އައިޔޫއެމް ވަޤުފު އިމާރާތުގެ އަމަލީ މަސައްކަތް ރައީސް ޑރ.މުއިއްޒު ފައްޓަވައިދެއްވައިފި

އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް)ގެ ވަޤުފު އިމާރާތް "ސަނާބީލު" ގެ ބިންގާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަޅުއްވައިދެއްވައިފިއެވެ.

މި އިމާރާތުގެ ބިންގާ އެޅުމުގެ ގޮތުން ހުޅުމާލެ ސެންޓްރަލް ޕާކް ކުރިމަތިން އެ އިމާރާތަށް ހާއްސަކޮށްފައިވާ ބިން ހިމެނޭ ލޮޓްގައި ވަނީ ރަސްމިއްޔާތެއް ކުރިއަށްގެންގޮސްފައެވެ. އައިޔޫއެމް ސަނާބީލު އިމާރާތް އެޅުމަށް ބޭނުންވާ 60 މިލިއަން ރުފިޔާ ހަމަޖައްސާފައިވަނީ ބޭންކް އޮފް މޯލްޑިވްސްގެ އިސްލާމިކް ބޭންކް މެދުވެރިކޮށެވެ.

މިއަދު ހުޅުމާލޭގައި ބޭއްވި މި ރަސްމިއްޔާތުގައި ވާހަކަފުޅު ދައްކަވަމުން، އައިޔޫއެމްގެ ވައިސް ޗާންސެލަރ ޑރ. އަލީ ޒާހިރު ބިން ޤާސިމް ވިދާޅުވީ، މި ސަރުކާރު ވެރިކަމާ ހަވާލުވުމާއެކު ސަނާބީލު މަޝްރޫޢު ކުރިއަށްގެންދިޔުމަށް ވަރަށް ބޮޑަށް ފަސޭހަވެގެން ދިޔަކަމަށެވެ.

އަދި ކަމާބެހޭ އިދާރާތަކުން ހޯދަންޖެހޭ ހުއްދަތައް ފަސޭހަކަމާއެކު ލިބުނު ކަމަށްވެސް ޒާހިރު ފާހަގަކުރެއްވިއެވެ. ސަނާބީލު އިމާރާތަކީ ޔުނިވަރސިޓީއަށް އާމްދަނީ ހޯދުމުގެ މަޤްޞަދުގައި އިމާރާތްކުރެވޭ ޢިމާރާތެއް ކަމުގައިވީ ނަމަވެސް، މި އިމާރާތުގެ ސަބަބުން ޔުނިވަރސިޓީއަށް މިހާރު ދިމާވެފައިވާ ޖާގައިގެ ދަތިކަމަށްވެސް ޙައްލުތަކެއް ލިބިގެންދާނެ ކަމަށް އުއްމީދުކުރެވޭ ކަމަށް ޒާހިރު ވިދާޅުވި އެވެ.

ބޭންކް އޮފް މޯލްޑިވްސްގެ ސީއީއޯ މުޙައްމަދު ޝަރީފު ވިދާޅުވީ ސަނާބީލު އިމާރާތަކީ ދިވެހިރާއްޖޭގެ ތަޢުލީމީ ދާއިރާ ކުރިއެރުވުމާއި ދީނީ ޚިދުމަތްތައް ފުޅާކުރުމުގައި މުހިންމު ދައުރެއް އަދާކުރާނެ އިމާރާތެއް ކަމަށެވެ. އަދި މި މަޝްރޫޢަކީ އިސްލާމީ މާލީ ޚިދުމަތްތައް އިތުރަށް ފުޅާކުރުމަށް އެހީތެރިވެދޭނެ މަޝްރޫޢެއްކަމުގައިވެސް ޝަރީފް ފާހަގަކުރެއްވި އެވެ.

ދިވެހިރާއްޖޭގެ އިސްލާމީ ޔުނިވަރސިޓީގެ ސަނާބިލް މަޝްރޫޢަކީ އެ ޔުނިވަރސިޓީއަށް ދެމެހެއްޓިނިވި ގޮތެއްގައި އާމްދަނީ ހޯދުމުގެ ގޮތުން ހިންގޭ މަޝްރޫޢެކެވެ. މި މަޝްރޫޢުގެ ދަށުން ޔުނިވަރސިޓީގެ ބިމެއްގައި ހަތް ބުރީގެ "މިކްސްޑް-ޔޫޒް ކޮމްޕްލެކްސް" އެއް ބިނާކުރުމަށް ވަނީ ހަމަޖެހިފައެވެ. މިގޮތުން މި އިމާރާތުގައި އޮފީސް ސްޕޭސްތަކާއި، ފުޑް ކޯޓާއި، މީޓިންގ ރޫމްތަކާއި، އޮޑިޓޯރިއަމް އަދި ކޮމާޝަން ޕާކިންގ ޖާގަތައް ހިމެނެއެވެ.

މި މަޝްރޫޢަކީ އިސްލާމިކް ފައިނޭންސްގެ ޞުކޫކް މޮޑެލްގެ ދަށުން ފައިސާ ހޯދައިގެން ޢިމާރާތެއް އެޅުމަށް ރާއްޖޭގައި ހިންގޭ އެންމެ ފުރަތަމަ މަޝްރޫޢެވެ. މި މަޝްރޫޢު ހިންގުމަށް ދިވެހިރާއްޖޭގެ ކެޕިޓަލް މާކެޓްގައި 1 މަސްދުވަހުގެ މުއްދަތަށް އައި.ޔޫ.އެމްގެ ޞުކޫކު (ޞުކޫކު އިސްތިސްނާޢު) ސަބްކްރިޕްޝަންއަށް ހުޅުވާލީ 11 އޮގަސްޓް 2024 ގައެވެ.

އިމާރާތް އެޅުމުގެ ގޮތުން ފައިސާ ހޯދުމަށް އައިޔޫއެމްއިން ވަނީ ދިވެހިރާއްޖޭގެ ހިއްސާގެ ބާޒާރުގައި އެއް މިލިއަން ރުފިޔާގެ މޫނުމޫނުމަތީ އަގުގެ 60 ސުކޫކު އިޝޫކޮށްފައެވެ. އަދި މުއްދަތު ހަމަވިއިރު ސަބްސްކްރައިބްކޮށްފައި ވަނީ ބޭންކް އޮފް މޯލްޑިވްސްގެ ބީ.އެމް.އެލް އިސްލާމިކް އިންނެވެ. މި ޢިމާރާތް ނިންމުމަށް ކަނޑައަޅާފައިވަނީ 18 މަސްދުވަހުގެ ތެރޭގައެވެ.