މިހާރު، ދިވެހި ޗެޓް ޖީޕީޓީއިން ދިވެހިބަހުން ދައްކާ ވާހަކަ ލިޔެ، ލިޔެފައި ހުންނަ ލިޔުންތަކަށް އަޑުވެސް އެޅޭނެ!

ދިވެހިރާއްޖޭގެ އާޓިފިޝަލް އިންޓެލިޖެންސް ޕްލެޓްފޯމް – ދިވެހިޖީޕީޓީއިން، ދިވެހިބަހުން ދައްކާވާހަކަ ލިޔެދޭ ޓްރާންސްކްރިޕްޝަން ސިސްޓަމްއެއް ތަޢާރަފްކޮށް އާއްމުކޮށްފިއެވެ. މިފީޗަރ ދިވެހިޖީޕީޓީ ވެބްސައިޓަށް ތަޢާރަފްކޮށްފައިވަނީ ދިވެހި ޖީޕީޓީއަށް އެންމެފަހުން ގެނެވުނު އަދާހަމަކުރުންތަކާއި އެކުގައެވެ.

ސްޕީޗް-ޓު-ޓެކްސްޓް ނުވަތަ ދައްކާވާހަކަ ކޮންޕިއުޓަރުން ލިޔުމަކީ އެހެން ބަސްތަކުގައި ފަސޭހައިން ބޭނުންކުރެވެން ހުންނަ އަދި ގިނަ ބަޔަކު ބޭނުންކުރާ ފީޗަރއެކެވެ. އެހެނަސް ދިވެހިބަހުން މިކަން ކުރެވެން ނުހުރުމުގެ ސަބަބުން ދިވެހިން ލިޔެހެދުމުގައި އަދި ޓްރާންސްކްރިޕް ލިޔެމުގައި ވަރަށް ބޮޑެތި ދަތިތަކާއި ކުރިމަތިވެއެވެ. އެހެންކަމުން މިއީ ގިނަ ބަޔަކު އިންތިޒާރުކުރަމުން ގޮސްފައިވާ ބޭނުންތެރި ފީޗަރއަކަށް ވެގެންދާނެއެވެ.

އެގޮތުން ދިވެހިޖީޕީޓީ މެދުވެރިކޮށް މިހާރު އެއްލިޔުމެއްގެ ގޮތުގައި އަދި ވާހަކަ ދައްކާފައިވާ ފަރާތްތައް ވަކިވަކި ވާގޮތަށްވެސް ދިވެހިބަހުން ވާހަކަދައްކާފައި ހުންނަ އޯޑިއޯތައް ޓްރާންސްކަރައިބް ކުރެވެއެވެ. އަދި މިޓްރާންސްކްރިޕްޝަން އިން ވޯޑް ޑޮކިއުމެންޓް އަދި ސަބްޓައިޓަލް ޑޮކިއުމެންޓް އެކްސްޕޯޓްކުރެވެން ހުރެއެވެ. އަދި ދިވެހިޖީޕީޓީގެ ޗެޓް ފީޗަރސް މެދުވެރިކޮށް ޓްރާންސްކްރައިބްވާ ލިޔުންތައް ޚުލާސާކޮށް ތަރުޖަމާކޮށްވެސް ހެދެއެވެ.

މީގެ އިތުރުން، ލިޔުމުން އަޑަށް (ޓެކްސްޓް ޓު ސްޕީޗް) ބަދަލުކުރުމުގެ ޚިދުމަތްވެސް ވަނީ ތަޢާރަފުކުރެވިފައެވެ. މިހާރު މި ޚިދުމަތް ދެވެނީ "ހައްޖަ" ކިޔާ އަންހެން އަޑަކުން އެކަނި ނަމަވެސް، ކުރިއަށް އޮތް ތަނުގައި އިތުރު އަޑުތައް ތަޢާރަފުކުރުމަށް މަސައްކަތް ކުރެވެމުންދާ ކަމަށް ޖަވާބުން ބުނެއެވެ.

