާމިޔާބުކޮށްދިނީ އެޓީމުގެ މުހައްމަދު ގުސައްޔު އެވެ.

ފާރުފުށިން ނަތީޖާ އެއްވަރުކުރި ލަނޑު ފުރަތަމަ ހާފުގެ 17 ވަނަ މިނެޓުގައި ކާމިޔާބުކޮށްދިނީ އެޓީމުގެ އަބްދުﷲ ނަވާލް އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އިވެގެންނެވެ.

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިއިރު، ކޮތައިފަރުން ވަނީ މެޗުގެ 31 ވަނަ މިނެޓުގައި ލަނޑެއް ކާމިޔާބުކޮށް ފުރަތަމަ ފަހަރަށް މިމެޗުގައި ލީޑު ހޯދަފައެވެ. ނަމަވެސް އޭގެ ފަސްމިނެޓު ފަހުން ފާރުފުށީގެ ގުސައްޔު ވަނީ އިތުރު ލަނޑެއް ކާމިޔާބުކޮށް އެޓީމަށް ނަތީޖާއެއްވަރުކޮށްދީފައެވެ.

މިލަނޑާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖައަކުން ދެޓީމު އެއްވަރުވެފައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ފާރުފުށީގެ މުހައްމަދު ގުސައްޔު އެވެ.

މިނަތީޖާއެކު ގުރޫޕް ޑީ އިން ދަ ސްޓޭންޑާޑަށް ކުއާޓާގެ ޖާގައެއް ކަށަވަރުވެފައިވާއިރު، ކުޅުނު ދެމެޗުން ފާރުފުއްޓަށް ލިބުނު އެއް ޕޮއިންޓާއެކު، ލަނޑުގެ ތަފާތުން އެޓީމު މިވަގުތު އޮތީ ގުރޫޕް ޑީގެ ފުލުގައެވެ. އަދި މިމެޗުން ލިބުނު އެއް ޕޮއިންޓާއެކު ގުރޫޕްގެ ދެވަނައިގައި މިވަގުތު އޮތީ ކޮތައިފަރު އެވެ.

މީގެ އިތުރުން މިގުރޫޕްގެ ފަހު މެޗުގައި ދަ ސްޓޭންޑާޑް އާއި ކޮތައިފަރު ވާދަކުރާ މެޗު އެއްވަރުވެ، ނުވަތަ ތިން ލަނޑަށްވުރެ ކުޑަތަފާތަކުން ކޮތައިފަރު ބަލިވެ ނުވަތަ އެޓީމު މޮޅުވެއްޖެ ނަމަ މިގުރޫޕުން ކުއާޓާގެ ދެވަނަ ޖާގަ ލިބިގެންދާނީ ކޮތައިފަރަށެވެ.

މިއަހަރުގެ ރާބަދި ޗެލެންޖްގައި 14 ޓީމެއް ބައިވެރިވެފައި ވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ހަތަރު ގުރޫޕަކަށް ބަހާލައިގެންނެވެ. ގުރޫޕް އެކެއް އަދި ދޭއްގައި ހަތަރު ޓީމު ހިމެނޭ އިރު އަނެއް ދެ ގުރޫޕުގައި ހިމެނެނީ ތިން ޓީމެވެ. މުބާރާތް ކުރިއަށް ދާނީ ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެ ޓީމު ކުއާޓާ ފައިނަލަށް ހޮވޭ ގޮތަށެވެ.

ރާބަދި ޗެލެންޖް އެންމެ ފުރަތަަމަ ބާއްވާފައިވަނީ 2019 ވަނަ އަހަރު އެވެ. އެ އަހަރު މުބާރާތުގެ ފައިނަލުގައި މީދުއްޕަރު 4-3 ގެ ނަތީޖާއަކުން ބަލިކޮށް ޗެމްޕިއަންކަން ހޯދީ ދިގަލި މޯލްޑިވްސްއެވެ. އަދި އެކި ސަބަބުތަކާ ހުރެ 2020 އަދި 2021 ވަނަ އަހަރު މުބާރާތް ނުބޭއްވި ދިއުމަށް ފަހު 2022 ވަނަ އަހަރު ވަނީ އަލުން ރާބަދި ޗެލެންޖް ބާއްވަން ފައްޓާފައެވެ.