މޯލްޑިވްސް އެކްސްޕޯގެ ސަރުކާރު ކުންފުނިތަކުގެ ބައިން 1 ވަނަ ސްޓެލްކޯއަށް

މޯލްޑިވްސް އެކްސްޕޯ 2025 ގައި ސްޓޭޓް އޯންޑް އެންޓަރޕްރައިސަސް (އެސް.އޯ.އީ) ކެޓަގަރީން ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އެއްވަނަ ލިބިއްޖެއެވެ.

މޯލްޑިވްސް އެކްސްޕޯގެ އިނާމު ދިނުމަށް ރޭ ސޯޝަލް ސެންޓަރުގައި ބޭއްވި ރަސްމިއްޔާތުގައި ސްޓެލްކޯގެ މެނޭޖިން ޑިރެކްޓަރު ހުސެން ފަހުމީއާ މި އިނާމް ހަވާލުކުރެއްވީ ރައީސް މުހައްމަދު މުއިއްޒެވެ.

އެކްސްޕޯގައި ސްޓެލްކޯ އިން ދައްކާލީ "ރީޖަނަލް ސްކާޑާ" ސިސްޓަމެވެ. މިއީ ސްޓެލްކޯއިން ޚިދުމަތްދޭ ހުރިހާ ރަށެއްގެ ކަރަންޓު އުފެއްދުމުގެ އެންމެހާ ކަންކަން މޮނިޓަރ ކުރުމަށް އެ ކުންފުނިން ތަރައްޤީކޮށްފައިވާ ނިޒާމެކެވެ.

މި ނިޒާމުގެ ސަބަބުން ދިމާވާ މައްސަލަތައް އަވަހަށް ހައްލުކުރެވި، ކުއްލި އަކަށް ކަރަންޓު ކެނޑުން މަދުކުރެވޭނެ ކަމަށާއި، އަދި ކުރިމަގުގައި ކަރަންޓަށް ބޭނުންވާނެ މިންވަރު ދެނެގަތުމަށް ފަސޭހަވާނެ ކަމަށް ސްޓެލްކޯއިން ބުނެފައިވެއެވެ.

"މި ކާމިޔާބީއަކީ އަޅުގަނޑުމެންގެ ޓީމުގެ ހުނަރުވެރިކަމާއި އުފެއްދުންތެރިކަން ދައްކުވައިދޭ ކަމެއް. މި ކާމިޔާބީގައި ހިއްސާވާ ސްޓެލްކޯގެ އެންމެހާ މުވައްޒަފުންނަށް ޝުކުރު ދަންނަވަން. މިއީ އެ ބޭފުޅުންގެ ބުރަ މަސައްކަތާއި ވަފާތެރިކަމުގެ ނަތީޖާ."ސްޓެލްކޯއިން ބުނެފައިވެއެވެ.

ރާއްޖޭގެ އުފެއްދުންތެރިކަން އިތުރުކޮށް، ވިޔަފާރި ފުޅާ ކުރުމުގެ މަގްސަދުގައި އިކޮނޮމިކް މިނިސްޓްރީ އާއި ބީސީސީ ގުޅިގެން ބާއްވާ މޯލްޑިވްސް އެކްސްޕޯ ކުރިއަށްދަނީ މި މަހުގެ ނިޔަަލަށް ހުޅުމާލޭ ސެންޓްރަލް ޕާކުގަ އެވެ.