ރާއްޖޭގެ އިރުއުތުރުން 101 ކިލޯގެ ޑްރަގާ އެކު ބޯޓެއް އަތުލައިގެންފި؛ 5 މީހަކު ލަންކާ ނޭވީގެ ބެލުމުގެ ދަށަށް

ރާއްޖޭގެ އިރުއުތުރުން، ސްރީލަންކާގެ ދެކުނު ކަނޑުގެ ސަރަޙައްދުން ގާތްގަނޑަކަށް 101 ކިލޯއަށް ވުރެ ގިނަ މަސްތުވާތަކެތި އެތެރެކުރަން އުޅުނު އެ ޤައުމުގެ މަސްބޯޓެއް ލަންކާ ނޭވީން އަތުލައިގެންފިއެވެ. މި އޮޕަރޭޝަންގައި އެ ބޯޓުގައި ތިބި 5 މީހަކު ވަނީ ނޭވީގެ ބެލުމުގެ ދަށަށް ގެންގޮސްފައެވެ.

ކަނޑުމަތިން އަތުލައިގަތް މަސްބޯޓާއި، އޭގައި ހުރި 6 ގޯނި މަސްތުވާތަކެއްޗާއި، އަދި ހައްޔަރުކުރި މީހުން ޤާނޫނީ ފިޔަވަޅު އެޅުމަށްޓަކައި މިމަހު 13 ވަނަ ދުވަހު ހެނދުނު ވަނީ ގާލީ ބަނދަރަށް ގެންގޮސްފައެވެ.

ޕޮލިސް ނާކޮޓިކްސް ބިއުރޯ (ޕީއެންބީ) އާ ގުޅިގެން ހިންގި އިތުރު ތަހުލީލުތަކުން ކަށަވަރުވި ގޮތުގައި، މި ތަކެތީގެ ތެރޭގައި 52 ޕެކެޓުގައި ބަންދުކޮށްފައި ހުރި ގާތްގަނޑަކަށް 58 ކިލޯ އަދި 736 ގްރާމްގެ ހެރޮއިން އާއި، 50 ޕެކެޓުގައި ބަންދުކޮށްފައި ހުރި 43 ކިލޯ އަދި 134 ގްރާމްގެ މެތަމްފެޓަމިން (އައިސް) ހިމެނެއެވެ. ޖުމްލަ 101 ކިލޯ އަދި 870 ގްރާމްގެ މި މަސްތުވާތަކެތީގެ މަގުމަތީ އަގު 1.5 ބިލިއަން ލަންކާ ރުޕީސްއަށް ވުރެ މައްޗަށް އަރާނެ ކަމަށް ވަނީ ލަފާކޮށްފައެވެ. މިހާރު މި މައްސަލައިގައި ހައްޔަރުކުރި މީހުންނާއި، އަތުލައިގަތް މަސްތުވާތަކެއްޗާއި ބޯޓު ވަނީ އިތުރު ޤާނޫނީ ފިޔަވަޅު އެޅުމަށް ޕީއެންބީއާ ޙަވާލުކޮށްފައެވެ.

އަތުލައިގަތް މަސްތުވާތަކެތި ބަލައި ފާސްކުރުމުގެ މަރުޙަލާގައި ސްރީލަންކާގެ ޑެޕިއުޓީ މިނިސްޓަރ އޮފް ޑިފެންސް މޭޖަރ ޖެނެރަލް އަރުނާ ޖަޔަސޭކަރަ (ރިޓަޔަރޑް) އާއި، ކޮމާންޑަރ އޮފް ދަ ނޭވީ ވައިސް އެޑްމިރަލް ޑޭމިއަން ފެނާންޑޯ އާއި، ދެކުނު ކަނޑުގެ ސަރަޙައްދުގެ ކޮމާންޑަރު ރިއަރ އެޑްމިރަލް އެޗް.އެން.އެސް ޕެރޭރާ އާއި، ޑިރެކްޓަރ ޖެނެރަލް އޮޕަރޭޝަންސް ރިއަރ އެޑްމިރަލް ޗަމިންދަ ކަރުނާސޭނާ އަދި ނޭވީ އާއި ޕީއެންބީގެ އިސް ވެރިން ބައިވެރިވެވަޑައިގެންނެވިއެވެ.

މި ރަސްމިއްޔާތުގައި ވާހަކަދައްކަވަމުން ޑެޕިއުޓީ މިނިސްޓަރ އޮފް ޑިފެންސް ވިދާޅުވީ، ޤައުމީ ސަލާމަތް ރައްކާތެރިކުރުމުގެ އިތުރުން 'އަ ނޭޝަން ޔުނައިޓެޑް' ޤައުމީ މިޝަންގެ ދަށުން މަސްތުވާތަކެތި އެތެރެކުރުން ހުއްޓުވުމަށް ނޭވީން ހުއްޓުމެއް ނެތި ކަނޑުގެ ސަރަޙައްދު ބަލަހައްޓަމުންދާ ކަމަށެވެ. އަދި މި އޮޕަރޭޝަނަކީ ކަނޑުމަތީގައި ދުވަސްތަކެއް ވަންދެން ފާރަލައިގެން ކާމިޔާބުކުރި އޮޕަރޭޝަނެއްކަން އޭނާ ފާހަގަކުރެއްވިއެވެ.

އޮކްޓޫބަރު 2025 ގައި ފެށި 'އަ ނޭޝަން ޔުނައިޓެޑް' ޤައުމީ މިޝަންގެ ދަށުން، މި ވޭތުވެދިޔަ އެއް އަހަރު ދުވަހުގެ ތެރޭގައި ލަންކާ ނޭވީ އާއި ކޯސްޓްގާޑު ގުޅިގެން ހިންގި އޮޕަރޭޝަންތަކުގައި، މަގުމަތީ އަގު 115 ބިލިއަން ލަންކާ ރުޕީސްއަށް ވުރެ މަތީގެ މަސްތުވާތަކެތި އަތުލައިގެންފައިވެއެވެ. އަދި ހަމައެކަނި 2026 ވަނަ އަހަރުގެ މިހާތަނަށްވެސް 74 ބިލިއަން ރުޕީސްއަށް ވުރެ އަގުހުރި މަސްތުވާތަކެތި އަތުލައިގެންފައިވާ ކަމަށް ކަމާބެހޭ އިދާރާތަކުން މަޢުލޫމާތުދެއެވެ.