ޑަބްލިޔު ކޮންސްޓްރަކްޝަންއަށް އަލުން ހުއްދަދީފި

މިދިޔަ އަަހަރުގެ ޑިސެމްބަރ މަހުގެ ތެރޭގައި ކޮންސްޓްރަކްޝަން ސައިޓަކުން ސިމެންތި ބަސްތާއެއް ވެއްޓި، ކުއްޖަކު ނިޔާވި ހާދިސާއާއި ގުޅިގެން މަސައްކަތްތައް ހުއްޓުވާފައި އޮތް ޑަބްލިޔު ކޮންސްޓްރަކްޝަންއަށް އެކުންފުނީގެ މަސައްކަތްތައް އަލުން ފެށުމުގެ ހުއްދަ ދީފިއެވެ.

ޕްލޭނިންގް މިނިސްޓްރީން މައުލޫމާތު ދޭގޮތުގައި ޑަބްލިޔު ކޮންސްޓްރަކްޝަންއަށް އަލުން އިމާރާތްކުރުމުގެ ހުއްދަ ދީފައިވަނީ ޖިއާންގެ މަރުގެ ހާދިސާގެ ތަހުގީގު ނުނިމެނީސްއެވެ. އެގޮތަށް އަމަލުކޮށްފައިވަނީ ތަހުގީގަށް ހޭދަވާ މުއްދަތުގެ ދިގުކަމުން، އެ މަސައްކަތްތައް ހުއްޓުވާފައި ނުބާއްވަން ވެގެންކަމަށް ޕްލޭނިންގް މިނިސްޓްރީން ބުނެއެވެ.

މައުލޫމާތު ލިބޭގޮތުގައި މަސައްކަތްތައް އަލުން ފެއްޓުމުގެ ހުއްދަ ޑަބްލިޔު ކޮންސްޓްރަކްޝަންއަށް ދީފައިވަނީ މިދިޔަ ޑިސެމްބަރު މަހުގެ ފަހުކޮޅުގައެވެ.

އެކަމަކު ޖިއާން ނިޔާވި ސައިޓްކަމުގައިވާ މ. ނަލަހިޔާ މަންޒިލްގައި އެ ކުންފުނިން ކުރަމުން ދިޔަ މަސައްކަތްތަކަށް ހުއްދައެއް ނުދެއެވެ.

މި ހުއްދަ ނުދީ އޮތީ، އެ ހާދިސާގެ ތަހުގީގު ނުނިމި، އެފަދަ ހާދިސާއެއް ދެން ހިނގިޔަ ނުދިނުމަށް އެޅި ފިޔަވަޅުތަކާ ބެހޭ ރިޕޯޓެއް ނުލިބިގެންނެވެ.