ބައެއް މީހުން ދައްކާ ވާހަކަތަކުން އިހުސާސް ވަނީ ގައުމުގައި ހަމަޖެހުން ބޭއްވުމަށް ބޭނުންނުވާކަން: ރައީސް މުޢިއްޒު

ބައެއް ފަރާތްތައް ދައްކާ ވާހަކަތަކުން އިހުސާސް ވަނީ ގައުމުގައި ހަމަޖެހުން ބޭއްވުމަށް ބޭނުންނުވާކަން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ޕްރޮގްރެސިވް ކޮންގްރެސް ކޯލިޝަންގެ ކެމްޕެއިންނަށް ރޭ ހިޔާ ސަރަހައްދުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނު ވެވަޑައިގެންނެވި އެންމެ މުހިންމު އެއް ވައުދަކީ ގައުމުގައި ހަމަޖެހުން ގާއިމް ކުރެއްވުން ކަމަށެވެ.

ރައީސް ވިދާޅުވި ގޮތުގައި ރާއްޖެއަކީ ވެރިކަންތައް ބަދަލުވެގެން އަންނަ ހިނދު ބަދަލު ހިފުމުގެ ރޫހެއް އޮތް ގައުމެއް ކަމަށާ، ކުރިން ވެރިކަން ކުރެއްވި ބޭފުޅުންނާއި ސިޔާސީ ބޭފުޅުން ޖަލަށް ލުމުގެ ނުބައި އޮއިވަރެއް އެނބުރެމުން ދާ ގައުމެކެވެ.

ނަމަވެސް އެ ބަދަލު ހިފުމުގެ ރޫހު ނައްތާލައްވަން ޖެހޭ ކަމަށާ މި ގައުމަކީ ހަމަޖެހޭ ގައުމެއްގެ ގޮތުގައި ބޭއްވުމަށް މަސައްކަތްޕުޅު ކުރައްވަމުންގެންދަވާ ކަމަށް ރައީސް ވިދާޅުވިއެވެ.

"ބަދަލުހިފުމުގެ ރޫހެއް ނެތް، ބޭނުންވަނީ ހަމަޖެހޭ ގައުމެއް، އަޅުގަނޑު އެކަން ގަބޫލު ނުކުރަން. އަޅުގަނޑު ކެމްޕޭން ތެރޭގައި ވީ ވައުދަކީ ބަދަލު ނުހިފާނެ ވާހަކަ، ބަދަލު ހިފުމުގެ ރޫހު ނެތިގެންދާ ހަމަޖެހޭ ގައުމެއްގެ ގޮތުގައި ބޭއްވުމަށް މަސައްކަތް ކުރަމުން މިދަނީ،"

ރައީސް ޑރ. މުހައްމަދު މުއިއްޒު

ރައީސް ވިދާޅުވީ، ބަދަލު ހިފުމުގެ ރޫހު ނުގެންގުޅުއްވައި، ގައުމުގައި ހަމަޖެހުން ގާއިމް ކުރެއްވުމަށް އެމަނިކުފާނު މަސައްކަތް ކުރައްވަމުންދާއިރުވެސް، ބައެއް ބޭފުޅުންގެ ވާހަކަތަކުން ގައުމުގައި ހަމަޖެހުން ބޭއްވުމަށް ބޭނުންނުވާކަމުގެ އިހްސާސްވެވަޑައިގަންނަވާ ކަމަށެވެ.

ބައެއް ބޭފުޅުން ދައްކަވާ ވާހަކަތައް، ޕޯޑިއަމްތަކުގަޔާއި، މައިކް ތަކުގެ ބޭނުން ހިއްޕަވައިގެން، ދައްކާ ވާހަކަތަކުން އަޅުގަނޑުމެންނަށް މި އިހްސާސްވަނީ، އެބޭފުޅުންގެ ހިތްތަކުގައި މިގައުމުގައި ހަމަޖެހުން ގާއިމްކުރަން ބޭނުން ނުވާކަމުގެ އިހްސާސް. އަޅުގަނޑުމެންގެ ކިބައިން ބަދަލު ހިފަން، ދިވެހި ރައްޔިތުންގެ ކިބައިން ބަދަލު ހިފަން ބޭނުންވެފައި ތިބު ކަމުގެ އިހްސާސް

ރައީސް ޑރ. މުހައްމަދު މުއިއްޒު

ރައީސް މުޢިއްޒު ވިދާޅުވީ ބަދަލު ހިފުމުގެ ރޫހުގައި ތިބި ބައެއްގެ އަތްމައްޗަށް މަޖިލިސް ދޫކޮށްލާފިއްޔާ އެބޭފުޅުން ބަދަލު ހިފުމަށްޓަކައި ގައުމު ހަމަނުޖެހުމުގެ ތެރެއަށް ގެންދަވާނެ ކަމަށެވެ. އަދި ދޭދޭ އަފްރާދުންގެ މެދުގައި ހިތުގައި ހުރި ހިޔާލުތަފާތުވުންތަކާއެކު މައާފު ކުރުމާއެކު ގައުމީ ވިސްނުން އިސްކުރަންޖެހޭ ކަމަށް ވެސް ރައީސް ވިދާޅުވިއެވެ.