އެމްކިއުއޭގެ ހުއްދައާ ނުލައި ބޭރުގައި ޕްރޮގްރާމުތައް ހިންގާ ކަމުގެ ކަންބޮޑުވުން

މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)އިން ރާއްޖޭގައި ހިންގުމަށް ހުއްދަދީފައިވާ ޕްރޮގްރާމްތަކެއް ރާއްޖެއިން ބޭރުގައި ހިންގާ ކަމުގެ ކަންބޮޑުވުން އެ އިދާރާއިން ފާޅުކޮށްފިއެވެ.

އިއްޔެ އެ އިދާރާއިން ނެރުނު ނޫސްބަޔާނެއްގައި ވަނީ ރާއްޖޭގައި ހިންގުމަށް ހުއްދަ ދީފައިވާ ޕްރޮގްރާމްތަކެއް، ރާއްޖޭގައި ރަޖިސްޓްރީކޮށްގެން ހިންގާ މަތީ ތައުލީމާއި ތަމްރީނުދޭ މަރުކަޒަކުން ބޭރުގައި ހިންގައި، ބޭރުގެ ދަރިވަރުންތަކަކަށް ސަނަދު ދީފައިވާ ކަމުގެ ކަންބޮޑުވުން ފާޅުކޮށްފައެވެ.

އެގޮތުން އެ އިދާރާގެ ސަމާލުކަމަށް އައީ އެ ދަރިވަރުންގެ ސެޓިފިކެޓުތައް ވެލިޑޭޓްކުރުމަށްޓަކައި ރާއްޖެއިން ބޭރުގެ އެހެން އިދާރާތަކަކުން އެމްކިއުއޭއަށް ހުށަހެޅުމުން ކަމަށް ވެސް އެމްކިއުއޭއިން ބުންޏެވެ.

އެކަމާ ގުޅިގެން އެމްކިއުއޭއިން ވަނީ  އެގޮތަށް ޕްރޮގްރާމު ހިންގައިގެން ސަނަދު ދިނުމަށް އެއްވެސް މަތީ ތައުލީމު ދޭ މަރުކަޒަކަށް ހުއްދަދީފައި ނުވާނެ ކަން އެ އިދާރާތަކަށް އަންގާފައިވާނެ ކަމަށެވެ. އެމްކިއުއޭއިންވަނީ އެ އިދާރާއިން އެކްރެޑިޓޭޝަން ދީފައިވާ ޕްރޮގްރާމުތައް ރާއްޖޭން ބޭރުގައި ހިންގުމާ ބެހޭ ގަވައިދަށް މިމަހު 10 ވަނަ ދުވަހުން ފެށިގެން އަމަލުކުރަން ފެށުމުގެ ކުރިން ރާއްޖޭގައި ހިންގުމަށް ހުއްދަ ދޫކޮށްފައިވާ ޕްރޮގްރާމުތައް، ރާއްޖޭން ބޭރުގައި ހިންގުމަށް އެކްރެޑިޓޭޝަން ދޫކޮށްފައެއް ނުވާނެ ކަން ވެސް ފާހަގަކޮށްފައެވެ.

އެގޮތުން އެކަމާ ގުޅިގެން އެމްކިއުއޭގެ ސީއީއޯ މަރިޔަމް ފިޒާނާ ރަޝީދު ވެސް ވަނީ އެކަމުގެ ކަންބޮޑުވުން ފާޅުކުރައްވާފައެވެ.

އެގޮތުން އެ ޕްރޮގްރާމުތަކުގައި ރާއްޖެއާއި ބޭރުގެ ކުދިންގެ ވެސް ޙައްޤުތަކެއް ވާނެކަށާއި، އެ ކުދިންދާ ވަޒީފާ ފަދަ ތަންތަނަށް އެ ސެޓިފިކެޓުތައް ހުށަހެޅުމުން، އެ ސެޓިފިކެޓުތަކުގެ ސައްޚަކަން ކަށަވަރުކުރުމަށް ބޭރުގެ އިދާރާތަކުން އެމްކިއުއޭއަށް ހުށަހަަޅާކަމަށް ވެސް ފިޒާނާ ވިދާޅުވިއެވެ.

އަދި އެ ސެޓިފިކެޓުތައް އެމްކިއުއޭއިން ވެލިޑޭޓް ނުކޮށްދިނުމުން އެ ޕްރޮގްރާމްތަކުން ކިޔެވި ދަރިވަރުންނަށް ލިބުނު ގެއްލުމުގެ ޒިންމާ ނަގަން ޖެހޭނީ އެ ދަރިވަރުންނަށް އެ ކޯސްތައް ހިންގި ތައުލީމީ ސެންޓަރުކަންކަމަށް ވެސް ފިޒާނާ ވިދާޅުވިއެވެ.