ރަޖިސްޓަރ ކޮށްފައިވާ ބުޅާތަކުގެ ކަރުގައިވާ ކޮލަރ ނުނެގުމަށް އެދެފި

މާލޭގައި އުޅޭ ބުޅާތައް ރަޖިސްޓްރީ ކުރުމަށް ކުރިއަށް ގެންދާ ހަރަކާތުގެ ތެރެއިން، މިހާތަނަށް ރަޖިސްޓްރީ ކޮށްފައިވާ ބުޅާތަކުގެ ކަރުގައި އަޅުވާފައިވާ ކޮލަރ ނުނެގުމަށް އެ ޕްރޮގްރާމް ހިންގާ، ފީލައިން ވެލްފެއާ އޮގަނައިޒޭޝަނުން އެދެފިއެވެ.

އެ އޯގަނައިޒޭޝަނުން ބުނީ، މަގުމަތީގައި އުޅޭ ބުޅާތަކުގެ ތެރެއިން "އެފްޑަބްލިއުއޯ" ޖަހާފައިވާ ޕޭންޑޭންޓެއް ނުވަތަ ކޮލަރ އެއް އަޅުވާފައިވާ ބުޅަލެއް ފެނިއްޖެ ނަމަ އެއީ ފަރުވާދީ، ރަޖިސްޓްރީ ކޮށްފައިވާ ބުޅަލެއް ކަމަށެވެ.

ފީލައިން ވެލްފެއާއިން ވަނީ އެ ބުޅާތަކުގެ ކަރުގައިވާ ކޮލަރ ނުނެގުމަށާއި، އަދިވެސް ގިނަ ބުޅާތަކެއްގެ ފަރުވާ ކުރިއަށްދާތީ އެއްވެސް ވައްތަރެއްގެ ބޭހެއް މި ބުޅާތަކަށް ނުދިނުމަށް އިލްތިމާސްކޮށްފައެވެ.

ބުޅާތަކަށް ޖެހޭ ބައްޔެއް މިދުވަސްކޮޅު ފެތުރެމުންދާއިރު، ބުޅާތައް ސަލާމަތް ކުރުމަށް ބޭސްދީ، ބުޅާތައް ރަޖިސްޓްރީ ކުރަން ފަށާފައިވަނީ މިިދިޔަ މަހުގެ ތެރޭގައެވެ.

ފީލައިނުން ވަނީ މި ދުވަސްވަރު ބުޅާތަކަށް ކާން ނޭޅޫމަށާއި ބޭސް ނުދިނުމަށްވެސް އެދިފައެވެ. މީގެ އިތުރުން ބުޅަލެއްގައި އަތްލައިފި ނަމަ، ރަނގަޅަށް އަތްދޮވުމަށް ވަނީ އިލްތިމާސް ކޮށްފައެވެ.

ސަރުކާރުން ވަނީ މާލޭގެ މަގުތަކުގައި ގިނަވަމުންދާ ބުޅާތައް ގެންގުޅޭނެ 'ޕެޓް ކެއަރ ފެސިލިޓީ'އެއް ޤާއިމުކުރުމުގެ ޢަމަލީ މަސައްކަތް ހުޅުމާލެ ފަރުކޮޅުފުށީގައި ފަށާފައެވެ. ޕެޓް ކެއާ ފެސިލިޓީ ނިމެންދެން މާލޭގެ މަގުމަތީގައި އުޅޭ ބުޅާތަކަށް ވަގުތީ ހިޔާ ފޯރުކޮށްދިނުމުގެ މަސައްކަތް ކުރަމުންދާ ކަމަށް މީގެ ކުރިން މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ ޑރ. އައިޝަތު ރަމީލާ ވަނީ ވިދާޅުވެފައެވެ.