ޗައިނާ އެފްޓީއޭގެ ދަށުން ސެޓްފިކެޓް އޮފް އޮރިޖިން ހޯދަން މިހާރު އޮންލައިނުކޮށް ހުށަހެޅޭނެ: ކަސްޓަމްސް

ޗައިނާ އާއި ދިވެހި ރާއްޖެ ގާއިމްކޮށްފައިވާ މިނިވަން ވިޔަފާރީގެ އެއްބަސްވުމުގެ ދަށުން ރާއްޖެއިން އެޤައުމަށް އެކްސްޕޯޓް ކުރާ މުދަލަށް ހޯދަންޖެހޭ ސެޓްފިކެޓް އޮފް އޮރިޖިން ހޯދުމަށް އޮންލައިނުކޮށް މިހާރު އެދެވޭނޭކަމަށް މޯލްޑިވްސް ކަސްޓަމްސް ސާވިސްއިން ބުނެފިއެވެ.

ކަސްޓަމްސްއިން ބުނީ ފްރީޓްރޭޑް އެއްބަސްވުމުގެ ދަށުން އެކްސްޕޯޓްކުރުމަށް ހޯދަންޖެހޭ ހުއްދަ "ކަސްޓަމްސް ޕޯޓަލް" މެދުވެރިކޮށް މިހާރު ހުށަހެޅޭނޭކަމަށެވެ. ސެޓްފިކެޓް އެޕްރޫވް ވުމުން، ކަސްޓަމްސް ޕޯޓަލްއިން ފެންނަންހުންނޭ ކަމަށާއި، ސެޓްފިކެޓަށް ދައްކަންޖެހޭ ފައިސާ ކަސްޓަމްސް ޕޯޓަލް މެދުވެރިކޮށް ދެއްކޭނޭ ކަމަށްވެސް ކަސްޓަމްސް އިން ވަނީ ބުނެފައެވެ.

ފައިސާ ދެއްކުމުން ސެޓްފިކެޓްގެ ޕްރިންޓެއް ކަސްޓަމްސްއިން ފޯރުކޮށްދޭއިރު، އޮގަސްޓްމަހުގެ 15 ވަނަ ދުވަހުން ފެށިގެން ޗައިނާއަށް އެކްސްޕޯޓް ކުރާ މުދަލަށް ސެޓްފިކެޓް އޮފް އޮރިޖިން ހޯދުމަށް ހުށަހެޅޭނެއެވެ

ޗައިނާ އާއި ރާއްޖެއާ ދެމެދު މިނިވަން ވިޔަފާރީގެ އެއްބަސްވުން ގާއިމްކުރުމުގެ މަސައްކަތް ފަށާފައިވަނީ، ރައީސް ޢަބްދުﷲ ޔާމީންގެ ވެރިކަމުގައި 2016 ވަނަ އަހަރުގެ ތެރޭގައެވެ. އެއްބަސްވުން އެކުލަވާލުމުގެ މަސައްކަތް ރައީސް ޔާމީނުގެ ވެރިކަން ނިމެންދެން ކުރިއަށް ދިޔައެވެ. އެ އެއްބަސްވުމަށް އަމަލުކުރަން ފަށާފައިވަނީ މިއަހަރުގެ ޖެނުއަރީމަހުން ފެށިގެންނެވެ.

ޗައިނާ ސަރުކާރާއި ދިވެހިރާއްޖެއާ ދެމެދު ގާއިމްކުރި މިނިވަން ވިޔަފާރީގެ އެއްބަސްވުމަށް ރަސްމީގޮތުން އަމަލުކުރުން އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން އިކޮނޮމިކް މިނިސްޓަރު މުހައްމަދު ސައީދު ވިދާޅުވީ، މި އެއްބަސްވުމާއެކު ޗައިނާއިން ރާއްޖެއަށް އެތެރެކުރާ 290 އަށްވުރެ ގިނަ މުދަލުން ނަގާ ޑިއުޓީ މައާފްވެގެން ދާނޭކަމަށެވެ. މިގޮތުން ފަރުނީޗަރާއި، އިލެކްޓްރޯނިކް އައިޓަމްގެ އިތުރުން މެޝިނަރީން ނަގާ ޑިއުޓީވެސް މައާފްވެގެންދާނެއެވެ.

ޗައިނާ އާއި ރާއްޖެއާ ދެމެދު ވެވުނު މިނިވަން ވިޔަފާރީގެ އެއްބަސްވުމުގެ ސަބަބުން ދިވެހިންނަށް ލިބިގެންދާ އެންމެ ހާއްސަ އެއްކަމަކީ، ޗައިނާގެ ބޮޑެތި ސިޓީތައް ނުވަތަ ޗައިނާގެ މާކެޓުގައި ދިވެހިންނަށް ވިޔަފާރިކުރަން ފުރުސަތުތައް ލިބި، އެހެންގައުމުގެ މާކެޓްތަކަށް ވަނުމުގެ ފުރުސަތު ލިބިގެންދިއުމެވެ. އަދި މި އެއްބަސްވުމުގެ ދަށުން ޗައިނާއަށް މަހުގެ ބާވަތްތައް ބޭރުކުރުމުގައިވެސް އިނާޔަތްތައް ލިބެއެވެ.