އެމްއެންޔޫ ފުޓްސަލް ފިއެސްޓާގެ ލައިފްސްޓައިލް ޕާޓްނަރަކަށް އީޒެޕް

ދިވެހިރާއްޖޭގެ ގައުމީ ޔުނިވާސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ) އިން އިންތިޒާމުކޮށްގެން ބާއްވާ "ދިރާގު އެމްއެންޔޫއެސްޔޫ ފުޓްސަލް ފިއެސްޓާ 2026" ގެ އޮފިޝަލް ލައިފްސްޓައިލް ޕާޓްނަރަކަށް އީޒެޕް ހަމަޖައްސައި، އެކަމުގެ އެއްބަސްވުމުގައި މިއަދު ސޮއިކޮށްފިއެވެ.

މި އެއްބަސްވުމުގައި ސޮއިކުރުމަށްފަހު އީޒެޕްގެ ފަރާތުން ބުނީ، އެމްއެންޔޫއެސްޔޫ ފުޓްސަލް ފިއެސްޓާއަކީ ރާއްޖޭގެ މަތީ ތައުލީމު ހާސިލްކުރާ ގިނަ އަދަދެއްގެ ދަރިވަރުން ބައިވެރިވާ، އަދި އެންމެ ބޮޑު "ސްޓޫޑަންޓް ބޭސް" އެއް ހިމެނޭ އިޖުތިމާއީ ހަރަކާތް ކަމަށެވެ.

އަދި ޔުނިވާސިޓީގައި ކިޔެވުމަކީ ހަމައެކަނި ފިލާވަޅުތަކާއި އެސައިންމަންޓްތަކަށް ހުސްވުން ނޫން ކަމަށާއި، މިއީ އެކަކު އަނެކަކާ ގުޅުން ބަދަހިކޮށް ވަރުގަދަ މުޖުތަމައެއް ބިނާކުރުމަށް ލިބޭ ފުރުސަތެއް ކަމަށްވެސް އީޒެޕުން ފާހަގަކުރިއެވެ.

މި ޕާޓްނަޝިޕްގެ ދަށުން، އެމްއެންޔޫގެ ދަރިވަރުންނަށް އީޒެޕް މެދުވެރިކޮށް ކާބޯތަކެއްޗާއި، ގްރޯސަރީ އަދި ދިރިއުޅުމުގެ އެހެނިހެން ސާމާނުތަކުން ހާއްސަ ޑިސްކައުންޓްތަކެއް ލިބިގެންދާނެއެވެ.

އީޒެޕުން ބުނި ގޮތުގައި އެ ކުންފުންޏަކީ ހަމައެކަނި ފައިދާ ހޯދުމުގެ ބަދަލުގައި، މުޖުތަމައަށް ފައިދާހުރި ކަންތައްތަކެއް ކޮށްދިނުމަށް މަސައްކަތްކުރާ ކުންފުންޏެކެވެ.

މީގެ އިތުރުން، މި އެއްބަސްވުމުގެ ދަށުން ދަރިވަރުންނަށް އާމްދަނީ ހޯދުމުގެ ފުރުސަތުތަކެއްވެސް ވަނީ ހުޅުވާލާފައެވެ. އެގޮތުން ހުސްވަގުތުތަކުގައި ޑެލިވަރީގެ މަސައްކަތް ކޮށްގެން ނުވަތަ އީޒެޕް ސްޓޯ މެދުވެރިކޮށް އަމިއްލަ ވިޔަފާރިތައް ފަށައިގެން ކަސްޓަމަރުންނާ ހަމައަށް ވާސިލްވުމުގެ ފުރުސަތު ދަރިވަރުންނަށް ލިބޭނެއެވެ.