ރާއްޖޭގެ ދަރަނި އިތުރަށް ބޮޑުވާކަށް ނޭދެން، އިސްކަން ދެނީ ހިލޭ އެހީއަށް: ޗައިނާ
ލިޔުންތެރިޔާ
ޚަދީޖާ އަރުފާ
ރާއްޖޭގެ ދަރަނި އިތުރަށް ބޮޑުވިޔަ ނުދީ ހިލޭ އެހީ ފޯރުކޮށްދިނުމަށް އިސްކަންދެއްވާނެ ކަަމަށް ރާއްޖޭގައި ހުންނަވާ ޗައިނާގެ ސަފީރު ވޭންގް ލިޒިން މިއަދު ވިދާޅުވެއްޖެ އެވެ.
މީޑިއާއާ އެކު ބޭއްވެވި ބައްދަލުވުމެއްގައި ނޫސްވެރިންގެ ސުވާލުތަކަށް ޖަވާބު ދެއްވަމުން ސަފީރު ވިދާޅުވީ، ރާއްޖޭއަށް ޗައިނާ އިން ނަގާފައިވާ ލޯނުތައް އަނބުރާ ދެއްކުމުގައި ފަސޭހަ ކުރުމަށްޓަކައި ދެގައުމުގެ ޓެކްނިކަލް ސްޓާފުން މަޝްވަރާތަކެއް ކުރަމުން ގެންދަވާ ކަމަށާއި އަދި ލޯނުތައް ރީސްޓްރަކްޗާ ކުރުމަށް ވިސްނާފައި ނުވާކަމަށެވެ. އަދި ލޯނުތައް ރީސްޓްރަކްޗާ ކުރުމަކީ އޮތް ހައްލެއް ނޫން ކަމަށާއި އެކަން ކޮށްފި ނަމަ ދެން އިތުރަށް ޗައިނާ އިން ފައިނޭންސް ހޯދުމަށް ރާއްޖެ އަށް އުނދަގޫވާނެ ކަމަށް ސަފީރު ވިދާޅުވި އެވެ.
މިއާއެކު ރާއްޖޭގެ ދަރަނި ބޮޑުވާތީ ޗައިނާއިންވެސް ކަންބޮޑުވާކަން ފާހަގަކުރައްވައި ސަފީރު ވިދާޅުވީ ޗައިނާގެ ސިޔާސަތަކީ ރާއްޖޭގެ ދަރަނި ބޮޑުނުވާނެ ގޮތަކަށް ކަންކަން ބައްޓަން ކުރުންކަމަށެވެ
"ތިޔަބޭފުޅުން ވެސް ފާހަގަކުރެވޭނެ މިހާރު ޗައިނާ އިން ރާއްޖެ އަށް ދޫކުރަނީ ގްރާންޓްސް. ސަމާލުކަން ދެނީ ހިލޭ އެހީ ރާއްޖެއަށް ފޯރުކޮށްދޭން، ރާއްޖޭގެ ދަރަނި ބޮޑު ކުރާކަށް ނޫން،"
ރާއްޖޭގައި ހުންނަވާ ޗައިނާގެ ސަފީރު ވޭންގް ލިޒިން
ރާއްޖޭގައި ޗައިނާގެ ހިލޭ އެހީގެ ދަށުން ހިންގަން ނިންމާފައިވާ ބައެއް ކަންކަން ސަފީރު ވަނީ ފާހަގަކުރައްވާފައެވެ. އެގޮތުން ސިނަމާލެ ބްރިޖު މަރާމާތު ކުރުމުގެ މަސައްކަތާއި، ހޮސްޕިޓަލްތަކުގެ ލެބޯޓްރީގެ ވަސީލަތްތައް އިތުރު ކުރުމުގެ މަޝްރޫއުއާއި، ދިވެހި ރުއްތަކަށް ޖެހިފައިވާ މައްސަލަތައް ދެނެގަތުމަށް ފަންނީ އެހީތެރިކަން ފޯރުކޮށްދިނުމާއި، ވިލިމާލޭގައި ހަދާ 100 އެނދުގެ ހޮސްޕިޓަލްގެ މަޝްރޫއު އަދި މާލޭގެ މަގުތައް ތަރައްގީ ކުރުމުގެ މަޝްރޫއު ފާހަގަކުރެއްވިއެވެ.
