ދޮގެއް ވިޔަސް، ތެދެއް ވިޔަސް، ޚަބަރު ފަތުރައިގެން ނޫސްވެރިންނަށް ޖިނާޢީ ފިޔަވަޅެއް އަޅައިގެން ނުވާނެ: ފައްޔާޒު
ލިޔުންތެރިޔާ
ޚަދީޖާ އަރުފާ
ދޮގު ޚަބަރެއް ވިޔަސް ތެދު ޚަބަރެއް ވިޔަސް، އެ ފަތުރާ ޚަބަރަކާއި ގުޅިގެން ނޫސްވެރިންނާ ދޭތެރޭގައި ޖިނާއީ ފިޔަވަޅު އަޅައިގެން ނުވާނެ ކަމަށް އެމްޑީޕީގެ ކުރީގެ ޗެއާޕާސަން ފައްޔާޟް އިސްމާޢީލް ރޭ ވިދާޅުވެއްޖެއެވެ.
ސަންގު ޓީވީގެ އަހަރީ ޖަލްސާގައި ވާހަކަދައްކަވަމުން ފައްޔާޒު ވިދާޅުވީ، މި ދުވަސްވަރަކީ ނޫސްވެރިކަމަށާ، މައުލޫމާތު ހޯދުމަށްވެސް އެންމެ ގިން ދަތިތަކާ ކުރިމަތިވަމުންދާ ދުވަސްތައް ކަމަށެވެ. އެގޮތުން މިދިޔަ ދޮޅުއަހަރެއްހާ ދުވަސްތެރޭ ނޫސްވެރިކަމާ ގުޅޭ ގިނަކަންކަން ހިނގާފައިވާ ކަމަށާ، މަޖިލީހުގެ ތެރެއިން ނޫސްވެރިކަމާގުޅޭ ގިނަ ގާނޫނުތަކެއް ފާސްކޮށްފައިވާ ކަމަށް ވިދާޅުވިއެވެ. އޭގެ ސަބަބުން ނޫސްވެރިކަމަށް ބޮޑެތި ގޮންޖެހުންތަކެއް ކުރިމަތިވެފައިވާ ކަމަށް ވިދާޅުވިއެވެ.
މިއާއެކު ފައްޔާޒު ވަނީ، ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ އިސްތަށިފުޅުގައި ޒިނޭގެ ތުހުމަތު އަޅުވައި، އަދަދު ނޫހުން ހެދި ވީޑިއޯ އަކާއި ގުޅިގެން އެ ނޫހުގެ އޮފީސް ބަލައިފާސްކޮށް ނޫހުގެ ވެރިންނާ ދެކޮޅަށް ޖިނާޢީ ދައުވާ ކުރާ މައްސަލައަށް އަލިއަޅުވާލައްވާފައެވެ.
އަޅުގަނޑު އަބަދުވެސް ޤަބޫލު ކުރަނީ ދޮގު ހެދިކަމުގައި ވިޔަސް، ތެދުހެދި ކަމުގައިވިޔަސް ނޫސްވެރިންނާ ދޭތެރޭ ޖިނާޢީ ފިޔަވަޅު އެޅިގެން ނުވާނެކަން. އެއީކީ އެކަން ރަނގަޅުވެގެންނެއް ނޫން. ދޮގު މައުލޫމާތު ފެތުރުން ރަނގަޅުވެގެންނެއް ނޫން. ޑިމޮކްރަސީ ހިފެހެއްޓުމަށްޓައި، ޚުދުމުޚުތާރު ވެރިންގެ ކިބައިން، ރައްޔިތުން ސަލާމަތް ކުރުމަށްޓަކައި އެ ޖާގަ ތަންމިނަށް ނޫސްވެރިންނަށް ދޭންޖެހޭ.
ފައްޔާޟް އިސްމާޢީލް
ދޮގު ޚަބަރު ފަތުރައިގެން ނޫސްވެރިންނަށް ފިޔަވަޅު އެޅުން ރަނގަޅު ނުވާ ސަބަބުގެ ގޮތުގައި ފައްޔާޒު ފާހަގަކުރެއްވީ، ތެދު ޚަބަރު ފަތުރާ ފަރާތްތަކާމެދުވެސް ގާނޫނުތަކުގެ ބޭނުން ކޮށްގެން ފިޔަވަޅުއެޅުމެވެ.
އެހެން ނޫން ކަމަށްވިއްޔާ ވާނެ ގޮތަކީ ތެދުހެދިޔަސް ގާނޫނުތަކެއް ބޭނުންކޮށްގެން ޚުދުމުޚުތާރުވެރިން އަބަދުވެސް މަސައްކަތްކުރާނީ ނޫސްވެރިންގެ އަނގަ ބަންދުކުރަން.
ފައްޔާޟް އިސްމާޢީލް
މިއާއެކު ފައްޔާޒު ވިދާޅުވީ މުޖުތަމަޢުގައި ތެދު ޚަބަރު ފެތުރުމަކީ ނުހަނު މުހިންމު ކަމެއް ކަމަށެވެ. އަދި އެކަން ކުރަންޖެހޭނީ ސަރުކާރުން ނޫން ކަމަށާ އެއީ ނޫސްވެރިން ކުރަންޖެހޭ ކަމެއް ކަމަށްވެސް ވިދާޅުވިއެވެ. އެއީ ދުނިޔޭގެ އެހެން ގައުމު ތަކުގައިވެެސް އެކަން ކުރާ ގޮތް ކަމަށް އޭނާ ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
