ޗައިނާގެ ބޭންކެއްގެ ބްރާންޗެއް ރާއްޖޭގައި ހުޅުވަން ޝައުގުވެރިކަން ފާޅުކޮށްފި

ޗައިނާގެ ބޭންކެއްގެ ބްރާންޗެއް ރާއްޖޭގައި ހުޅުވުމަށް އެ ބޭންކުން ޝައުގުވެރިކަން ފާޅުކޮށްފިއެވެ.

މިކަން ހާމަކޮށްފައިވަނީ ޚާރިޖީ ވަޒީރު މޫސާ ޒަމީރު 'އަސްލު ޓިވީ'ގެ ޕްރޮގްރާމެއްގައި ވާހަކަފުޅު ދައްކަވަމުންނެވެ.

މިގޮތުން، ދިވެހިރާއްޖޭގައި ބޮލަކަށްޖެހޭ ޢާމްދަނީ މިވަގުތު ހުރީ 13،000 ޑޮލަރުގައިކަން ފާހަގަކުރައްވާ ވަޒީރު ޒަމީރު ވިދާޅުވީ، އެއަދަދު 17،000 ޑޮލަރަށް އިތުރުކުރުމަކީ ރައީސް ޑރ.މުޙައްމަދު މުޢިއްޒުގެ ވައުދުފުޅެއް ކަމަށެވެ.

މިކަން ހާސިލު ކުރުމަށްޓަކައި، އެސްއެމްއީތައް ތަރައްގީކޮށް ލާޖް އެންޓަޕްރައިޒަސް އިންވެސްޓްކޮށްގެން ވިޔަފާރިވެރިންނަށް ފުރުސަތު ހޯދައިދޭން ސަރުކާރުން މަސައްކަތްތަކެއް ކުރަމުންދާ ކަމަށާއި، އެކަމަށްޓަކައި ހާއްސަ ބޭންކެއް ހުޅުވުމުގެ މަސައްކަތް ކުރަމުންދާ ކަމަށެވެ.

އެގޮތުން ޗައިނާގެ ބޭންކެއްގެ ބްރާންޗެއް ރާއްޖެއަށް ގެނައުމުގެ އެމްއޯޔޫގައި ސޮއިކުރުމުގެ މަސައްކަތްތައް ކުރަމުންދާ ކަމަށް ވަޒީރު ވިދާޅުވިއެވެ.

"13 ހާސް ޑޮލަރުން 17 ހާސް ޑޮލަރަށް ސްޕޭސް އިތުރުކުރައްވާފައި އެ އިތުރުކުރެއްވުމަށްޓަކައި ދެން ކުރައްވާ ކަންކަން، އޭގެ ތެރޭގައި ޑިވެލޮޕްމަންޓް ބޭންކެއްގެ ވާހަކަ އެ ވިދާޅުވީ، އޭގެ އިތުރުން ޗައިނާގެ އިތުރު ބޭންކެއް ރާއްޖެއަށް ގެނައުމަށްޓަކައި އެމްއޯޔޫއެއްގައި އެބަ ސޮއި ކުރޭ"

ވަޒީރު ޒަމީރު ވިދާޅުވިއެވެ.

މީގެ އިތުރުންވެސް ވަޒީރު ޒަމީރު ވިދާޅުވީ، އެބޭފުޅާ އެންމެ ފަހުން ޗައިނާއަށް ކުރެއްވި ދަތުރުފުޅުގެ ތެރެއިން ޗައިނާގެ ބޭންކަކުން ރާއްޖޭގައި ބްރާންޗެއް ހުޅުވުމަށްޓަކައި ޝައުގުވެރިކަން ފާޅުކޮށްފައިވާކަމަށް އެގައުމުގެ ފޮރިން މިނިސްޓަރު ހާމަކޮށްފައިވާ ކަމަށާއި، އެކަމަށްޓަކައި ކުރަން ޖެހޭ މަސައްކަތްތައް ރާއްޖެއިން ޗައިނާ އަށް ކަނޑައަޅުއްވާފައި ހުންނަވާ ސަފީރު ކުރައްވަމުން ގެންދަވާ ކަމަށެވެ.

އެއީ ކޮން ބޭންކެއް ކަމެއް އަދި މިކަމާއި ގުޅޭ އިތުރު ތަފްސީލެއް މިހާތަނަށް ސަރުކާރުން ހާމަކޮށްފައެއް ނުވެއެވެ.