ވައިގެ މަގުން ރާއްޖެއަށް އެތެރެކުރަން އުޅުނު 12 މިލިއަން ރުފިޔާގެ މަސްތުވާތަކެތި އަތުލައިގެންފި

ވައިގެ މަގުން ރާއްޖެއަށް އެތެރެކުރަން އުޅުނު 12 މިލިއަން ރުފިޔާގެ މަސްތުވާތަކެތި އަތުލައިގެންފިއެވެ.

މި މައްސަލައާއި ގުޅޭގޮތުން މިއަދު އިސްކަންދަރު ކޮށީގައި ފުލުހުންނާއި ކަސްޓަމްސް ގުޅިގެން ބޭއްވި ނޫސްވެރިންގެ ބައްދަލުވުމެއްގައި ކަސްޓަމްސް އިންޓެލިޖެންސްގެ ހެޑް ސުޕްރިޓެންޑެންޓް އޮފް ކަސްޓަމްސް މުހައްމަދު އަފްޒަލް ވިދާޅުވީ، މިދިޔަ ހޮނިހިރު ދުވަހުގެ ހެނދުނު އީކޭގެ ފްލައިޓަކުން ރާއްޖެ އައި މެލޭޝިއާގެ މީހެއްގެ ދަބަހުން ފެނުނު 15.38 ކިލޯގެ މަސްތުވާތަކެތީގެ އަގު 12.4 މިލިއަން ރުފިޔާ އަށް އަރާކަމަށެވެ.

އެމީހާ ރާއްޖެ އަށް އެތެރެކުރަން މަސައްކަތް ކުރަނިކޮށް އަތުލައިގެންފައިވަނީ މަސްތުވާތަކެތީގެ ބާވަތެއް ކަމަށްވާ ކެނަބިސްއެވެ.

އަފްޒަލް ވިދާޅުވީ، މިއީ މެލޭޝިއާ މީހަކު ރާއްޖެއަށް މަސްތުވާތަކެތި އެތެރެކުރަން އުޅެނިކޮށް އަތުލައިގެން ފުރަތަމަ ފަހަރު ކަމަށާއި، މިއީ ބަރުދަނުގެ ގޮތުން ބަލާއިރު މި އަހަރު މިހާތަނަށް އަތުލައިގެން އެންމެ ބޮޑު އަދަދުގެ މަސްތުވާތަކެތި ކަމަށެވެ.

މިމީހާ ދަތުރުކުރި ރޫޓް އޮޅުވާލަން އެ މީހާ މަސައްކަތް ކޮށްފައިވާކަން ފާހަގަކުރަމުން  އަފްޒަލް ވިދާޅުވީ، ކަސްޓަމްސްއިން މީނާ ބަލައި ފާސްކުރުމުގެ ތެރޭގައި މީނާގެ އަތުން ފޭކް ޓިކެޓެއް ވެސް ފެނުނު ކަމަށާއި، އޭނާ ރާއްޖެއަށް އައިސްފައިވަނީ ބެންކޮކުން ދުބާއީއަށް ގޮސް، ދުބާއީ މަގުން ކަމަށެވެ.

"ކަސްޓަމްސްއިން މީނާ ބަލައި ފާސްކުރުމުގެ ތެރޭގައި މީނާގެ އަތުން ފޭކް ޓިކެޓް ވަނީ ފެނިފައި. މީނާ ރާއްޖެ އައިސްފައިވަނީ ބެންކޮކުން ދުބާއީއަށް ގޮސް، ދުބާއީން މާލެއަށް،"

އަފްޒަލް ވިދާޅުވިއެވެ.

މިކަމުގައި ޖުމުލަ ހަތަރު ގައުމެއްގެ މީހުންގެ ބައިވެރިވުން އޮތް ކަމަށް ފުލުހުން ތުހުމަތުކުރާއިރު، ނާކޮޓިކްސް ކޮންޓްރޯލް އޮޕަރޭޝަންގެ ހެޑް ޗީފް އިންސްޕެކްޓަރު އޮފް ޕޮލިސް އިބްރާހިމް އިމްރާން ވިދާޅުވީ ފުލުހުން ވަނީ މި މައްސަލައާއި ގުޅުން ހުރި 41 އަހަރުގެ ފިރިހެނަކު މިދިޔަ ހޮނިހިރު ދުވަހު ހައްޔަރު ކޮށްފައެވެ.

މި މައްސަލައިގައި މިހާތަނަށް ދިވެއްސެއްގެ ބައިވެރިވުން އޮތް ކަމަށް ތުހުމަތު ނުކުރެވޭއިރު، ހައްޔަރު ކުރި 44 އަހަރާއި 41 އަހަރުގެ ދެ ފިރިހެނުން ކޯޓަށް ހާޒިރުކުރުމުން ފަސް ދުވަހަށް ބަންދުކުރުމަށް ވަނީ އަމުރުކޮށްފައެވެ.

މި މައްސަލައިގެ ތަހުގީގު ފުލުހުން ބޭރުގެ އިދާރާތަކާ ގުޅިގެން ކުރަމުން އަންނައިރު، މި މައްސަލައިގައި ހިމެނޭ އިތުރު ބަޔަކު އަދިވެސް އެބަތިބި ކަމަށް ގަބޫލުކުރެވޭކަމަށް ފުލުހުން ބުނެއެވެ.