އަސާސީ ހިދުމަތްތަކުގެ އަގުތައް 2.99 އިންސައްތަ ދަށަށް ހިނގައްޖެ

އަސާސީ ހިދުމަތްތަކުގެ އަގުތައް 2.99 އިންސައްތަ ދަށަށް ގޮސްފައިވާކަމަށް ޤައުމީ ތަފާސްހިސާބާ ބެހޭ އިދާރާއިން ނެރެފައިވާ ކޮންސިއުމަރ ޕްރައިސް ރިޕޯޓުން ދައްކައިފިއެވެ.

މޯލްޑިވްސް ބިއުރޯ އޮފް ސްޓެޓިސްޓިކްސް އިން ނެރެފައިވާ ދިވެހިރާއްޖޭގެ ބާޒާރުގައި މުދަލާ ތަކެތީގެ އަގުތައް ހުރިގޮތް ދައްކުވައިދޭ ތަފާސްހިސާބަށް ބަލާއިރު، ވޭތުވެދިޔަ އަހަރުދުވަހުގެ ތެރޭގައި އާއްމު ދިރިއުޅުމުގައި ބޭނުންކުރާ އެންމެ އަސާސީ ހިދުމަތަކުގެ އަގުތަށް ވަނީ ދަށަށްގޮސްފައެވެ. އެގޮތުން ގޯތި ގެދޮރާއި، ފެން، ކަރަންޓް، އަދި ގޭހާއި، ތެލުގެ އަގުތައް ވަނީ ޖުމްލަ ގޮތެއްގައި 2.99 އިންސައްތަ ދަށަށް ގޮސްފައެވެ. މިބައިގެ އަގުތައް ދަށަށް ދިއުމުގެ މައިގަނޑު ސަބަބަކީ، ހަކަތައިގެ ގޮތުގައި ބޭނުންކުރާ ތެލާއި ކަރަންޓްގެ އަގު ހެޔޮކުރުމެވެ.

އެސްޓީއޯއިން ތެލުގެ އަގު ހެޔޮކުރުމާއެކު ދަތުރުފަތުރުގެ ބައިގެ އަގުތައްވެސް ވަނީ ވޭތުވެދިޔަ އަހަރުދުވަހުގެ ތެރޭގައި 0.14 އިންސައްތަ ދަށަށް ގޮސްފައެވެ.

ވޭތުވެދިޔަ އަހަރެއްހާ ދުވަހުގެ ތެރޭގައި އަގުތައް އެންމެބޮޑަށް މައްޗަށް ގޮސްފައިވަނީ އަލްކަހޯލްގެ ބާވަތްތަކުގެ އިތުރުން ދުންފަތުގެ ބާވަތްތަކުންނެވެ. މީގެ އިތުރުން ދެން އަގުތައް މައްޗަށްގޮސްފައިވަނީ ހޮޓާ ރެސްޓޯރެންޓްގެ ބައިންނެވެ. ވޭތުވެދިޔަ އަހަރެއްހާ ދުވަހުގެ ތެރޭގައި ދުންފަތާއި އަލްކަހޯލިކްގެ ބައިގެ އަގުތައް 55.94 އިންސައްތަ މައްޗަށްގޮސްފައިވާއިރު، ރެސްޓޯރެންޓާއި ހޮޓާތަކުންދޭ ހިދުމަތްތަކުގެ އަގުތައް ވަނީ 29.26 އިންސައްތަ މައްޗަށްގޮސްފައެވެ.

ކާބޯތަކެތީގެ އަގުތައް އެހާބޮޑަށް މައްޗަށްގޮސްފައިވަނީ، މައިގަނޑު ގޮތެއްގައި ލުނބޯ އަދި ބިހުގެ އަގުތައް މައްޗަށްދިއުމާ ގުޅިގެންނެވެ. މޯލްޑިވްސް ބިއުރޯ އޮފް ސްޓެޓިސްޓިކްސް އިން މި ތަފާސްހިސާބު ތައްޔާރުކޮށްފައިވަނީ މިއަހަރުގެ ޖޫންމަހުން ފެށިގެން ފާއިތުވެދިޔަ 12 މަސްދުވަހުގެ ތަފާސްހިސާބުގެ މައްޗަށް ބިނާކޮށެވެ.