ބީއެމްއެލް އެފޯޑަބަލް ހައުސިންގެ 5 މަޝްރޫޢުއެއްގެ އަމަލީ މަސައްކަތް ފަށައިފި

ބީއެމްއެލްގެ އެފޯޑަބަލް ހޯމް ލީސިން ކުންފުނިން ކުރިއަށްގެންދާ އެފޯޑަބަލް ހައުސިންގެ 5 މަޝްރޫޢުއެއްގެ އަމަލީ މަސައްކަތް މިއަދު ރަސްމީކޮށް ފަށައިފިއެވެ.

މިކަމަށްޓަކައި ހުޅުމާލޭގައި ބޭއްވި ހާއްސަ ރަސްމިއްޔާތެއްގައި މި މަޝްރޫޢުތައް ފައްޓަވައިދެއްވީ، ހައުސިން މިނިސްޓަރު ޑރޢަބްދުﷲ މުއްތަލިބާއި، ބީއެމްއެލްގެ ޗެއާޕާަން އަހްމަދު އަލީ ހަބީބާއި، އެ ބޭންކްގެ ސީއީއޯ އަދި މެނޭޖިންގ ޑިރެކްޓަރު މުހައްމަދު ޝަރީފެވެ.

ބީއެމްެލުން ބުނީ މި މަޝްރޫޢުތައް ކުރިއަށްގެންދަނީ ރާއްޖެއާއި ރާއްޖެއިން ބޭރުގެ ބައެއް ކުންފުނިތަކާ ހަވާލުކޮށްގެންނެވެ. ދިވެހި ކުންފުނިތަކުގެ ތެރޭގައި ހިމެނެނީ އަމިން ކޮންސްޓްރަކްޝަން، އެފްޑަބްލިއު ކޮންސްޓްރަކްޝަން، ރަޝީދު ކާޕެންޓްރީ އެންޑް ކޮންސްޓްރަކްޝަންއެވެ. ބޭރުގެ ކުންފުނިތަކުގެ ތެރޭގައި ހިމެނެނީ ބެއިޖިން އާބަން ކޮންސްޓްރަކްޝަން ގްރޫޕް އަދި ޗައިނާ މެޝިނަރީ އިންޖިނިއަރިންނެވެ.

މި ރަސްމިއްޔާތުގައި ވާހަކަދައްކަވަމުން ހައުސިން މިނިސްޓަރު މުއްތަލިބް ވިދާޅުވީ ބީއެމްއެލުން މި ފެށި ބޯހިޔާވަހިކަމުގެ މަޝްރޫޢުއަކީ ބޯހިޔާވަހިކަމުގެ މައްސަލައަށް ހައްލެއް ގެނެސްދޭނެ ނަމޫނާ މަސައްކަތެއް ކަމަށެވެ. މިނިސްޓަރު ވިދާޅުވީ، ބީއެމްއެލްގެ މި މަޝްރޫޢުތައް މި ދައުރުގެ ތެރޭގައި ނިންމާލެވޭނޭ ކަމަށެވެ.

މި މަޝްރޫޢުތައް އެ ކުންފުނިތަކާ ހަވާލުކޮށްފައިވަނީ، އެމްއެމްއޭ އިންކްލޫސިވް ނެޝަނަލް އެފޯޑަބަލް ހައުސިން ސްކީމްގެ ދަށުން ގާއިމްކޮށްފައިވާ ގަވަރނަންސް އަދި ރިސްކް ސްޓޭންޑަރޑްތަކާ އެއްގޮތަށް ކުރިއަށްގެންދިޔަ އިވެލުއޭޝަން މަރުހަލާގެ ތެރެއިންނެވވެ.

ބީއެމްއެލުން ބުނީ މި މަޝްރޫޢުތައް ނިމުމުން ހުޅުމާލެ ފޭސް އެކެއް، ފޭއް 3 އަދި ވިލިމާލޭގައި 3،200 އަށްވުރެ ގިނަ ހައުސިން ޔުނިޓް ކުލިދައްކައި ހަލާސްކުރުމުން މިލްކުވާގޮތަށް ނިސްބަތުން ކުޑަ ކުއްޔަކަށް ދޫކުރާނޭކަމަށެވެ. މިއީ ރާއްޖޭގައި ގެދޮރު ހޯދުމުގައި އޮތް ޑިމާންޑަށް އެކަށީގެންވާ ލުޔެއް ގެނެސްދޭނެ މަޝްރޫޢު ތަކެއްކަމަށް ބީއެމްއެލުން ބުނެއެވެ.