އަދި މިފަދަ ޚިދުމަތް ތަޢާރަފުކުރުމަކީ، ނުކުޅެދުންތެރިކަން ހުންނަ ފަރާތްތަކަށާއި، އޯޑިއޯ ކޮންޓެންޓް އުފެއްދުމަށް ބޭނުންވާ ފަރާތްތަކަށް ވަރަށް ބޮޑު ފަސޭހައެއް ވެގެންދާނެ ކަމެކެވެ.

ދިވެހިޖީޕީޓީއަށް ގެނެވުނު އެހެން މުހިންމު ބަދަލުތަކުގެ ތެރޭގައި ކްރެޑިޓް ސިސްޓަމެއް ތަޢާރަފުކުރުމާއި، އޮފީސްތަކަށް ޚާއްސަކޮށް ޓީމް ޕްލޭންތައް ތަޢާރަފުކުރުން ހިމެނެއެވެ. މި އައު ސިސްޓަމާއެކު، ފަރުދީ އަދި ޓީމް އަގުހެޔޮ ޕްލޭންތަކެއް ވަނީ ތަޢާރަފުކުރެވިފައެވެ.

އިތުރު އައު ފީޗަރތަކުގެ ތެރޭގައި ޢަރަބި، ބަންގާޅި އަދި ހިންދީ ބަހަށް ތަރުޖަމާކުރުމުގެ ޚިދުމަތް ހިމެނެއެވެ. އަދި ގިނަ ފަރާތްތަކުން އެދެމުން ގޮސްފައިވާ ޗެޓް ހިސްޓްރީ ބެލުމުގެ ފީޗަރވެސް ވަނީ މިފަހަރުގެ އަޕްޑޭޓުގައި ގެނެވިފައެވެ.

މި ހުރިހާ އައު ފީޗަރތަކެއް މިހާރުވެސް dhivehigpt.com އިން ލިބެން އެބަހުއްޓެވެ. ދިވެހިޖީޕީޓީގެ މި އައު އަޕްޑޭޓާއެކު ތަޢާރަފުކުރެވުނު ކްރެޑިޓް ސިސްޓަމާއި ޓީމް ޕްލޭންތަކަކީ، ވިޔަފާރިތަކަށާއި އޮފީސްތަކަށް މި ޚިދުމަތް ފުޅާ ދާއިރާއެއްގައި ބޭނުންކުރުމަށް މަގުފަހިކޮށްދޭނެ ކަމެއްގެ ގޮތުގައި ފާހަގަކުރެވެއެވެ. މީގެ އިތުރުން، އަގުހެޔޮ ޕްލޭންތަކާއި އަހަރީ ސަބްސްކްރިޕްޝަންތަކުގެ ފުރުޞަތު ހުޅުވާލުމަކީ، ގިނަ ބަޔަކަށް މި ޚިދުމަތް ލިބިގަތުމަށް ފަސޭހަވެގެންދާނެ ކަމެކެވެ.

ދިވެހިޖީޕީޓީގެ މި އައު އަޕްޑޭޓަކީ، ދިވެހި ބަހުގެ ޑިޖިޓަލް ޓެކްނޮކްނޮލޮޖީގެ ދާއިރާގައި އެޅުނު ވަރަށް މުހިންމު ފިޔަވަޅެއްގެ ގޮތުގައި ފާހަގަކުރެވެއެވެ. މި އައު ފީޗަރތަކުގެ ސަބަބުން، ދިވެހި ބަހުގެ ބޭނުންކުރުން އިތުރުވެ، ޒަމާނީ ޓެކްނޮލޮޖީއާއެކު ދިވެހި ބަސް ކުރިއަރައިގެންދާނެ ކަމަށް ޖަވާބުން އުންމީދުކުރެއެވެ.