ކުޑަކުއްޖަކަށް ޖިންސީ ގޯނާކުރި ކަމުގެ ކުށް ސާބިތުވި މީހަކު 18 އަހަރަށް ޖަލަށްލުމަށް ހުކުމްކޮށްފި

ކުޑަކުއްޖަކަށް ޖިންސީ ގޯނާކުރި ކަމުގެ ކުށް ސާބިތުވި މީހަކު 18 އަހަރަށް ޖަލަށް ލުމަށް ކްރިމިނަލް ކޯޓުން ހުކުމްކޮށްފިއެވެ.

ކުށް ސާބިތުވެ ކްރިމިނަލް ކޯޓުން މި ހުކުމް އިއްވާފައިވަނީ، ތ.ގުރައިދޫ، މިޔަވާލިގެ، ހުސައިން ޒާހިންގެ މައްޗަށެވެ.

ޒާހިންގެ މައްޗަށް 3 ދައުވާ އެއް ވަނީ ސާބިތުވެފައެވެ. އޭގެ ތެރެއިން ފުރަތަމަ ދައުވާ އަކީ ކުޑަކުއްޖަކު އިތުބާރުކުރަންޖެހޭ މަޤާމެއްގައި ހުރި މީހަކު، އެ ކުޑަކުއްޖާއާއެކު ޖިންސީ ޢަމަލެއް ހިންގުމުގެ ކުށުގެ ދައުވާއެވެ. މި ދައުވާ ސާބިތުވުމާއި ގުޅިގެން އޭނާ  15 އަހަރު ދުވަހުގެ މުއްދަތަށް ޖަލަށްލުމަށް ކޯޓުން ވަނީ ޙުކުމްކޮށްފައެވެ.

ޒާހީންގެ މައްޗަށް ދެވަނަ އަށް ކުރި ދައުވާ އަކީ މީހަކު، ކުޑަކުއްޖަކަށް އެމީހަކު ލައިގެން ހުރި ހެދުމެއްގެ ބޭރުން ކުޑަކުއްޖަކަށް ފެންނާނެ ގޮތަކަށް ޖިންސީ ގުނަވަނެއް ހާމަކޮށްގެން ހުރުމުގެ ކުށުގެ ދައުވާ އެވެ. މި ދައުވާ ވެސް އޭނަގެ މައްޗަށް ސާބިތުވެ، 3  އަހަރު ދުވަހުގެ މުއްދަތަށްް ޒާހިން ޖަލަށްލުމަށް ވަނީ ހުކުމްކޮށްފައި އެވެ.

މި ދެ ދައުވާގެ އިތުރުންވެސް ދިވެހިރާއްޖޭގައި އޮރިޔާންކާޑު ގެންގުޅުމުގެ ކުށް ޒާހިންގެ މައްޗަށް ސާބިތުވެ، 1 މަހާއި 6 ދުވަހުގެ މުއްދަތަށް ޖަލަށްލުމަށް ކްރިމިނަލް ކޯޓުން ވަނީ ޙުކުމްކޮށްފައެވެ.

މިހުރިހާ ދައުވާތަކަކާއި ގުޅިގެން، ޖުމްލަ 18 އަހަރާއި، 1 މަހާއި 6 ދުވަހުގެ ޖަލު ހުކުމެއް ވަނީ ޒާހިން ގެ މައްޗަށް އިއްވާފައެވެ.

މި މައްސަލައަކީ ކުޑަކުއްޖެއްގެ މަސްލަހަތު ހިމެނޭ މައްސަލައަކަށްވާތީ، ކްރިމިނަލް ކޯޓުން މައްސަލައިގެ ރިޕޯޓް އާންމު ކޮށްފައެއް ނުވެއެވެ.

2020 ވަނަ އަހަރު ހިނގި މި ހާދިސާގައި، އުމުރުން 13 އަހަރުގެ ކުއްޖަކަށް ޖިންސީ ގޯނާކޮށްގެން އޭނާ ހުރީ ޝަރީއަތް ނިމެންދެން ބަންދުވެސް ކޮށްފައިކަން ފާހަގަކޮށްލަން ޖެހެއެވެ.