ތަގައްޔަރުވެފައިހުރި ލޭ އެޅުނު ކަމަށް ދެކެވެމުންދާ ވާހަކަ ބްލަޑް ސާވިސްއިން ދޮގުކޮށްފި

ތެލެސީމިއާ ބަލިމީހުންނަށް ލޭ އެޅުމުގެ ތެރެއިން ކުނިވެ ތަގަްޔަރުވެފައިވާ ލޭ އެޅުނުކަމަށް ދެކެވެމުންދާ ވާހަކަ މޯލްޑިވިއަން ބްލަޑް ސާރވިސަސްއިން ދޮގުކޮށްފިއެވެ.

ލޭ ރައްކާކުރާ އައިސަލްމާރިއެއް މައްސަލަ ޖެހިގެން ތެލަސީމިއާ ބައެއް ފަރާތްތަކަށް ލޭ އެޅުމުގައި ތަގައްޔަރުވެފައިވާ ލޭ އެޅުނުކަމަށް ސޯޝަލް މީޑިއާގައި ދެކެވެމުންދިޔަ ވާހަކަތަކާ ގުޅިގެން މޯލްޑިވިއަން ބްލަޑް ސާރވިސަސްއިން ނެރުނު ބަޔާނުގައި ބުނެފައިވަނީ،

މި މަހުގެ 20 ވަނަ ދުވަހު އެޅިކަމަށް ބުނާ ލެޔަކީ، ކުނިވެފައިވާ ނުވަތަ ތަޤައްޔަރުވެފައި ހުރި ލޭ ނޫންކަމުގެ ޔަގީންކަން ސިއްހީ ގޮތުން ބަލާއިރު އެނގޭ ކަމަށެވެ. ބްލަޑް ސާވިސްއިން ބުނީ، ލޭ ރައްކާކުރާ ދެ ނަމްބަރު އައިސްއަލަމާރީގައި ޓެކްނިކަލް މައްސަލައެއް އުޅޭކަން އާދިއްދަތުވަހުގެ ރޭ 09:00 ގައި އިދާރާ ބަންދުކުރިފަހުން 10:11 ހާއިރު އެނގިފައިވާކަމަށެވެ. އެކަން އެނގިފައިވަނީ ފިނިހޫނުމިން ބެލުމަށް ގެންގުޅޭ ސިސްޓަމް މެދުވެރިކޮށް ލިބުނު އެލާމިން މެސެޖުންނެވެ.

ބްލަޑް ސާވިސްއިން ބުނީ އެކަން އެނގުމުން ތިން މުއައްޒަފަކު އެތަނަށްގޮސް ލޭ ޕެކެޓްތައް އެހެން އައިސްއަލަމާރިއަކަށް ބަދަލުކުރި ކަމަށެވެ. މައްސަލަޖެހުނު އައިސްއަލަމާރީގެ ފިނިހޫނުމިން 11 ޑިގްރީ ސެލްސިއަސްއަށް އަރާފައި ހުރިކަން ފާހަގަކުރެވުނުއިރު، ލޭ ޕެކްޓްތައް ބަހައްޓަން ޖެހެނީ ދޭއް ނުވަތަ ހައެއް ޑިގްރީ ސެލްސިއަސްއާ ދެމެދުކަމަށެވެ. ލޭ ރައްކާކޮށްފައި ބަހައްޓާ އެއްޗަށް މައްސަލައެއް ދިމާވާ ހާލަތެއްގައި 10 ޑިގްރީ ސެލްސިއަސްއަށްވުރެ މަތި ނުވާނަމަ، 4 ގަޑިއިރުވަންދެން ރައްކާތެރިކަމާއެކު ބެހެއްޓޭނޭކަމަށް ސިއްހީ މިންގަނޑުތަކުން އެނގެން އޮންނައިރު، މިހާތަނަސް ބެލިބެލުމުން އެ ލެއަކީ ކުނިވެ ތަގައްޔަރުވެފައިވާ ލޭ ނޫންކަން ޔަގީން ކުރެވިފައިވާކަމަށް ބްލަޑް ސާވިސްއިން ބުންޏެވެ.

ބްލަޑް ސާވިސްއިން ބުނީ މައްސަލަ ދިމާވި އައިސްއަލަމާރީގައި ހުރި ލޭ ޕެކެޓް ތިން މީހެއްގެ ގަޔަށް އެޅުނުކަން ފާހަަގަކުރެވިފައިވާކަމަށާއި، އެ ހިސާބުން އަޅަންޖެހޭ ފިޔަވަޅުތައް އަޅަމުން ގޮސްފައިވާކަމަށެވެ.

ބްލަޑް ސާވިސްއިން ބުނީ، މިމަހުގެ 20 ވަނަ ދުވަހާއި ހަމައަށް އެ އިދާރާއިން ތެލިސީމިއާ ކުދީންނަށް ހިއްސާކުރި މައުލޫމާތު ތަކެއް ހިމަނައިގެން ކަމުގެ ހަގީގަތް އޮޅުން އަރާ ގޮތަށް ބައެއް ފަރާތްތަކުން މައުލޫމާތު ފަތުރަމުންދާކަމަށެވެ. ތެލިސީމިއާ ބަލި ތަހައްމަލުކުރާ ފަރާތްތަކަށް ކޮންމެ ދުވަހަކުމެ ދެމުން އަންނަ ލޭ އެޅުން ފަދަ މުހިއްމު ހިދުމަތަކާ ގުޅުވައި، ހިދުމަތް ހޯއްދަވާ ފަރާތްތަކާއި ދިވެހި ރައްޔިތުންގެ ހިތުގައި ނުތަނަވަސްކަން އުފެދޭގޮތަށް މައުލޫމާތާއި ހަބަރުފަތުރާ ބައެއް ނޫސް މީޑިއާ ތަކާއި އަދި އެނޫންވެސް ފަރާތްތަކުން ކުރާ ނުރަނގަޅު އަމަލުތައް ހަރުކަށި އިބާރާތުން ކުށްވެރިކުރާ ކަމަށްވެސް ބަޔާނުގައި ވަނީ ބުނެފައެވެ.

އަދި ސިއްހީ ހިދުމަތް އެންމެ އެކެށީގެންވާ ގޮތުގައި ރައްޔިތުންނަށް ފޯރުކޮށް ދިނުމުގެ މަގްސަދުގައި ކުރަމުން އަންނަ މަސައްކަތަށް އެންމެހައި ފަރާތްތަކުގެ އެއްބާރުލުން ދެއްވުމަށް އެ އިދާރާއިން ވަނީ އެދިފައެވެ.