ޓޫރިޒަމަށް ގެއްލުންވާ ވާހަކަ ދެއްކުމުގެ ހައްގެއް އެމްޑީޕީއަކަށް ނޯންނާނެ: މެމްބަރު އިބްރާހީމް

ރާއްޖޭގެ ޓޫރިޒަމަށް ގެއްލުންވާ ވާހަކަ ދެއްކުމުގެ އެއްވެސް ހައްގެއް އެމްޑީޕީއަކަށް ނޯންނާނޭކަމަށް، މައްޗަންގޯޅީ އުތުރު ދާއިރާގެ މެމްބަރު، އިބްރާހިމް މުހައްމަދު ވިދާޅުވެއްޖެއެވެ.

ސަރުކާރުން ޓެކްސް ރޭޓަށް ބަދަލުގެނައުމަށް ނިންމި ނިންމުމާ ގުޅޭގޮތުން ދައުލަތުގެ މީޑިއާގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން މެމްބަރު އިބްރާހީމް ވިދާޅުވީ، ޓެކްސްގެ ވާހަކައާ ގުޅުވައިގެން އެމްޑީޕީއަށް ޓޫރިޒަމޭ ކިޔައިގެން ވާހަކަ ދެއްކޭނޭ އެއްވެސް ހަމައެއް ނޯންނާނޭކަމަށެވެ. ސަބަބަކީ އެމްޑީޕީއަކީ ރާއްޖޭގެ ޓޫރިޒަމް ބޮއިކޮޓް ކުރަން ގޮވާލުމުގައި ދިގު ތާރީހެއް އޮތް ބަޔަކަށްވާތީކަމަށް މެމްބަރު ފާހަގަކުރެއްވިއެވެ.

ދިވެހިންގެ ހައިސިއްޔަތުން ބޭރުގެ އެކި މީޑިއާތަކާއި، އެނޫންވެސް ރަސްމީ ތަންތަނުގައި ރާއްޖޭގެ ޓޫރިޒަމް ބޮއިކޮޓްކުރުމަށް އެމްޑީޕީން  މީގެކުރިން ގޮވާލާފައިވާކަމަށާއި، އެކަމުގެ ސަބަބުން ރާއްޖެ އަންނަން ހުރި ބިޔަ އިންވެސްޓްމަންޓްތައް ހުއްޓިފައިވާކަމަށް މެމްބަރު ވިދާޅުވިއެވެ.

ކުރީގެ ސަރުކާރެއްގައި ސައުދީ ސަރުކާރުން 25 ބިލިއަން ޑޮލަރުގެ އިންވެސްޓްމަންޓެއް ރާއްޖެއަށް ގެންނަން ސައުދީން އުޅުނު. އެހެންނަމަވެސް އޭގެ ފައިދާ ރާއްޖެއަށް ލިބިދާނެތީ އެކަމާ ހަސަދަވެރިވެގެން އެކަމާ ދެކޮޅަށް މުޒާހަރާކުރި. އެކަންކަމާ މުޒާހަރާކުރުމުގެ ނަތީޖާއަކަށްވެގެންދިޔައީ ފައިސާހުރި ބާރުވެރި އެމީހުން އަމިއްލައަށް އެ ޓޫރިޒަމް އިންވެސްޓްމަންޓް އެމީހުންގެ ގައުމުގަ ހެދި. ރާއްޖޭގެ ޓޫރިޒަމްގޮތަށް ކޮޕީކޮށްގެން. މިއަދު މިހާހިސާބަށް އާއިރުގައި ސައުދީއަރަބިއްޔާއަށް 23 މިލިއަން ކަސްޓަމަރުން އަހަރުގެ ފުރަތަމަ ދެ ކުއާޓަރުގައި ލިބިއްޖެ

މެމްބަރު އިބްރާހީމް ވިދާޅުވިއެވެ.

މެމްބަރު ވިދާޅުވީ، ސައުދީން ފ އަތޮޅުގައި އެ އިންވެސްޓްމަންޓް ކުރިނަމަ، އެ 23 މިލިއަން މީހުންނަކީ މިއަދު ރާއްޖެއަށް އަންނާނޭ ބައެއް ކަމަށާއި، އެކަހަލަ މުހިއްމު އިގްތިސާދީ ކަންކަން އެމްޑީޕީން ހުއްޓުވާފައިވާކަމަށެވެ.

މިއަދު ޓޫރިޒަމަށް ގެއްލުންވާކަމަށް އެމްޑީޕީން ބުނާއިރު، އެމީހުންގެ ވާހަކަތައް އަބަދުމެ ހުންނާނީ ދިމާ އިދިކޮޅަށްކަން އިބްރާހީމް ފާހަގަކުރެއްވިއެވެ. އޭނާ ވިދާޅުވީ ރައްޔިތުންނާއި ޤައުމުގެ ލާބައަށް ކުރާ ކަންކަމުގައި ރައްޔިތުންގެ މަޖިލީހުގެ ތެރެއިން ސަރުކާރަށް އެއްބާރުލުން ދޭން ޖެހޭނޭ ކަމަށާއި، އެމްޑީޕީން ނަންކުރާ އިނގިރޭސިވިލާތުގައިވެސް ކަންކަން ހިނގަނީ އެމަގުންކަމަށެވެ.

އަންނަ އަހަރު ޓެކްސް ރޭޓަށް ބަދަލުގެނައުމަށް ސަރުކާރުން މަޖިލީހަށް ބިލެއް ހުށަހަޅާފައިވާއިރު، މި ބިލްގައި ވަނީ ޓޫރިޒަމްގެ ބައެއް ޓެކްސްތަކުން މިހާތު ނަގަމުން އަންނަ ރޭޓް އިތުރުކުރުމަށް ހިމަނާފައެވެ.

ޓެކްސް ރޭޓް އިތުރުކުރަން ނިންމުމުން އިދިކޮޅު އެމްޑީޕީން ބުނެފައިވަނީ އެކަމަކީ އެޕާޓީން ރުހޭނޭކަމެއް ނޫންކަމަށެވެ.