ސަލަފު އަށް ފިޔަވަޅު އަޅަން ކޮމެޓީން ފާސްކުރީ ހަސަން ލަތީފު އެކަނި އިންނަވައިގެން

ރާއްޖޭގައި ދީނީ ގިނަ އިލްމުވެރިންތަކެއް ގުޅިގެން ހަރަކާތްތެރި ވަމުން އަންނަ ޖަމުއިއްޔަތުއް ސަލަފު އަށް، ފިޔަވަޅު އަޅަން 241 ކޮމެޓީގެ ސަބް ކޮމެޓީން ފާސްކުރީ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު އެކަނި އިންނަވައިގެން ކަމަށް އެ ކޮމިޓީގައި ދެން ހިމެނިވަޑައިގަންވާ ދެ މެމްބަރުން ވިދާޅުވެއްޖެ އެވެ.

ސަބް ކޮމެޓީގައި ދެން ހިމެނިވަޑައިގެންނެވި މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް ތިއްބެވި ނަމަވެސް ރިޕޯޓް ތައްޔާރުކުރީ ހަސަން ލަތީފެވެ. އަދި ފާސްކޮށް ސޮއިކުރެއްވީ ވެސް ހަސަން ލަތީފު އެކަންޏެވެ.

އެކަން ހާމަވީ މިރޭ އިދިކޮޅު ކޯލިޝަނުން ބޭއްވި ނޫސްވެރިންގެ ބައްދަލުވުމުގައި، ސަބް ކޮމެޓީގައި ދެން ތިއްބެވި ދެ މެންބަރުން ކަމަށްވައި އާދަމް ޝަރީފާއި ހުސައިން މުހައްމަދު ލަތީފު ވިދާޅުވުމުން ނެވެ.

ހުސައިން މުހައްމަދު ލަތީފު ވިދާޅުވީ، ކޮމެޓީ ބައްދަލުވުން އިއްޔެ ފެސި އިރު ކޮމެޓީގައި އޭނާ އިންނެވި ނަމަވެސް ވަކި ހިސާބަކުން އާއިލީ ކަމެއް ދިމާވެގެން ކުއްލި އަކަށް ގެޔަށް ދާންޖެހިގެން ދިޔައީ ކަމަށެވެ. އެކޮމެޓީގައި އެއްވެސް ކަމެއް ފާސްކުރުމަށް ގުޅައިފައި ނުވާ ކަމަށް ހުސެން ވިދާޅުވިއެވެ.

އޭނާ ވިދާޅުވީ މިއީ މަޖިލީހުގެ އުސޫލުތަކާއި ވެސް ހިލާފު ކަމެއް ކަމަށެވެ.

ކޮމެޓީގައި ދެން ހިމެނިވަޑައިގަންނަވާ މަޑުއްވަރީ ދާއިރާގެ މެންބަރު އާދަމް ޝަރީފުވެސް މިރޭގެ ނޫސްވެރިންގެ ބައްދަލުވުމުގައި ވިދާޅުވީ، މައި ކޮމެޓީއަށް ފޮނުވަން ސަބް ކޮމެޓީން ތައްޔާރުކޮށްފައިވާ ރިޕޯޓުވެސް އޭނާ ވިދާޅުވެފައި ނުވާ ކަމަށެވެ.

އާދަމް ޝަރީފު ވިދާޅުވީ، އެ ކޮމިޓީ ރިޕޯޓު އެކުލަވާލި އިރު ސަބް ކޮމިޓީގައި އޭނާ ބައިވެރިވި ކަމަށާއި ނަމަވެސް އެ ރިޕޯޓަކީ ސަބް ކޮމިޓީން ފާސްކޮށްގެން މައި ކޮމިޓީއަށް ހުށަހެޅި ރިޕޯޓެއް ނޫން ކަމަށެވެ.

މަޖިލީހުގެ ރައީސް އިއްޔެ ވިދާޅުވެފައިވަނީ ސަލަފަކީ ޓެރަރިސްޓް އަމަލުތަކަށް ހިތްވަރުދޭ ޖަމާއަތެއް ކަމަށާއި އެޖަމާއަތާ މެދު މަޖިލީހުން ގޮތެއް ނިންމާނެ ކަމަށެވެ.

ސަލަފު ޖަމުއިއްޔާއަށް ފިޔަވަޅު އަޅަން ނިންމީ، ޑރ. އަފްރާޝީމު އަލީގެ މަރުގެ މައްސަލަ، މަރުކޮމިޝަނުން އަލުން ތަހުގީގު ކުރުމަށްފަހު ނެރުނު ރިޕޯޓުގައި ސަލަފުގެ މައްޗަށް ދީނީ ހަރުކަށި ވިސްނުން ގެންގުޅޭ ޖަމުއިއްޔާއެއް ކަމަށްބުނެފައިވާތީއެވެ. ނަމަވެސް ސަލަފުން އެކަން ދޮގުކޮށްފައިވެއެވެ.