ޓީޗަރަކަށްވާން ބޭނުންވެގެން އޭލެވެލް ފަށާ ދަރިވަރުންނަށް މަހަކު 1500 ރުފިޔާގެ އެލަވަންސެއް ދެނީ

ގުރޭޑް 11ގައި ކިޔަވާ ދަރިވަރުންގެ ތެރެއިން ޓީޗަރުންނަށް ވާން ބޭނުންވާ ދަރިވަރުންނަށް ސްޓައިޕެންޑްގެ ގޮތުގައި 1500 ރުފިޔާ މަހަކު ދޭން އެޑިޔުކޭޝަން މިނިސްޓްރީން ނިންމައިފިއެވެ.

ޓީވީއެމްގެ ހެނދުނު ހެނދުނާ ޕްރޮގްރާމުގައި ވާހަކަ ދައްކަވަމުން މިނިސްޓަރ އޮފް ސްޓޭޓް ފޮރ އެޑިޔުކޭޝަން ޑރ. އަޙްމަދު މުޙައްމަދު ވިދާޅުވީ، ރާއްޖޭގެ ތަޢުލީމީ ނިޒާމުގައި މަސައްކަތް ކުރަމުންދާ 10،000 އެއްއާ ޓީޗަރުންގެ ތެރެއިން 2000 އެއްހާ ޓީޗަރުންނަކީ ބިދޭސީން ކަމަށެވެ. އެހެންކަމުން، ރާއްޖޭގައި ކިޔަވައިދޭ ޓީޗަރުންގެ ތެރެއިން ގިނަ މީހުންނަކީ ދިވެހިން ކަމުގައި ހަދަންޖެހޭ ކަމަށް އޭނާ ވިދާޅުވިއެވެ.

އެކަމަށްޓަކައި ޓީޗަރުން ތަމްރީނު ކުރުމުގެ ޤައުމީ މަޝްރޫއެއް ފެށުމުގެ މަސައްކަތް ކުރަމުން އަންނަ ކަމަށާ، މިއަހަރުގެ ސެޕްޓެމްބަރު މަހުގެ ތެރޭގައި އެ މަޝްރޫޢު ފެށުމަށް މަޝްރޫއުގެ ކޮންސެޕްޓް މިހާރު އެކުލަވާލެވިފައިވާ ކަމަށް ޑރ އަހުމަދު މުހައްމަދު ވިދާޅުވިއެވެ.

މިއާއެކު، ތައުލީމީ ދާއިރާގެ މުސްތަގުބަލް އޮތީ، ޓީޗިންގ ފޯސްއަށް ވީހާވެސް ކޮލިޓީ ރަނގަޅު، ފެންވަރު ރަނގަޅު ދަރިވަރުން ވަދެގެން ކަން ފާހަގަކުރައްވައި  ސްޓޭޓް މިނިސްޓަރ ވަނީ، އޭލެވެލް ނިންމާ ދަރިވަރުން އެ ދާއިރާއަށް ނެރުމަށް ޚާއްސަ ސަމާލުކަމެއް ދެއްވާ ކަމަށް ވިދާޅުވެފައެވެ.

އަޅުގަނޑުމެން މި ޕްރޮގްރާމް ރޭވިގެން މިދަނީ، ގްރޭޑް 11 އަށް ވަންނަ ކޮންމެ ދަރިވަރަކަށްވެސް އަޅުގަނޑުމެން އެބަ ފުރުސަތު ހުޅުވާލަދެން، އެ ދަރިވަރަކީ ޓީޗަރަކަށްވާނ ބޭނުންވާ ދަރިވަރެއް ނަމަ، ޑުއަލް ޕްރޮގްރާމެއްގެ ތެރެއިން ކުރިއަށް ގޮސް، 11 ނިމޭއިރު އެކުދިންނަށް، ޓީޗިންގ ޕްރިޕޭޓަރ ކޯހެއް ފަރުމާ ކުރެވިގެން މިދަނީ. އެހެންވީމާ އެކުދިން އޭލެވެލް ނިމޭއިރު، އެކުދިން ތިބޭނީ ޓީޗިންގ ކޯހަށް ތައްޔާރުކޮށް ނިމިފައި.

ސްޓޭޓް މިނިސްޓަރު ޑރ އަޙްމަދު

ސްޓޭޓް މިނިސްޓަރ އިތުރަށް ވިދާޅުވީ، ޓީޗިންގެ ދާއިރާއަށް ވަންނަ ދިވެހިން އިތުރު ކުރުމަށް، މިއަހަރު އޭ ލެވެލް ފަށާ ދަރިވަރުންގެ ތެރެއިން ޓީޗިންގެ ދާއިރާއިން ކުރިއަށްދާން ބޭނުންވާ ދަރިވަރުންނަށް ސްޓައިޕެންޑެއް ދިނުމަށް ހަމަޖެހުފައިފައިވާ ކަމަށެވެ.

މިފަހަރު ގްރޭޑް 11 އަށް ވަންނަ، ދަރިވަރުންގެ ތެރެއިން ޓީޗަރުންނަށް ވާންބޭނުންވާ ދަރިވަރުންނަށް އަޅުގަނޑުމެން ދޭނަން ސްޓައިޕެންޑެއްވެސް. ގްރޭޑް 11 އަށް ވަންނަ އިރު 1500 ރުފިޔާގެ. އެދަރިވަރުން އެއްބަސްވާނެ، ތިމަންނަ އަކީ އެވެނި މާއްދާއަކުން ޓީޗަރަކަށް ވާން ބޭނުންވާ ދަރިވަރެއް ކަމާ، ބެލެނިވެރިންނާ ދަރިވަރުންނާއެކު އެފަދަ އެއްބަސްވުމެއް ހެދިގެން ސްޓައިޕެންޑް ވެސް ދޭނަން. އޭރުން އޭލެވެލް ހަދަމުންދާއިރު އެކުދިން އެދަނީ ޓީޗިންގ ކެރިއަރގެ ޕާތްވޭ ނަގައިގެން، ޤައުމު ބިނާކުރުމަށް މުދައްރިސަކަށް ވުމަށްޓަކައި އަޒުމް ކަނޑައަޅައިގެން

ސްޓޭޓް މިނިސްޓަރު ޑރ އަޙްމަދު

މިއާއެކު ސްޓޭޓް މިނިސްޓަރ ވަނީ، ކޮލިޓީ ދިވެހި މުދައްރިސުން އުފެއްދުމަށް އޭލެވެލް ކިޔަވާ ވޭހާވެސް ގިނަ ދަރުވަރުން ޓީޗިންގ ގެ ދާއިރާއަށް ވަނުމަށް އެދިވަޑައިގެންފައެވެ.