އެ ގެއްލުވާލީ ޕާޓީގެ މެންބާޝިޕް 60،000 އިތުރުކުރެވެން އޮތް ފުރުސަތު: ފައްޔާޟު

ޕާޓީގެ މެންބަރުންގެ އަދަދު 60،000 އަށް އިތުރުކުރުމަށް ލިބުނު ފުރުސަތު، ގެއްލުވާލާފައިވާ ކަމަށް ވިދާޅުވެ އެމްޑީޕީގެ ލީޑަޝިޕަށް ފައްޔާޒު ފާޑުވިދާޅުވެއްޖެއެވެ.

އެމްޑީޕީގެ ޗެއާޕާސަން ހޮވުމަށް ބާއްވާ އިންތިހާބު އަންނަ ޖޫން މަހުގެ 12 ވަނަ ދުވަހު ބޭއްވުމަށް ނިންމައި، އެ މަގާމަށް ކުރިމަތިލުމުގެ ފުރުސަތު ހުޅުވާލީ އިއްޔެއެވެ.

އެގޮތުން އިއްޔެ އެމްޑީޕީން ކުރި އިއުލާނުގައި ބުނެފައިވާގޮތުން، މި އިންތިހާބުގައި ވޯޓުލެވޭނީ ރޭ ދަންވަރު 12:00ގެ ނިޔަލަށް އެ ޕާޓީގެ މެންބަރުންގެ ގޮތުގައި ރަޖިސްޓްރީވެފައިވާ ފަރާތްތަކަށް އެކަންޏެވެ.

‏އެކަމާ ގުޅިގެން ކަންބޮޑުވުންފާޅުކިރައްވައި ފައްޔާޟު ރޭ އެކްސްގައި ކުރެއްވި ޕޯސްޓެއްގައި ވިދާޅުވީ، އެމްޑީޕީގައި 44000 މެމްބަރުން ތިއްބާ އެންމެ ދުވަހެއްގެ ތެރޭގައި އެ އަދަދު 50000 އަށް ބަދަލުވެފައިވާ ކަމަށެވެ.

”އަދި ވިސްނުންތެރިކަމާއެކު ފުރުސަތު ދީގެން މިކަން ކުރިނަމަ ޕާޓީގެ މެންބަރޝިޕް 60000 އަށް އެރުވޭނެ ފުރުަސަތު މި ގެއްލުނީ.“ ފައްޔާޒު ވިދާޅުވިއެވެ.

ފައްޔާޒު މިފަދައިން ވިދާޅުވެފައިވާއިރު، އޭނާއާއި ޗެއާޕާސަން އިންތިޚާބުގައި ވާދަކުރައްވަން ނިންމަވާފައިވާކަން އިއުލާންކުރައްވާފައިވާ ކުރީގެ ރައީސް ނަޝީދާއި އޭނާގެ ސަޕޯޓަރުން އަންނަނީ ޕާޓީއަށް މެންބަރުން އިތުރުކޮށް، ކެންޕެއިން ކުރުމަށް ރާއްޖޭގެ އެކި ރަށްރަށަށް ދަތުރުތައް ކުރަމުންނެވެ. އެ ދަތުރުގެ ތެރެއިން ގިނަ އަދަދެއްގެ ބަޔަކު އަންނަނީ އެ ޕާޓީއާ ގުޅެމުންނެވެ.

އަދި އިންތިޚާބުގައި ވޯޓުލެވޭ މެންބަރުންނަކީ ރޭގެ ނިޔަލަށް ޕާޓީގެ މެންބަރުންގެ ގޮތުގައި ތިބި މީހުން ކަމަށް ކަނޑައަޅާފައި އޮތުމުން، ނަޝީދަށް ތާއީދުކުރައްވާ ގިނަ ބަޔަކު ދަނީ ނުރުހުން ފާޅުކުރަމުންނެވެ.

އެމްޑީޕީން ވަކިވެވަޑައިގެން ޑިމޮކްރެޓްސްއާ ނަޝީދު ގުޅިވަޑައިގެންނެވުމުން އެޕާޓީގައި ތިއްބެވި އެމަނިކުފާނުގެ ގިނަ ސަޕޯޓަރުން ޑިމޮކްރެޓަސްއަށް ސޮއި ކުރިއެވެ. އަދި އެއްބަޔަކު، އެމަނިކުފާނާއެކު އަލުން އެމްޑީޕީއާ ގުޅުނު ނަމަވެސް، އަދިވެސް ބައެއް މެންބަރުން ތިބީ ޑިމޮކްރެޓްސްގައެވެ.