ރައީސް ޞާލިހުގެ ސަރުކާރުން ގޯތި ދިނީ ބަލާލުމެއްނެތި ހިތުހުރި ތަނަކުން ބިން ކަނޑާފައި: ރައީސް ޔާމިން

ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން ހުޅުމާލެއިން ގޯތި ދީފައިވަނީ، ލޭންޑް ޔޫސް ޕްލޭނަށް ބެލުމެއްނެތި ހިތުހުރި ގޮތަކަށް ކަމަށް ކުރީގެ ރައީސް އަބްދުالله ޔާމީން އަބްދުލް ގާއްޔޫމް ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައި ވަނީ ހޮނިހިރު ދުވަހުގެ ރޭ ރައީސް ޔާމީން އަލަށް އުފައްދަވާ ޕާޓީ ޕީއެންއެފް ގެ ފަރާތުން ރައްޔިތުންގެ މަޖިލިސް އިންތިހާބުގައި ވާދަ ކުރެއްވުމަށް ޝައުގުވެރިކަން ފާޅުކޮށްފައިވާ ކެނޑިޑޭޓުން ތައާރަފް ކުރުމަށް ބޭއްވި ޖަލްސާގައި ކެންޑިޑޭޓަކާ ކުރެއްވި ސުވާލެއްގެ ތެރެއިންނެވެ.

އެގޮތުން ހުޅުމާލެ ދާއިރާއަށް ވާދަކުރައްވާ ކެންޑިޑޭޓަކަށް އަމާޒު ކުރައްވައި ކުރެއްވި ސުވާލުގެ ތެރެއިން ރައީސް ޔާމީން ވަނީ ހުޅުމާލޭ ފޭސް އެކެއް އަދި ފޭސް 2 ވެސް ހިއްކާފައިވަނީ، މާލެ ތޮއްޖެހި، މާލޭގެ ބޯހިޔާވަހިކަމަށް ދަތިތަކާއި ކުރިމަތިލާން ޖެހުމުން ކަމަށެވެ.

އެގޮތުން އެ މައްސަލަ ހައްލު ކުރުމަށް ކުރީގެ ރައީސް މައުމޫނު އަބްދުލްގައްޔޫމް ގެ ވެރިކަމުގާއި، ރައީސް ޔާމީންގެ ވެރިކަމުގައި ހުޅުމާލޭގެ ފޭސް 1 އަދި 2 ހިއްކައި ތަރއްގީ ކުރަން ފެށުނު ކަމަށް ޔާމީން ވިދާޅުވިއެވެ.

މިއާއެކު ރައީސް ޔާމީން ވިދާޅުވީ، އެ ދެ ޝަހަރުވެސް ހިއްކައި ތަރައްގީ ކުރެވުނީ އެތަނުގެ ބިން ބޭނުން ކުރާނެ ގޮތުގެ ޕްލޭން އަކާއި އެކު ކަމަށާ، އެހެން ނަމަވެސް ރައީސް ޞާލިހު ގެ ސަރުކާރުން، އެ ޕްލޭން އަށް ބެލުމެއް ނެތި ހުޅުމާލެއިން ގޯތި ކަނޑާފައި ދީފައިވާ ކަމަށެވެ.

މިކަހަލަ ބޮޑު ޝަހަރެއް ގާއިމް ކުރާއިރު، އޮންނާނެ ބޮޑު ޕްލޭން ތަކެއް ސަރުކާރުގެ. ތަސައްވުރު ތަކެއް އޮންނާނެ. ލޭންޑް ޔޫސް ޕްލޭން، ބިން ބޭނުން ކުރާނެ ގޮތުގެ ޕްލޭން އެއް އޮންނާނެ. ބިން ބޭނުން ކުރާނެ ގޮތުގެ ޕްލޭނެއް ނެތި، އެފަހަރަކު ޖެހުނު ގޮތަކަށް އެފަހަރަކު ކުރާ ކަމަށް ވަންޏާ، މާލޭގައި މިއޮތް ދަތިކަން ހުޅުމާލެ އަށް އަންނާނެ. މިދިޔަ އިބްރާހީމް މުހައްމަދު ޞާލިހުގެ ސަރުކާރުން، މިގޮތަށް ހަދާފައި ހުރި ޕްލޭންތަކަށް ހަމަ އެއްވެސް ގޮތަކަށް ބަލާލުމެއް ނެތި، ހިތުހުރި ތަނަކުން ހަމަ ބިން ކަނޑާފައި

ކުރީގެ ރައީސް ޔާމީން އަބްދުލްގައްޔޫމް

ޔާމީން އިތުރަށް ވިދާޅުވީ މާލޭގައި ސިޓީ ކައުންސިލެއްވެސް އެބައޮތް ކަމަށާއި އެހެން ކަމުން މާލޭގައި ބިންތަށް ދޫކުރާއިރު މާލޭގެ ކޮންމެ އަވަށެއްގެ ނުވަތަ ދާއިރާއެއްގެ މީހުންގެ ގެނެސްގެން ބިން ދޫކުރާނެ ގޮތުގެ މަޝްވަރާތަކެއް ކުރެވެން ޖެހޭ ކަމަށެވެ.

ކުރީގެ ރައީސް އިބްރާހީމް މުޙައްމަދު ސާލިހުގެ ވެރިކަމުގެ ފަހުކޮޅު ވަނީ ހުޅުމާލެއާއި ގުޅީފަޅު އަދި ގިރާވަރުފަޅުން، ފަޅުތެރެއިންވެސް ގޯތި ދޫކޮށްފައެވެ. އެގޮތުން މި ސްކީމްގެ ދަށުން ހުޅުމާލެއިން 1351 ބިމާއި، ގުޅީފަޅުން 2218 ބިން އަދި ގިރާވަރުފަޅުން 5432 ބިން ދީފައިވެއެވެ.