އެމް.އެން.ޔޫ "ފަހި ފުރުސަތު" ޖޮބް ފެސްޓިވަލް އަންނަ ޖޫން މަހު ބާއްވަނީ

ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ) އިން އިންތިޒާމުކޮށްގެން ބާއްވާ "އެމް.އެން.ޔޫ ފަހި ފުރުސަތު" (ޖޮބް ފެސްޓިވަލް) މި އަހަރުގެ ޖޫން މަހުގެ 3 އިން 5 އަށް ބޭއްވުމަށް ނިންމައިފިއެވެ.

މި މައުރަޒަކީ ވަޒީފާ ދޭ ފަރާތްތަކާއި، ވަޒީފާ ހޯދާ ފަރާތްތަކުގެ އިތުރުން ޔުނިވަރސިޓީން ދަސްވެނިވާ ދަރިވަރުން އެއްތަނަކުން ބައްދަލުވެ، ވަޒީފާގެ ބާޒާރުގައި ހުރި ފުރުސަތުތަކާ ގުޅޭ މަޢުލޫމާތު ބަދަލުކުރުމަށް ހުޅުވާލެވޭ ރަން ފުރުސަތެކެވެ. "މުޖުތަމައަށް އަނބުރާ ދިނުން" (Giving back to society) މި ޝިއާރުގެ ދަށުން ކުރިއަށްގެންދާ މި ފެސްޓިވަލް އާންމުންނަށް ހުޅުވާލާފައިވަނީ މުޅިން ހިލޭއެވެ.

ފެސްޓިވަލް ކުރިއަށްދާނެ ގޮތް:

މި އިވެންޓް ކުރިއަށްދާނީ ބަޔާންކުރި ތިން ދުވަހުގެ ކޮންމެ ދުވަހަކު ހަވީރު 16:00 އިން ރޭގަނޑު 22:00 އަށެވެ. މާލޭގައި ހުންނަ އެމް.އެން.ޔޫގެ މައި މަރުކަޒުގެ އިތުރުން، އަތޮޅުތަކުގައި ހުންނަ އެމް.އެން.ޔޫގެ ކެމްޕަސްތަކުގައިވެސް މި ފެސްޓިވަލް ކުރިއަށްދާނެ ކަމަށް ޔުނިވަރސިޓީން މަޢުލޫމާތުދެއެވެ.

މި ފެސްޓިވަލްގެ މައިގަނޑު މަޤްޞަދުތަކުގެ ތެރޭގައި ހިމެނެނީ:

ރާއްޖޭގެ އެކި ކަންކޮޅުތަކުގައި ހުރި ވަޒީފާގެ ފުރުސަތުތަކާއި އިންޓާންޝިޕްގެ ފުރުސަތުތައް އާންމުންނަށް ދައްކާލެވޭނެ މާޙައުލެއް ޤާއިމުކުރުން.

އާންމުންނަށް ފަސޭހައިން މަޢުލޫމާތު ނުލިބޭ ތަފާތު ދާއިރާތަކާއި ބްރޭންޑުތަކުގެ ފުރުސަތުތައް ތައާރަފުކޮށްދިނުން.

ސިނާއީ އެކި ދާއިރާތަކުން ހުނަރުވެރިން ބިނާކުރުމަށް ބާރުއަޅައި، އެކަމަށް ޝައުޤުވެރިކަން އުފެއްދުން.

ވަޒީފާގެ ބާޒާރަށް ބޭނުންވާ އުފެއްދުންތެރި، ހުނަރުވެރި ފަރާތްތަކަށް ޔުނިވަރސިޓީގެ ތެރެއިން މަގުފަހިކޮށްދިނުން.

ވޭތުވެދިޔަ 2025 ވަނަ އަހަރު ބޭއްވި ފެސްޓިވަލްގައި ވެސް ސަރުކާރުގެ މުއައްސަސާތަކާއި ރާއްޖޭގެ ބޮޑެތި ކުންފުނިތައް ހިމެނޭހެން 49 ފަރާތަކުން ބައިވެރިވެފައިވެއެވެ.

މި އަހަރުގެ ފެސްޓިވަލްގައި ބައިވެރިވާން ބޭނުންވާ ކުންފުނިތަކާއި މުއައްސަސާތަކަށް މިހާރު ވަނީ އެ ފުރުސަތު ހުޅުވާލާފައެވެ. އެގޮތުން 18 އެޕްރީލް 2026 ވާ ހޮނިހިރު ދުވަހުގެ 23:00 ގެ ކުރިން ތިރީގައިވާ ލިންކު މެދުވެރިކޮށް ރަޖިސްޓްރީވުމަށް ޔުނިވަރސިޓީން އިލްތިމާސްކުރެއެވެ.

ރަޖިސްޓްރީވުމަށް ބޭނުންކުރާނެ ލިންކް:

https://docs.google.com/forms/d/1kHaOJcme2IQQVOCqA9mm-PhANPLk7nWxc8K9K13EYsA/edit