ގައުމުގެ ސިޔާދަތަށް ހިޔަނި އެޅިއްޖެ، ގައުމު މިދަނީ ނުބައި މިސްރާބަކަށް: އާދަމް ޝަރިފު

ދިވެހިގައުމުގެ ސިޔާދަތަށް ހިޔަނި އެޅި، ގައުމު މިހާރު ދަނީ ނުބައި މިސްރާބަކަށް ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފު ވިދާޅުވެއްޖެއެވެ.

ކުރީގެ ރައީސް އަބްދުﷲ ޔާމީން އަބްދުލްގައްޔޫމު މިނިވަން ކުރުމަށް ގޮވައިލައި، އިދިކޮޅު ކޯލިޝަނުން ރޭ ޕީޕީއެމްގެ އޮފީހުގައި ބޭއްވި ބައްދަލުވުމުގައި ވާހަކަދައްކަވަމުން އާދަމް ޝަރީފު ވިދާޅުވީ، ގައުމާއި ރައްޔިތުންނާ މެދު ބޭރުގެ ފަރާތްތަކުގެ ހިތްތަކުގައި ނަފުރަތު އުފެދޭ ގޮތަށް ސަރުކާރުގެ ބައެއް އިސްވެރިން ވާހަކަ ދައްކަވަމުން ގެންދަވާ ކަމަށެެވެ.

މިހުރިހާ ކަމެއްގެ ގެއްލުން އާޚިރުގައި ލިބޭނީ ހަމަ ދިވެހި ރައްޔިތުންނަށް ކަމަށާއި މިއީ އިންތިހާއަށް ކަންބޮޑުވާ ކަމެއް ކަމަށް އޭނާ ވިދާޅުވިއެވެ.

ރައީސް ޔާމީންގެ ވެރިކަމުގައި ދިފާއީ ވަޒީރުކަން ކުރައްވާފައިވާ އާދަމް ޝަރީފު ވިދާޅުވީ ރައީސް ޔާމީންގެ ވެރިކަމުގައި އަމަލުކޮށްފައިވާނީ ވީހާވެސް ރަގަޅަށް ގައުމުގެ ކަންކަން ކުރިޔަށް ގެންދިއުމަށް ކަމަށެވެ.

އެކަމަކު މިހާރު ފެނިގެން މިދަނީ ރައްޔިތުންނަށް ވަރަށް ބޮޑަށް އޮޅުވައިލުމާއި ނޭއްގާނީ ކަންތައްތަކުގެ ތެރެއިން ރައްޔިތުންގެ އަތުގައި އޮންނަ ބާރުތައްވެސް ނަގައި، ރައްޔިތުން ދޭންޖެހޭ ވޯޓްވެސް އޮޅުވައިލުމަށް މަސައްކަތް ކުރާ މަންޒަރު ކަމަށް ޝަރީފު ވިދާޅުވިއެވެ.

އޭނާ ވިދާޅުވީ ލޯކަލް ކައުންސިލު އިންތިހާބަށް ސަރުކާރުން ވަރަށްބޮޑަށް ނުފޫޒު ފޯރުވަން މަސައްކަތްކުރާތަން ފެންނަ ކަމަށެވެ.

'' ރާއްޖޭގައި ތިއްބެވި ހުރިހާ ކައުންސިލަރުންގެނެސް، މާލެ ކައިރީގައި ރައީސް ޔާމީންގެ ސަރުކާރުން ހެދި މުތީއެއް ފަދަ ރަށަށް ގެންގޮސްފައި، އެރަށުގައި ދައުލަތުން ބޮޑު ހަރަދުކޮށްގެން އެ ބޭއްވި ބައްދަލުވުމެއް ބާއްވައި ގޮވާލަމުން އެދިޔައީ އެމްޑީޕީއަށް ވޯޓް ދިނުމަށް. މިއިން އެނގޭ އެއްޗަކީ ދައުލަތުން ހަރަދުކޮށްގެން އެމްޑީޕީއަށް ވޯޓް ހޯދައިދިނުމަށް ސަރުކާރުން މިއަދު މަސައްކަތް ކުރަން ފަށައިފިކަން.'' އާދަމް ޝަރީފު ވިދާޅުވިއެވެ.

އާދަމް ޝަރީފު ވިދާޅުވީ އެއީ ސީދާ ލޯކަލް ކައުންސިލު އިންތިހާބަށް ނުފޫޒު ފޯރުވުމާއި ދައުލަތުގެ މުދަލާއި ފައިސާ ބޭނުންކޮށްގެން ކޮރަޕްޝަން ހިންގުމާއި ރައްޔިތުންނަށް އަނިޔާވެރިވުމަށް ހިންގާ ބޮޑު ޖަރީމާއެއް ކަމަށެވެ.

އާދަމް ޝަރީފު ސިފަކުރެއްވި ގޮތުގައި ރައީސް ޔާމީންގެ ސަރުކާރުގައި ބިން ހިއްކައިގެން ހެދި މުތީއެއް ފަދަ ރަށަކީ އެބޫދޫ ފަޅު ހިއްކައިގެން ތަރައްގީ ކޮށްފައިވާ ކްރޮސްރޯޑްސް އެވެ. ކައުންސިލަރުންނަށް އަމާޒުކޮށް ރައީސް އޮފީހުން ބޭއްވި "ވިއަވަތި ރާއްޖެ" ބާއްވާފައިވަނީ ކްރޮސްރޯޑްސް ގައެވެ.