ހައިކޯޓުގައި ގިނަ ދުވަސްވެފައިވާ މައްސަލަތައް ނިންމުމަށް ޚާއްސަ މަސައްކަތްތަކެއް ކުރަން ފަނޑިޔާރުން ނިންމައިފި!

ހައިކޯޓުގައި ގިނަ ދުވަސްވެފައިވާ މައްސަލަތައް ނިންމުމަށް ޚާއްސަ މަސައްކަތްތަކެއް ކުރަން ފަނޑިޔާރުން ނިންމަވައިފިއެވެ.

މިކަމާއި ގުޅޭގޮތުން ހައިކޯޓުން ބުނީ، ގިނަ ދުވަސްވެފައިވާ މައްސަލަތައް އަވަހަށް ނިންމުމަށް ކުރާ މަސައްކަތްތައް ކުރާނީ ފިޔަވަހި ތަކަކަށް ބަހާލައިގެން ކަމަށެވެ.

އެގޮތުން ފުރަތަަމަ ފިޔަވަހީގައި ޚާއްސަ އިސްކަމެއް ދީގެން ނިންމުމަށް ހަމަޖެހިފައިވަނީ، 2017, 2018, 2019, އަދި 2020 ވަނަ އަހަރުގެ މައްސަލަތައް ކަމަށް އެ ކޯޓުން ބުނެފައިވެއެވެ.

އެ މައްސަލަތައް ނިންމުމަށް ކޮންމެ ދުވަހަކު ރަސްމީ ގަޑީގެ ފަހުން، 14:15 ގައި އެ މައްސަލަ ތަކަށް ޚާއްސަ ޖާގައެއް ކަނޑައަޅާފައިވާ ކަމަށް އެ ކޯޓުން މައުލޫމާތު ދެއެވެ.

ހައިކޯޓުގައި ނުނިމި ގިނަދުވަސްވެފައިވާ މައްސަލަ ނިންމުމަށް އެކޯޓުން މަސައްކަތް ތަކެއް ކުރުމަށް ފަނޑިޔާރުން ނިންމާފައިވާއިރު، މައްސަލަތައް ގޮތެއް ނުނިމި ދިގުލައި ދެމިގެންދާ ދިޔުމަކީ ވަރަށް ގިނަ އާއްމުންގެ ކަންބޮޑުވުމެއް އަދި ޝަކުވާ އެކެވެ. އޭގެ ސަބަބުން، އެތައް ބައެއްގެ ހައްގުތައް ގެއްލިފައިވާ ކަމަށް އެފަރާތް ތަކުން ބުނެއެވެ.