މިހާތަނަށް ފެނިފައިވާ އެންމެ ފުރިހަމަ ސްޓެގޮސޯރަސްގެ ފޮސިލްސް އާއްމުންނަށް ދައްކާލައިފި

މިހާތަނަށް ފެނިފައިވާ އެންމެ ފުރިހަމަ ސްޓެގޮސޯރަސް ފޮސިލްސް (ގައު ކަށި)ތަކުގެ ތެރެއިން އެއް ފޮސިލްސް، "އެޕެކްސް" އެމެރިކަން މިއުޒިއަމް އޮފް ނެޗުރަލް ހިސްޓްރީން އިއްޔެ ދައްކާލައިފިއެވެ.

11 ފޫޓު (3.4 މީޓަރު) އުސްމިނުގައި އަދި 20 ފޫޓު (6 މީޓަރު) ދިގުމިނުގައިވާ މި ޖުރާސިކް ޕީރިއަޑްގެ ޑައިނޯސޯގެ ސްކެލެޓަން ދައްކާލާފައިވަނީ ސްކޫލް ކުދިން ތަކަކާއި މީޑިއާގެ ތަކަށެވެ.

މިއުޒިއަމްގެ ޑައިނޯސޯ ކިއުރޭޓަރ ރޮޖަރ ބެންސަން ބުނި ގޮތުގައި މި ފޮސިލްއާ މެދު ކުދިންނާއި މީހުން ވަރަށް ޝައުޤުވެރިވާ ކަމަށާ، އޭގެ މައިގަނޑު ސަބަބަކީ ސްޓެގޮސޯރަސްއަކީ ކުދިންގެ މެދުގައި މަޝްހޫރު ޑައިނޯސޯއެއް ކަމަށްވުމެވެ.

ސްޓެގޮސޯރަސްއަކީ ހަތަރު ފައިގައި ހިނގާ، ގާތްގަނޑަކަށް 150 މިލިއަން އަހަރު ކުރިން ޖުރާސިކް ޕީރިއަޑްގައި ދިރިއުޅުނު ގަސް ކާ (ހާބިވޯރ) ޑައިނޯސޯއެކެވެ. މި ބާވަތުގެ ޑައިނަސޯގެ ފޮސިލްތައް ފުރަތަމަ ފެނުނީ 1870 ގެ އަހަރުތަކުގައެވެ.

އަދި އިއްޔެ ދައްކާލި ސްޓެގޮސޯރަސް ފޮސިލް ފެނިފައިވަނީ ކޮލޮރާޑޯއިންނެވެ. އޭތި، މިދިޔަ ޖުލައި މަހު ސޮތުބީސްގެ ނީލަމެއްގައި ރެކޯޑު އަގެއް ކަމަށްވާ 44.6 މިލިއަން ޑޮލަރަށް ވިއްކާލެވުނެވެ. މި ފޮސިލް ގަތް ފަރާތުން ވަނީ އެމެރިކާގެ އެންމެ ނަންހުރި ނެޗުރަލް ހިސްޓްރީ މިއުޒިއަމްތަކުގެ ތެރެއިން އެއް މިއުޒިއަމް ކަމަށްވާ ނިއު ޔޯކްގެ މި މިއުޒިއަމަށް މީތި ދޫކޮށްފައެވެ.