ރާއްޖެއަށް ލިބުނު ތަރައްޤީގައި, ޔޫއެންޑީޕީގެ ދައުރު ބޮޑު: ރަައީސްް

ތަރައްޤީގެ މަގުގައި ދިވެހިރާއްޖެ މިއަދު ހޯދާފައިވާ ކުރިއެރުމުގައި ޔޫއެންޑީޕީގެ ދައުރު ވަރަށް ބޮޑުކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ޔޫއެންޑީޕީ ރާއްޖޭގެ ގޮތްޕަށް 45 އަހަރު ފުރުން ފާހަގަކުރުމުގެ ރަސްމިއްޔާތުގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، ތަރައްޤީގެ މަގުގައި ރާއްޖެ މިހާތަނަށް ހޯދި ކާމިޔާބީތައް ހާސިލްކުރުމުގައި ޔޫއެންޑީޕީން އަދާކޮށްފައިވަނީ ފާހަގަކޮށްލެވޭފަދަ ދައުރެއްކަމަށެވެ.

ރައީސް ވިދާޅުވީ ރާއްޖޭގައި ޔޫއެންޑީޕީގެ ހަރަކާތްތައް ފެށުމާއެކު، ރާއްޖޭގެ ދެމެހެއްޓެނިވި ތަރައްޤީގެ ލަނޑުދަނޑި ހާސިލްކުރުމަށް ޔޫއެންޑީޕީން ވަރަށްބޮޑު އެހީތެރިކަމެއް ވެދީފައިވާކަމަށެވެ. އަދި ރައްޔިތުންނަށް ކުރިމަތިވި ގޮންޖެހުންތަކާއި، ކުރިމަތިވި އުނދަގޫތަކުން ސަލާމަތްވުމަށް ޔޫއެންޑީޕީގެ ފަރާތުން ލިބުނު އެހީތެރިކަން ރައީސް ވަނީ ފާހަގަކުރައްވާފައެވެ.

ޔޫއެންޑީޕީގެ ގޮތްޕެއް ރާއްޖޭގައި ހުޅުވި އެ އޮފީހުގެ މަސައްކަތް ފެށުނީ، 1978 ވަނަ އަހަރެވެ. މި ރަސްމިއްޔާތުގައި ވާހަކަދައްކަވަމުން ރައީސް ވަނީ ތަރައްޤީނުވެ އޮތް ޤައުމުތަކުގެ ލިސްޓުން ، ތަރައްޤީވަމުން އަންނަ ގައުމަކަށް ރާއްޖެ ބަދަލުވުމުގައި ޔޫއެންޑީޕީން އަދާކުރި ދައުރުގެ މުހިއްމުކަމަށް ވިދާޅުވެފައެވެ.

އެގޮތުން އެންމެ ކުޑަކޮށް ތަރައްޤީވެފައިވާ ޤައުމުތަކުގެ ލިސްޓުން ރާއްޖެ ބަދަލުވުމުގައި ޔޫއެންޑީޕީގެ އެހީތެރިކަން ވަރަށްބޮޑަށް ލިބުނުކަން ފާހަގަކުރައްވަމުން ރައީސްަ ވަނީ ކުރިއަށް އޮތް ތަނުގައިވެސް ރާއްޖެއިން މަސައްކަތްކުރާނީ ޔޫއެންޑީޕީއާއެކުކަމަށް ވިދާޅުވެފައެވެ. އަދި މިރޮނގުން ރާއްޖެއަށް ދިން އެހީތެރިކަން އެހެން ޤައުމުތަކަށްވެސް ފޯރުކޮށްދޭނޭކަމަށް އުއްމީދުކުރާކަމަށް ރައީސް ވަނީ ވިދާޅުވެފައެވެ.

މި ރަސްމިއްޔާތުގައި ރައީސް ވަނީ ޔޫއެންޑީޕީގެ ފަރާތުން ރާއްޖޭގައި ކުރަމުންދާ މަސައްކަތްތައް ދައްކުވައިދޭ މެގަޒިން "އައިލެންޑް ލައިފް" ގެ އަދަދު ނެރެދެއްވާފައެވެ. މި ރަސްމިއްޔާތުގައި ސަރުކާރުގެ އިސް ވެރިންނާއި، ޔޫއެންޑީޕީގެ ރާއްޖޭގެ އޮފީހުގެ އިސް އޮފިޝަލުން ބައިވެރިވެ ވަޑައިގެންނެވިއެވެ.