ސަފީރު ވިދާޅުވީ ޗައިނާ އިން ހިލޭ އެހީގެ ދަށުން ގިނަ ކަންކަން ކޮށްދިން ނަމަވެސް، އެ ގައުމުން ބޭނުންވަނީ ރާއްޖެ އަކީ އިގުތިސޯދީ ގޮތުން އަމިއްލަ ފައިމައްޗަށް ތެދުވެ އޮތް ގައުމަކަށް ވުމަށް ކަމަށާއި އެކަން ކުރެވޭނީ އާމްދަނީ އިތުރު ކުރެވޭނެ އެހެން ސިނާއަތްތައް ފުޅާކޮށްގެން ކަމަށެވެ.
މީގެ އިތުރުން ސަފީރު ވަނީ ޗައިނާއިން ރާއްޖެއަށް ދޫކުރާ ލޯނުތަކަކީ “ދަރަނި ދަންތުރައެއް” ކަމަށް ސިފަ ކުރައްވައި ހުޅަނގުގެ ބައެއް ގައުމުތަކުންނާއި، ކުރީގެ ރައީސް ނަޝީދު ތަކުރާރުކޮށް ދައްކަވަމުންދާ ވާހަކަތަކަށްވެސް ރައްދު ދެއްވާފައެވެ.
އެގޮތުން ވިދާޅުވީ، އެއީ ޗައިނާއާ ދެކޮޅަށް ގެންގުޅޭ އެޖެންޑާއެއް ކަމަށާ، ހިލޭ އެހީ ދެނީ ޗައިނާގެ އަމިއްލަ އެދުމެއް އޮވެގެން މަންފާއެއް ހާސިލް ކުރުމަށް ނޫންކަމަށެވެ.
ސަފީރު ވިދާޅުވީ، ޗައިނާއިން ރާއްޖޭގައި ހިންގާ މަޝްރޫޢު ތަކަކީ ރާއްޖެއިން އެދިގެން ހިންގާ މަޝްރޫއުތައް ކަމަށާ، އެ މަޝްރޫއު ތަކުގެ ޝަރުތުތައްވެސް ކަނޑައަޅަނީ ޜައްޖެއިން ކަމަށެވެ.
"ކޮމާޝަލް މަޝްރޫއުތައް އަދި އެ ނޫން މަޝްރޫއުތައް ވެސް ޗައިނާ އިން ރާއްޖޭގައި ހިންގަނީ ގިނަ މަޝްވަރާތަކެއް ދެ ގައުމުގެ މެދުގައި ކުރުމަށް ފަހު. ޗައިނާ އިން ރާއްޖޭގައި ހިންގާ ހުރިހާ މަޝްރޫއުއަކީ ވެސް ދިވެހި ސަރުކާރުން އެދިގެން ކޮށްދޭ ކަންކަން. ޗައިނާ އިން އަމިއްލައަށް އެދިގެން ނޫނީ އަންގައިގެން ރާއްޖޭގައި ހިންގާ އެއްވެސް ކަމެއް ނޯންނާނެ. މަޝްރޫއުތަކުގެ ހުރިހާ ޝަރުތެއް ވެސް ކަނޑައަޅަނީ ދިވެހި ސަރުކާރުން. ދިވެހި ސަރުކާރުން ފައިނޭންޝަލް ސަޕޯޓަށް ޗައިނާގައި އެދޭ ނަމަ އެކަމެއް ކޮށްދޭން މަސައްކަތް ކުރާނެ އެކަމަކު އެއީ އަމިއްލަ މަންފާއެއް ބޭނުމަކު ނޫން.
ރާއްޖޭގައި ހުންނަވާ ޗައިނާގެ ސަފީރު ވޭންގް ލިޒިން
ރާއްޖޭގެ ޓުއަރިޒަމް އަށް އެކަނި ބަރޯސާ ނުވެ ކުރެވޭނެ އައު ކަންކަން ދެނެގަނެ ލޯނު ނުނަގައި ގައުމަށް އާންމުދަަނީ ވަންނާނެ ކަންކަން ކުރުމަކީ މުހިންމު ކަމެއް ކަމަށް ވެސް ސަފީރު ވިދާޅުވިއެވެ. އޭގެ އިތުރުން، ހުރިހާ ކަމެއް ލޯނުގެ އެހީގައި ކުރުމުގެ ވިސްނުމަކީ ވެސް ގޯސްކަމެއްކަން ފާހަގަ ކުރައްވައި ސަފީރު ވިދާޅުވީ، އަންނަން އޮތް ޖީލުތަކުގެ މައްޗަށް ބޮޑެތި ދަރަނިތައް ދޫކޮށްލައިގެން ނުވާނެ ކަމަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
