ރައްޔިތުންނާއި ދުރުގައި މަސައްކަތް ކުރަން ފަސޭހައެއް ނޫން: ރައީސް ޑރ.މުއިއްޒު

ރައްޔިތުންނާއި ދުރުގައި މަސައްކަތްޕުޅު ކުރައްވަން ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް ފަސޭހަފުޅު ނޫންކަމަށް އެމަނިކުފާނު ވިދާޅުވެއްޖެއެވެ.

މިއަދު ހދ.މަކުނުދޫ އަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ، ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ އެމަނިކުފާނު މިހާރު ކުރައްވަމުން ގެންދަވާ ދަތުރުފުޅުތައް ވެސް ކުރައްވާ މައިގަނޑު ސަބަބަކީ ރައްޔިތުންނާއި ގާތުން ޚިދުމަތް ދިނުން ކަމަށާއި އަބަދުވެސް މަސައްކަތްޕުޅު ކުރާ ހިތްވަނީ އެ ގޮތަށް ކަމަށެވެ. އަދި ކުރިން މާލެ ސިޓީ މޭޔަރުކަމުގައި ހުންނެވިއިރު ވެސް މަސައްކަތް ކުރެއްވީ އެ ގޮތަށް ކަން ފާހަގަ ކުރައްވާ ރައީސް ޑރ.މުއިއްޒު ވިދާޅުވީ ރައްޔިތުންނާއި ދުރުގައި މަސައްކަތްޕުޅު ކުރައްވަން ފަސޭހަ ނޫން ކަމަށެވެ.

"ދަތުރުތައް މިކުރާ މައިގަނޑު ސަބަބަކީ ރައްޔިތުންނާއި ގާތުން ޚިދުމަތްދޭން. އަޅުގަނޑު އަބަދުވެސް މަސައްކަތް ކުރާ ހިތްވާ ގޮތް އެއީ. ކުރީގައި މާލޭގައި މޭޔަރަކަށް ރައްޔިތުން ހޮވީމައި ވެސް މަސައްކަތް ކުރީ އެގޮތަށް. އަޅުގަނޑަކަށް ފަސޭހައެއް ނޫން ރައްޔިތުންނާއި ދުރުގައި މަސައްކަތްކުރާ ކަށެއް. އެހެންވީމަ ބޭނުންވަނީ ހަމަ ރަށް ރަށަށް ދާން. ރައްޔިތުންނާއި ގާތުން ކައުންސިލްތަކާއި ބައްދަލުކޮށް، އަދި ރައްޔިތުންނާއި ބައްދަލުކޮށް، ކަންކަން އޮޅުންފިލުވައިން މަސައްކަތް ކުރަން. އެހެންވީމަ އެގޮތުގައި ފެށި ދަތުރުތަކެއް މިއީ."

ރައީސް ޑރ.މުއިއްޒު ވިދާޅުވިއެވެ.

ރައީސް ޑރ.މުއިއްޒު ވިދާޅުވީ މި ދަތުރުތަކުގެ ތެރެއިން ކޮންމެ ރަށެއްގައި ވެސް އެ ރަށެއްގެ ކައުންސިލާއި ރައްޔިތުންނާއި ބައްދަލު ކުރައްވަމުން ގެންދަވާ ކަމަށެވެ. އަދި ނުދެވޭ ރަށްތަކުގެ ކައުންސިލްތައް އެމަނިކުފާނުގެ އަރިހަށް ބައްދަލުކުރުމަށް އަންނަ ކަމަށާއި މި ބުރު ނިމޭއިރު، ކުރިއަށް އޮތް ތިން ހަފްތާ ތެރޭގައި, ރާއްޖޭގެ ހުރިހާ ކައުންސިލްތަކަކާއި އަންހެނުންގެ ތަރައްގީއަށް މަަސައްކަތް ކުރާ ކޮމިޓީތަކާއި ބައްދަލުވާނެ ކަމަށް ރައީސް ޑރ.މުއިއްޒު ވިދާޅުވިއެވެ.

މީގެ އިތުރުންވެސް ރައީސް ޑރ.މުއިއްޒު ވިދާޅުވީ ކޮންމެހެން ދަތުރު ހަދާފައި ކައުންސިލުން، ރައީސް ޑރ.މުއިއްޒާއި ބައްދަލުކުރައްވަން މާލެ އަށް އަންނަން ނުޖެހޭނެ ކަމަށެވެ. އޭގެ ބަދަލުގައި އެމަނިކުފާނު ރައްޔިތުންގެ އަރިހަށް ވަޑައިގަންނަވާނެ ކަމަށާއި، ވަކިން ހާއްސަ ވުޒާރާއެއްވެސް އުފެއްދީ، ރައްޔިތުންނާއި ގާތުން ދުވަހުން ދުވަހަށް ކޮންމެ ކަމެއްގައި ވެސް ސަރުކާރުން ރައްޔިތުންނަށް އިޖާބަ ދިނުމަށް ކަމަށެވެ.