އޮސްޓްރޭލިއާގެ ބޮންޑައިބީޗްގައި ބަޑިޖެހުމުގެ ހާދިސާއެއްގައި 12 މީހަކު މަރުވެއްޖެ

އޮސްޓްރޭލިއާގެ ބޮނޑައި ބީޗްގައި ދިން ބަދީގެ ހަމަލާތަކެއްގައި މަދުވެގެން 12 މީހަކު މަރުވެއްޖެއެވެ.

މި ހާދިސާ އަމާޒުކޮށްފައިވަނީ އޮސްޓްރޭލިއާގައި ދިރިއުޅެމުންދާ ޖުވިޝް ކޮމިޔުނިޓީއަށްކަމަށް ނިއު ސައުތު ވޭލްސްގެ ފުލުހުން ވަނީ ބުނެފައެވެ. ބަޑިޖެހުމުގެ މި ހާދިސާގައި 11 މީހަކު ޒަހަމްވެފައިވާއިރު، މީގެ ތެރޭގައި ފުލުހުންގެ ދެ އޮފިސަރަކު ހިމެނެއެވެ.

މި ހާދިސާއާ ގުޅިގެން އޮސްޓްރޭލިއާގެ ބޮޑުވަޒީރު އެންތޮނީ އަލްބަނީޒް ވިދާޅުވީ މި ހަމަލާދިން ހަބަރާއެކު ކުއްލި ސިހުމެއް ލިބިފައިވާކަމަށާއި، މި ހަމަލާ ދިން މީހުން އަތުލައިގަނެ މިކަމުގެ މަގްސަދު އެންމެ ފުނަށް ހޯއްދަވާނޭކަމަށެވެ. ވީޑިއޯތަކުން ފެންނަގޮތުގައި ބަޑިޖެހުމުގެ މި ހާދިސާގައި ބަޑި ހިފައިގެން އުޅުނު އެކަކު ހުއްޓުވާފައިވަނީ އާއްމު ހެދުމުގައި ހުރި މީހެކެވެ.

ބަޑިޖެހުމުގެ މި ހާދިސާ 10 މިނެޓަށް ދެމިގެންދިޔަކަމަށް އޮސްޓްރޭލިއާގެ މީޑިއާތަކުން ވަނީ ބުނެފައެވެ.

މި ހަމަލާއާ ގުޅިގެން އޮސްޓްރޭލިއާގެ މުސްލިމް އިމާމް ކައުންސިލުން ވަނީ ހަމަލާ ކުށްވެރިކޮށް މިއީ ޓެރަރިސްޓް ހަމަލާއެއްގެ ގޮތުގައި ސިފަކޮށްފައެވެ.

އޮސްޓްރޭލިއާގައި ދޭތެރެއަކުން ބަޑިޖެހުމުގެ ހާދިސާތައް ހިނގަމުން އަންނައިރު، މީގެ ކުރިން އެއާޕޯޓް އަދި ބައެއް ސަރަހައްދުތަކުގައި ބަޑީގެ މިފަދަ ހަމަލާތައް ދީފައިވާކަން ފާހަގަކޮށްލެވެއެވެ.