ކޮމިޝަނަރ އޮފް ޕޮލިސް ޢަލީ ޝުޖާޢު މަޤާމުން އިސްތިއުފާ ދެއްވަން ނިންމަވައިފި!

ކޮމިޝަނަރ އޮފް ޕޮލިސްގެ މަޤާމުގައި ހުންނެވި، ޢަލީ ޝުޖާއު މަޤާމުން އިސްތިއުފާ ދެއްވުމަށް ނިންމަވައިފިއެވެ.

ޝުޖާޢު މަޤާމުން އިސްތިއުފާދެއްވަން އުޅުއްވާކަން އިތުބާރުހުރި ފަރާތަކުން ވަނީ ވޮއިސްއަށް ޔަޤީންކޮށްދީފައެވެ. ނަމަވެސް ސީޕީގެ ފަރާތަކުން އަދި ފުލުހުންގެ ފަރާތަކުންވެސް މިކަމުގެ މައުލޫމާތެއް އަދި ނުލިބެއެވެ. ނަމަވެސް ފުލުހުންގެ އެންމެ މަތީ ލެވެލްގައި މިކަމުގެ މަޝްވަރާތައް ކުރަމުންގެންދާކަމަށް މައުލޫމާތު ލިބެއެވެ.

ކޮމިޝަނަރ އޮފް ޕޮލިސްގެ މަޤާމުން ޝުޖާއު އިސްތިއުފާ ދެއްވުމަށް ނިންމަވާފައިމިވަނީ، ހައްވާ ޔުމްނު ރަޝީދު (ޔުމްނު) ވެއްޓުނު މައްސަލާގައި ފުލުހުން ކުރަމުންްގެންދާ ތަހްޤީޤަށް އާއްމުންގެ ގިނަ ބައެއްގެ ފަރާތުން ފާޑުކިއުންތައް އަމާޒުވެފައިވަނިކޮށްކަން ފާހަގަކޮށްލެވެއެވެ. އުމުރުން 21 އަހަރުގެ ޔުމްނު ވެއްޓުނުކަމަށް މައުލޫމާތު ލިބިފައިވަނީ އޭޕްރިލް 18 ވަނަ ދުވަހު ހ. މިޓާޒް ގޭގެ ފުރާޅު މައްޗަށެވެ.

ޔުމްނުގެ ހާދިސާ ތަހްޤީޤް ކުރުމަށް ފުލުހުން އިހުމާލުވަމުންދާކަމަށްބުނެ ބައެއް ފަރާތްތަކުގެ ފާޑިއުންތައް ފުލުހުންނަށް އަމާޒުވެފައިވާއިރު، އެކަމާ ގުޅިގެން މުޒާހަރާތަކެއްވެސް ވަނީ ފަށާފައެވެ. މި މުޒާހަރާގެ ތެރޭގައި ސީޕީ އިސްތިއުފާ ދިނުމަށް ގޮވާލާފައިވާއިރު، ޔުމްނުގެ ތަހްޤީޤުގައި ފުލުހުން ބައެއް ކަންކަން ސިއްރުކުރަމުންދާކަމަށްވެސް އެފަރާތްތަކުން ވަނީ ބުނެފައެވެ.

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ކޮމިޝަނަރ އޮފް ޕޮލިސްކަމަށް ޝުޖާޢު އައްޔަނުކުރައްވާފައިވަނީ، 2023 ވަނަ އަހަރުގެ ޑިސެމްބަރުމަހުގެ 25 ވަނަ ދުވަހުއެވެ. އޭރު ޝުޖާޢު ހުންނެވީ، އެސިސްޓެންޓް ކޮމިޝަނަރ އޮފް ޕޮލިސްގެ މަޤާމުގައެވެ.